Isambililo 6

Ubufumu bwa kwa Lesa Cinshi?

Ni kwi Ubufumu bwa kwa Lesa bwabela? (1) Nani waba Imfumu ya buko? (2)

Bushe bambi balatekako ne yi Mfumu? Nga ni fyo, bushe baba banga? (3)

Cinshi cilangisha ukuti tuleikala mu nshiku sha kulekelesha? (4)

Cinshi cintu Ubufumu bwa kwa Lesa bukacitila umutundu wa muntu ku ntanshi? (5-7)

1. Lintu aali pe sonde, Yesu asambilishe abakonshi bakwe ukupepela Ubufumu bwa kwa Lesa. Ubufumu buteko ubutungululwa ne mfumu. Ubufumu bwa kwa Lesa bwaba buteko bwaibela. Bwabela mu muulu kabili bukateka lino isonde. Bukalenga ishina lya kwa Lesa ukubeelwa akatiina, nelyo ukulilenga ukuba ilya mushilo. Bukalenga ukufwaya kwa kwa Lesa ukucitwa pano nse nga mu muulu.—Mateo 6:9, 10.

2. Lesa alaile ukuti Yesu aali no kube Mfumu ya Bufumu Bwakwe. (Luka 1:30-33) Lintu Yesu aali pe sonde, ashininkishe ukuti aali no kuba Kateka wa cikuuku, uwa bulungi, kabili uwapwililika. Lintu abwelele ku muulu, tabikilwe pa cipuna ukuba Imfumu ya Bufumu bwa kwa Lesa ilyo line fye. (AbaHebere 10:12, 13) Mu 1914, Yehova apeele Yesu amaka ayo Amulaile. Ukutule lyo, Yesu aliteeka mu muulu nge Mfumu yasontwa iya kwa Yehova.—Daniele 7:13, 14.

3. Yehova na kabili alisala abaume na banakashi bamo aba busumino ukufuma pe sonde ukuya ku muulu. Bakateka na Yesu nge shamfumu, abapingushi, na bashimapepo pa mutundu wa muntu. (Luka 22:28-30; Ukusokolola 5:9, 10) Yesu aitile aba bakateka banankwe mu Bufumu bwakwe “umukuni unono.” Impendwa yabo ni 144,000.—Luka 12:32; Ukusokolola 14:1-3.

4. Mu kwangufyanya fye lintu Yesu abele Imfumu, apoosele Satana na bamalaika bakwe ababipa ukufuma ku muulu ukwisa mu bwina mupalamano bwe sonde. E mulandu wine ifintu fyabipila nga nshi pano isonde ukutula 1914. (Ukusokolola 12:9, 12) Inkondo, ifipowe, ifikuko, ukufulisha kwa bupulumushi—ifi fyonse fyaba lubali lwa “ciishibilo” icilelangilila ukuti Yesu aleteka no kuti ino micitile ili mu nshiku sha iko isha kulekelesha.—Mateo 24:3, 7, 8, 12; Luka 21:10, 11; 2 Timote 3:1-5.

5. Nomba line fye Yesu ali no kupingula abantu, ukubapaatukanya pamo nga filya kacema apatukaanye mpaanga ukufuma ku mbushi. “Impaanga” bakaba ni abo abakaba nabaishininkisha abene ukuba abatekwa bakwe aba bucishinka. Bakapokelela umweo wa muyayaya pe sonde. “Imbushi” ni abo abakaba nabakaana Ubufumu bwa kwa Lesa. (Mateo 25:31-34, 46) Ku nshita ya ku ntanshi iipalamishe, Yesu akonaula abapale mbushi bonse. (2 Abena Tesalonika 1:6-9) Nga ca kuti ulefwaya ukuba umo uwa “mpaanga” sha kwa Yesu, ufwile ukukutika ku bukombe bwa Bufumu no kubombela pa co ulesambilila.—Mateo 24:14.

6. Pali nomba isonde lyalyakanishiwa mu fyalo ifingi. Icalo cimo na cimo calikwata ubuteko bwa ciko. Ishi nko ilingi line shilalwishanya. Lelo Ubufumu bwa kwa Lesa bukapyana amabuteko yonse aya buntunse. Bukateka ngo buteko fye bweka pe sonde lyonse. (Daniele 2:44) Lyene takwakabeko na kabili inkondo, imisoka, no lukaakala. Abantu bonse bakekala pamo mu mutende kabili mu kwikatana.—Mika 4:3, 4.

7. Mu kati ka Kuteka kwa Myaka Ikana Limo ukwa kwa Yesu abantunse ba busumino bakapwililika, kabili isonde lyonse likaba paradise. Ilyo imyaka ikana limo ikalapwa, Yesu akaba nacita fyonse ifyo Lesa amwebele ukucita. Lyene akalubwila Ubufumu kuli Wishi. (1 Abena Korinti 15:24) Mulandu nshi ushingebelako ifibusa fyobe na bo watemwa pa lwa co Ubufumu bwa kwa Lesa bukacita?

[Icikope pe bula 13]

Pe samba lya kuteka kwa kwa Yesu, takwakabeko na kabili ulupato nelyo ubulwani