Cinshi Cicitika nga Twafwa?

Umuntu uwafwa alipusana no muntu umumi. Imfwa yaba kwati kulaala utulo utwine twine. (Yohane 11:11-14) Abafwa te kuti bomfwe, ukumona, ukulanda, nelyo ukutontonkanya ifili fyonse. (Lukala Milandu 9:5, 10) Imipepele ya bufi isambilisha ukuti abafwa basanguke mipashi no kwikala ne fikolwe fyabo. Ico te cintu Baibolo isambilisha.

Abafwa te kuti batwafwilishe, kabili te kuti batucite icili conse. Abengi balasefya intambi no kupeela amalambo kabili basumina ukuti ifi filatemuna abafwa. Ifi filafulwisha Lesa pantu fyafuma ku bufi bwa kwa Satana. Kabili te kuti fitemune abafwa pantu te bomi. Tatufwile ukutiina nelyo ukupepa abafwa. Tufwile ukupepa fye Lesa.—Mateo 4:10.

Abafwa bakaba abomi na kabili. Yehova akabuusha abafwa kabili bakekala mu paradise pe sonde. Iyo nshita akacite co icili ku ntanshi. (Yohane 5:28, 29; Imilimo 24:15) Lesa kuti abuusha abafwa filya fine mwingabuusha umuntu uulele utulo.—Marko 5:22, 23, 41, 42.

Satana Kaseebanya e usambilisha mpanga yonse icisambilisho ca kuti tatufwa. Satana ne fibanda fyakwe e balenga abantu ukutontonkanya ukuti imipashi ya bafwa taifwa kabili e ileta amalwele na macushi yambi. Satana alalufya abantu, inshita shimo mu filoto ne fimonwa. Yehova alipata abafwaya ukulanda na bafwa.—Amalango 18:10-12.