Isambililo 8
Ikala Kuli Pe Na Pe Mwi Sonde Lya Paradise
1, 2. Ubumi bukaba shani pe samba lya kuteka kwa Bufumu bwa kwa Lesa?
1 Ubumi bukaba shani lintu Lesa afumyapo ububifi no kucula pe sonde no kuletamo icalo cakwe cipya pe samba lya kulama kwabamo kutemwa ukwa Bufumu bwakwe ubwa ku muulu? Lesa alaya ‘ukufumbatula iminwe yakwe no kwikusha conse ica mweo ifyo cilefwaya.’—Ilumbo 145:16.
2 Finshi fyaba e kufwaisha kobe ukwa cine cine? Bushe tacaba bumi bwa nsansa, umulimo walinga, ukufula kwa fikwatwa, ifyashingulukako fyayemba, umutende pa kati ka bantu na bantu bonse, no buntungwa ukufuma ku lufyengo, ukulwala, ukucula, ne mfwa? Kabili ni shani ku lwa filolelo fya buseko ifya ku mupashi? Fyonse ifyo fikafishiwapo mu kwangufyanya pe samba lya mitekele ya Bufumu bwa kwa Lesa. Mona cintu amasesemo ya Baibolo yasosa ku lwa mapaalo yawamisha ayali no kwisa muli cilya calo cipya.
Umutundu wa Muntu pa Mutende Wapwililika
3-6. Kwebekesha nshi twakwata ukwa kuti abantunse bakakwata umutende mu calo cipya?
3 “[Lesa] aputulo bulwi ukufika ku mpela ya calo; ubuta abufuna, afuna ne fumo, amaceleta [ya nkondo] ayoca mu mulilo.”—Ilumbo 46:9.
4 “Bakasuke abafule mpanga shabo shibe ifya kuliminako umushili, na mafumo yabo yabe ifya kutungwilako imiti; lukasuke uluko alubulo kusumbwilo lupanga ku luko, nangu kusambilila kabili ubulwi.”—Esaya 2:4.
5 “Abalanda bakapyaninine calo, no kuilemeno bwingi bwa mutende.”—Ilumbo 37:11.
6 “Pano isonde ponse napatusha, napaba tondolo, papongomoka akapundu.”—Esaya 14:7.
Umuntu ne Nama pa Mutende
7, 8. Mutende nshi ukabapo pa kati ka bantu ne nama?
7 “Umumbulu ukalebela ku mwana wa mpaanga, ne mbwili ikayolola ukuli umwana wa mbushi; umwana wa ŋombe no musepela wa nkalamo na katekwa kaina fikekala pamo, kabili umwaice akaba kakumba wa fiko; iŋombe nkota na bere fikaba bucibusa, abana ba fiko bakayolola pamo, ne nkalamo ikalye cani nga cilume wa ŋombe; umwana uonka akaangala pa musombo wa ngoshe, no wasumunwa akatambaliko kuboko kwakwe pa bwendo bwe folo. Tafyakacite bubi, kabili tafyakonaule.”—Esaya 11:6-9.
8 “Muli bulya bushiku nkabapinganine cipingo ne nama sha mu mpanga, ne fyuni fya mu lwelele, ne fikulika pa nshi; . . . no kubalengo kusendamo mutelelwe.”—Hosea 2:18.
Ubutuntulu bwa Bumi Bwapwililika, Ubumi bwa Muyayaya
9-14. Londolola imibele ya butuntulu bwa bumi mu calo cipya.
9 “E lyo yakashibulwa amenso ya mpofu, na matwi ya bankomamatwi yakakomonwa; e lyo uwalemana amolu akacilauka nge nsebula, no lulimi lwa kwa cibulu lukaula.”—Esaya 35:5, 6.
10 “[Lesa] akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka.”—Ukusokolola 21:4.
11 “Umwikashi wa mu calo takasose, ati, Nindwala.”—Esaya 33:24.
12 “E lyo umubili wakwe walelemo kucilo wa mwaice, abwelela ku nshiku sha bulumendo bwakwe.”—Yobo 33:25.
13 “Ica bupe ca kwa Lesa mweo wa muyayaya muli Yesu Kristu Shikulwifwe.”—Abena Roma 6:23.
14 “Onse uumutetekela . . . [akaba] no mweo wa muyayaya.”—Yohane 3:16.
Abafwa Babweshiwa ku Bumi
15-17. Lisubilo nshi lyabako kuli abo abafwa kale?
15 “Kukabo kwima ku bafwa kwa balungama na bashalungama.”—Imilimo 24:15.
