Isambililo 5

Ubumi Bwalikwata Imifwaile Yawamisha

1, 2. Ni shani twingeshiba ukuti Lesa alatusakamana, kabili ni kwi tulingile ukwalukila ku fyasuko pa fipusho fya pa bumi?

¹ Inshila intu isonde ne fintu fya mweo fyapangilwemo ilanga ukuti Kabumba wa fiko ni Lesa wa kutemwa uusakamana mu cine cine. Kabili Icebo cakwe, Baibolo, cilango kuti alasakamana; pantu citupeela amasuko yawamisha ukukuma ku fipusho fya kuti: Mulandu nshi twabela pano isonde? kabili, Ni kwi tuleya?

² Tulekabila ukusapika muli Baibolo kuli ifyo fyasuko. Icebo ca kwa Lesa cisoso kuti: “Nga mwamufwaya, kuti asangwa kuli imwe; lelo, nga mwamusuula kuti asuula na imwe.” (2 Imilandu 15:2) Ee co lyene, cinshi cintu ukusapika kwa Cebo ca kwa Lesa kusokolola pa lwa mifwaile yakwe kuli ifwe?

Umulandu Lesa Abumbile Abantunse

3. Mulandu nshi Lesa abumbile isonde?

³ Baibolo ilango kuti Lesa apekenye isonde ukucilisha mu kuba na bantunse mu muntontonkanya. Esaya 45:18 asosa ukukuma kwi sonde ukuti Lesa ‘talilingile cimfulumfulu, [lelo] alibombele ku kwikalwamo.’ Kabili apayenye sonde mu kuba ne cili conse ico abantu bengakabila, te ku kuba fye aba mweo, lelo ukuipakisha ubumi ku mwisulo.—Ukutendeka, ifipandwa 1 na 2.

4. Mulandu nshi Lesa abumbile abantunse ba ntanshi?

⁴ Mu Cebo cakwe, Lesa alanda ulwa kubumba abantunse ba kubalilapo, Adamu na Efa, kabili asokolola cintu akwatile ulupwa lwa buntunse mu muntontonkanya. Atile: “Natucite umuntu mu cata cesu, umwabele cipasho cesu: na o abe na bukateka kwi sabi lya muli bemba, na ku fyuni fya mu lwelele, na ku fitekwa, na ku nama shonse sha mpanga, na ku fikulika fyonse ifikulika pe sonde.” (Ukutendeka 1:26) Abantunse bali no kukwata ubwangalishi “pe sonde” no bubumbo bwa liko ubwa nama.

5. Ni kwi kuntu abantunse ba ntanshi babikilwe?

⁵ Lesa acitile ibala likalamba, ilyapala parka mu ncende iitwa Edene, iyabela mu Middle East. Lyene “abuulile umuntu, amubikile na mwi bala lya Edene ku kulilima no kulilinda.” Yali ni paradise iyalimo conse cintu abantunse ba ntanshi baali no kukabila ukulya. Kabili casanshishemo “muti onse uo bengatemwo kumona kabili uwawama ku kulya,” pamo pene ne fimenwa fimbi ne misango iingi iya kusekesha iya nama.—Ukutendeka 2:7-9, 15.

6. Abantunse babumbilwe mu kuba ne mibele nshi iya muntontonkanya no mubili?

⁶ Imibili ya bantunse ba kubalilapo yabumbilwe iyapwililika, ica kuti tabali na kulwala, ukukota, nelyo kufwa. Na kabili bapeelwe imibele imbi, pamo nga iya kuisalila. Inshila intu bapangilwemo yalondololwa pa Ukutendeka 1:27 ukuti: “Lesa alengele umuntu mu [cipasho NW] cakwe, mu [cipasho, NW] ca kwa Lesa e mo amulengele; umwaume no mwanakashi e fyo abalengele.” Apo utwabimbwa mu cipasho ca kwa Lesa, twapeelwe te mibele ya ku mubili ne ya muntontonkanya yeka lelo na kabili imbali sha mibele isuma ne sha ku mupashi, kabili ishi shifwile ukwikushiwa nga tuli no kuba aba nsansa mu cine cine. Lesa ali no kupayanya inshila ku kwikusha uko kukabila pamo pene no kukabila kwa ca kulya, amenshi, no mwela. Nga fintu Yesu Kristu asosele, “te ku cilyo ceka umuntu ekalila no mweo, lelo ku cebo conse icifuma ku kanwa ka kwa [Yehova, NW].”— Mateo 4:4.

