Ukubomfya Ifyebo Mupeelwe

BAIBOLO ilinganya icilonganino ca Bwina Kristu ku mubili wa muntu. Icilundwa cimo na cimo cilakabilwa, lelo “fyonse tafyaba no mulimo umo wine.” Ukulingana ne fyo, tulingile ukubomba pe shuko ilili lyonse ilyo batupeela. Pa kucite ci tufwile ukumfwikisha no kupoosako amano ku mulimo wa kulanda onse untu twapeelwa mu cifulo ca kusuula amalyashi yamo ukuti tayacindama pantu fye tuletontonkanya ukuti yambi kuti yawamapo. (Rom. 12:4-8) Ibumba lya musha wa cishinka kabili uwashilimuka lyalikwata umulimo wa kupeela ifya kulya fya ku mupashi “mu nshita iyene.” (Mat. 24:45) Ilyo twabomfya ukulamuka kwesu ku kulanda amalyashi ukulingana na makambisho twapokelela, tulanga ukuti tulatasha pali uko kutantika tulishiwamo. Ici na co cilenga icilonganino conse cilebomba bwino.

Ifya Kusanshamo. Ilyo mwaebwa umulandu wa kulandapo mwi sukulu, shininkisheni ukuti uyo wine fye e mulandu mwalandapo, te kulanda fimbi iyo. Ilingi line, bakamweba umwa kumona pa kusanga ifyebo. Nga tamwebelwe ifyebo fya kubomfya pa kulanda ilyashi lyenu, kuti mwaifwaila ukwa kufumya ifyebo. Lelo, ilyo mulepekanya ilyashi lyenu, shininkisheni ukuti ilyashi lyonse lili fye pa mulandu mwebelwe ukulandapo. Ilyo muletontonkanya pa fya kusanshamo, mulingile no kutontonkanya pe bumba muli no kulandako.

Belengeni bwino bwino ifyebo mupeelwe, ukubebeta amalembo yalimo. Lyene tontonkanyeni ifyo mwingabomfya bwino ifyo fyebo pa kuti ibumba linonkelemo. Mu fyebo mulesokota, salenimo ifishinka fibili atemwa fitatu ifili no kuba e fishinka fikalamba ifya lyashi lyenu. Lyene mu fyebo mupeelwe, salenimo na malembo ayo mulepanga ukubelenga no kulandapo.

Bushe ifyebo fifwile ukufula shani? Lingeni fye ifyo mwingalandapo ica kuti abantu banonkelemo. Nga mwapampa ifyebo ifingi sana mu lyashi lyenu, ninshi tamwakasambilishe bwino. Nga ca kuti ifyebo fimo tafikumine ku buyo bwa lyashi, landeni fye pa fyebo ifingamwafwa ukufika pa buyo bwa lyashi lyenu. Mu fyebo mupeelwe, bomfyenimo fye ifyebo ifingafunda sana ibumba lyenu no kulinonsha. Ubuyo bwenu ilyo mulebombela pali ci cishinka ca kufundwapo te bwa kumona ubwingi bwa fyebo mwingalanda, lelo bwa kubomfya ifyebo mupeelwe ku kulanda ilyashi lyenu.

Ilyashi lyenu talifwile fye ukuba lya kusupula ifyebo mupeelwe. Mulingile ukupekanya ukuti mukalondolole ifishinka fimo, ukufitanununa, ukupeela ifilangililo, napamo ukulanda na pa fya kumwenako filelanga fintu ifyo fyebo fingabomfiwa. Ifyebo fyalundwapo filingile ukubomfiwa ku kulondolola ifishinka fikalamba ifya mu fyebo mupeelwe te kufipyanika pali ifyo fyebo iyo.

Bamunyina abafikapo ukuba bakasambilisha mu kupita kwa nshita kuti baebwa ukufunda pa Kulongana kwa Mulimo. Balishiba ukuti bafwile ukulanda bwino ifyebo bapeelwe ukucila ukupyanikapo fimbi. E fyo caba na kuli bamunyina balanda amalyashi ya ku cintubwingi, balapeelwa autulaini ya kukonka. Muli aya maautulaini kuti bayalulako mumo mumo, lelo yalalangilila bwino bwino ifishinka fikalamba ifya kulandapo, ifishinka fya kutungilila, na malembo apashimpilwe ilyashi. Ukwishiba ukusambilisha ukubomfya ifyebo mupeelwe calicindama mu kupekanya amalyashi yambi.

Uku kusambilila kuti kwamwafwa na pa kutungulula amasambililo ya Baibolo ayalunduluka. Mukasambilila ukulanda fye pa fyebo mulesambilisha ukucila ukupaasuka ukufuma kuli uyo mulandu no kukomaila pa fintu fimbi ifingaba ifisuma lelo ifishikumine ku kumfwikisha kwa mulandu mulelandapo. Lelo nga mwaumfwikisha sana ubufwayo bwa lino isambililo, tamwakominine fye pa fyebo fipeelwe ica kuti mwafilwa no kulundamo ubulondoloshi ubo umusambi engakabila.