16 “Inshita ileisa, iyo bonse aba mu nshishi [mu cibukisho ca kwa Lesa] bakomfwamo ishiwi lyakwe, no kufumamo.”—Yohane 5:28.
17 “Bemba alekelemo abafwa abalimo, ne Mfwa na ku Mbo fyalekelemo abafwa abali muli fyene.”—Ukusokolola 20:13.
Isonde, Paradise Wabamo Ifingi
18-22. Isonde apo lyapela likaalulwa ukuba cinshi?
18 “Kukabe mfula isha kulete paalo. Umuti wa mpanga ukapeele fisabo fya uko, no mushili ukafumyo bulimi bwa uko, kabili bakabo mutelelwe mu mpanga yabo.”—Esekiele 34:26, 27.
19 “Icalo cafumyo bulimi bwa ciko; atupaala Lesa, Lesa wesu.”—Ilumbo 67:6.
20 “Fisekelele amatololo ne mpanga iyaumisha, ifiswebebe fyange no kupuuka nga cananika.”—Esaya 35:1.
21 “Impili no tupili fikapongomoko tupundu ku cinso cenu, ne miti yonse ya mu mpanga ikombelako indupi; pe punda lya cimpuusa ca muunga pakameno mukupri, pe punda lya kaenya pakameno muhadasi.”—Esaya 55:12, 13.
22 “Ukaba na ine mu Paradise.”—Luka 23:43, NW.
Amayanda Ayasuma Kuli Bonse
23, 24. Kwebekesha nshi twakwata ukwa kuti kukabako amayanda yakumanina kuli bonse?
23 “Bakakuula amayanda no kwikalamo . . . Tabakakuule na bambi abekalamo, tabakalime na bambi abalyako; . . . ne milimo ya minwe yabo abasalwa bandi bakasekelamo pa myaka iingi; tabakacucutikile ibusha, nangu kufyalila abana itentula.”—Esaya 65:21-23.
24 “Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya.”—Mika 4:4.
Kuti Waikala Kuli Pe na Pe Muli Paradise
25. Cilolelo nshi twakwata ica nshita ya ku ntanshi?
25 We cilolelo ca kusungusha ica nshita ya ku ntanshi! Mwandi mifwaile ya cine cine intu ubumi bwingakwata nomba lintu bwaikashiwa kwi subilo lyakosa ilya kuti mu calo cipya ica kwa Lesa impika shonse isha lelo shikaba kuli pe na pe fintu fyapita! “Ifya ntanshi tafyakebukishiwe, tafyakabukuluke mu mutima.” (Esaya 65:17) Kabili ifyo cabe ca kusansamusha ukwishiba ukuti pali ilya nshita ubumi bukaba ubwa ciyayaya: “[Lesa] akamine mfwa ukumina kwa pe.”—Esaya 25:8.
26. Cinshi caba e lufungulo ku kwikala kuli pe na pe mu calo cipya ica kwa Lesa?
26 Bushe ulefwayo kwikala mu calo cipya ica Paradise ico nomba cipalamishe? ‘Cinshi ningakabilo kucita pa kukwato kusenamina kwa kwa Lesa pa mpela ya ici calo no kutwalililo wa mweo ukwingila mu calo cakwe cipya?’ e fyo pambi wingepusha. Ulekabila ukucita cintu Yesu alangilile mwi pepo kuli Lesa ukuti: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.”—Yohane 17:3.
27. Cinshi ufwile ukucita pa kubuulamo lubali mu mifwaile ya kwa Lesa?
27 E ico, fwaya Baibolo, no kushininkisha fintu ubelengele muli uno broshuwa. Fwailisha bambi abasambilila kabili abasambilisha ici cine ca Baibolo. Putukako ku mabutotelo ya bumbimunda ayasambilisha no kucite fintu ifyapusana na Baibolo. Sambilila fintu iwe, capamo na mamilioni ya bambi abo kale kale balecito kufwaya kwa kwa Lesa, wingakana mu mifwaile ya kwa Lesa iya kuti abantunse bakekale kuli pe na pe pe sonde lya paradise. Kabili senda mu kukatama ifyo Icebo capuutwamo cibilisha ku lwa nshita ya ku ntanshi iili mupepi ukuti: “Pano isonde paleya, no lunkumbwa lwa pako; lelo uucito kufwaya kwa kwa Lesa ekalilila umuyayaya.”—1 Yohane 2:17.
[Icikope pe bula 31]
Imifwaile ya kwa Lesa iya kubwesha paradise wa pe sonde mu kwangufyanya ikafishiwapo