7. Likambisho nshi abantu ba ntanshi babili bapeelwe?

⁷ Mu kulundapo, Lesa apeele kambisho lyawamisha ku bantu babili aba ntanshi ilintu bali mu Edene ukuti: “Fyaleni, fuleni, kumaneni pe sonde no kupanasha.” (Ukutendeka 1:28) E co bali na maka ya kufyalana no kuletako abana bapwililika. Kabili ilyo impendwa ya bantunse yaleingilishiwako, bali no kukwata umulimo wabamo kubekwa uwa kutanununa imipaka ya ncende ya paradise iyapala parka iya Edene. Mu kupelako, isonde apo lyapela lyali no kulundululwa ukusanguka paradise, uwaikalwamo na bantu bapwililika, aba nsansa abengekala kuli pe na pe. Baibolo itwishibisho kuti pa numa ya kubika ici conse mu kubomba, “Lesa amwene conse ico acitile, kabili, moneni, naciwamisha.”—Ukutendeka 1:31; moneni na kabili Ilumbo 118:17.

8. Ni shani fintu abantunse bali no kusakamana isonde?

⁸ Cili camonekesha ukuti abantunse bali no kubomfya isonde lyanashiwa ku kunonkelamo kwabo. Lelo ici cali no kucitwa mu nshila yabamo kushingamwa. Abantunse bali no kuba abalashi bacindikwa abe sonde, te ba kulifwambulula. Ukonaula kwe sonde uko tumona ilelo kwaba kulwisha ukufwaya kwa kwa Lesa, kabili abo abakana muli kwene baliba mu kupusana ne mifwaile ya bumi pe sonde. Bakakandwa pa lwa ico, pantu Baibolo isosa ukuti Lesa “akonaula abaleonaule calo.”—Ukusokolola 11:18.

Icili Mifwaile ya kwa Lesa

9. Mulandu nshi twabela abacetekela ukuti imifwaile ya kwa Lesa ikafikilishiwa?

⁹ Muli fyo, ukutula pa kutendeka yali mifwaile ya kwa Lesa ku lupwa lwa buntunse ulwapwililika ukwikala pe sonde kuli pe na pe muli paradise. Kabili icili e mifwaile yakwe! Ukwabulo kufilwa, ilya mifwaile ikafikilishiwa. Baibolo ilondololo kuti: “Yehova wa milalo nalapa, ati: Cine cine ifyo napangile, e fyo cikaba, cine cine ifyo napandile amano, e fyo cikeminina.” “Cene, nalisosa, nkacilengo kwisabapo; nalipanga, nkacicita.”—Esaya 14:24; 46:11.

10, 11. Ni shani fintu Yesu, Petro, na kemba wa malumbo Davidi balandile pa lwa Paradise?

¹⁰ Yesu Kristu alandile pa lwa mifwaile ya kwa Lesa iya kubwesha paradise pe sonde lintu aebele umuntu umo uwafwaile isubilo lya nshita ya ku ntanshi ukuti: “Ukaba na ine mu Paradise.” (Luka 23:43, NW) Umutumwa Petro na o alandile ulwa calo cipya cileisa lintu asobele ukuti: “Imyulu ipya [imitantikile ipya iya kamfulumende ukuteka ukufuma ku muulu] ne calo cipya [sosaite mupya uwa pe sonde] e fyo tulolela, umwaikalo bulungami, umwabele cilayo [ca kwa Lesa].”—2 Petro 3:13.

¹¹ Kemba wa malumbo Davidi na o alembele pa lwa calo cipya icileisa na fintu cikekalilila. Asobele ati: “Abalungama bakapyaninine calo, no kwikalamo inshiku pe.” (Ilumbo 37:29) Uyo e mulandu Yesu alaile ukuti: “[Ba nsansa, NW] abafuuka; pantu bakakwate calo.”—Mateo 5:5.

12, 13. Supawila imifwaile yawamisha iya kwa Lesa ku mutundu wa muntu.

¹² Mwandi cilolelo cawamishe co, ukwikala kuli pe na pe pe sonde lya paradise ilyalubuka ukufuma ku bubifi bonse, imisoka, ukulwala, ubulanda, no kukalipwa! Mwi buuku lya kulekelesha ilya Baibolo, Icebo ca kwa Lesa ica busesemo cisupawila iyi mifwaile yawamisha pa kubilisha ukuti: “[Lesa] akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.” Cilundapo kuti: “Kabili uwaikala pa cipuna ca bufumu atile, Moneni, ifintu fyonse nafilenge fipya. Kabili atile, Lemba: pantu ifyebo ifi fya cishinka kabili fya cine.”—Ukusokolola 21:4, 5.

¹³ Ee, Lesa alikwata imifwaile yawamisha mu muntontonkanya. Cikaba calo cipya ica bulungami, paradise wa ciyayaya, uwasobelwe na Umo uwingaba na maka ya kucita kabili uukacita cintu alaya, pantu “ifyebo [fyakwe] fya cishinka kabili fya cine.”

[Ifikope pe bula 21]

Lesa afwaile ukuti abantunse bekale kuli pe na pe pe sonde lya paradise. Iyo icili e mifwaile yakwe

[Icikope pe bula 22]

Umwine kuti alubulwisha abekalamo aba kusonkela abo bonaula iŋanda yakwe