Kasambilisha Mukalamba Abombele Abantu Bambi

BUSHE ulatemwa umuntu nga akucitile cisuma?— Abantu bambi na bo balatemwa lintu umuntu abacitile cisuma. Bonse tulatemwa. Kasambilisha Mukalamba alishibe co, kabili lyonse alecitila abantu ifintu. Alandile ati: ‘Nshaishile ku kubombelwa, lelo ku kubombela.’—Mateo 20:28.

E co nga tulefwaya ukuba nga Kasambilisha Mukalamba, cinshi tufwile ukucita?— Tufwile ukubombela bambi. Tufwile ukubacitila ifintu ifisuma. Ca cine ukuti abantu abengi tabacite ci. Na kuba, abantu abengi bafwaya fye ukubabombela. Inshita imo na bakonshi ba kwa Yesu e fyo baleyumfwa. Bonse balefwaya ukuba abakalamba nelyo abacindamisha.

Bushiku bumo Yesu ali pa lwendo na basambi bakwe, abali bakonshi bakwe. Ilyo baingile mu musumba wa Kapernahumu, mupepi na Bemba wa Galili, bonse baingile mu ng’anda. Mulya Yesu abepwishe ati: “Cinshi ico mwali muleipushanya mu nshila?” Baikele fye tondolo pantu mu nshila bali baleipushanya pa wali umukalamba pali bonse.—Marko 9:33, 34.

Yesu alishibe ukuti tacali bwino umusambi wakwe uuli onse ukutontonkanya ukuti e wali umukalamba pali bonse. E co, nga fintu twasambilile mu cipandwa ca kubalilapo, aimike umwana umunono pa kati kabo no kubeba ukuti bafwile ukuba abaicefya nga kalya kaice. Na lyo line tabasambilile. E co ilyo kwashele fye inshiku shinono isha mfwa yakwe, Yesu abasambilishe isambililo ilyo tabali na kulaba. Cinshi acitile?—

Ilyo balelya ica kulya pamo, Yesu aimine pa ca kulya no kufuula umwingila wakwe uwa ku nse. Abuulile itaulo no kukaka mu musana. Lyene abuulile ibeseni no kwitilamo amenshi. Abakonshi bakwe bafwile balepapa fye ifyo ali no kucita. Ilyo baletamba, Yesu apitile muli bonse no kusamba amakasa yabo. Lyene afuutile amenshi ku makasa yabo ne taulo. Tontonkanya pali ci! Ni shani nga e ko wali? Nga wayumfwile shani?—

Abakonshi bakwe tabamwene ukuti cali bwino Kasambilisha Mukalamba ukubabombela muli uyu musango. Balyumfwile nsoni. Na kuba, Petro alikeene ukuti Yesu amubombele uyu mulimo wa pa nshi. Lelo Yesu atile cali icacindama ukuti acite co.

Ilelo tatusamba amakasa ya bambi ilingi. Lelo ici calecitwa lintu Yesu ali pe sonde. Bushe walishiba umulandu?— Mu calo Yesu na bakonshi bakwe baleikala, abantu balefwala indyato ishishalefimba ulukasa lonse. E co ilyo baleenda mu misebo ya lukungu, amakasa yabo yalebutuluka. Cali cintu icisuma ukusamba amakasa yabutulwike aya muntu waisa mu ng’anda ku kutandala.

Lelo uno muku tapali umusambi wa kwa Yesu uwaipeeleshe ukusamba amakasa ya bambi. E co Yesu acitile ci umwine. Pa kucite ci, Yesu asambilishe abakonshi bakwe isambililo lyacindama. Balekabila ukusambilila ili sambililo. Kabili lisambililo ilyo na ifwe lelo tufwile ukusambilila.

Bushe ili sambililo walilishiba?— Ilyo Yesu afwele umwingila wakwe no kubwelela pa ca kulya, alondolwele ukuti: “Bushe, mwaishiba ico nacita kuli mwe? Imwe munjita Kasambilisha kabili Shikulu: cena mulalungika; pantu e fyo ndi. E ico ine, ne Shikulwinwe kabili Kasambilisha wenu, nga musambile amakasa, na imwe mufwile ukusambana amakasa.”—Yohane 13:2-14.

Pano Kasambilisha Mukalamba alangile ukuti alefwaya abakonshi bakwe ukubombelana. Talefwaya baba abaitemwa. Talefwaya baletontonkanya ukuti balicindama sana ica kuti bambi e bafwile ukubabombela. Alefwaya baba abaitemenwa ukubombela bambi.

Bushe ilyo talyali lisambililo lisuma?— Bushe uli no kuba nga Kasambilisha Mukalamba no kubombela abantu bambi?— Bonse kuti twacitila bambi ifintu. Ici cikabasansamusha. Lelo icacilapo ca kuti, cikalenga Yesu na Wishi ukutemwa.

Tacakosa ukubombela abantu bambi. Nga ulelolekesha, ukamona ifintu ifingi ifyo wingacitila bambi. Nomba tontonkanya: Bushe kuli ifyo wingaafwako banoko? Walishiba ukuti balakucitila ifintu ifingi pamo no kucitila aba mu lupwa lwenu. Bushe kuti wabafwa?— Bepushe.

Napamo kuti wapekanya apo ulupwa lwalaliila ica kulya. Nelyo kuti wateula imbale lintu ulupwa lwapwa ukulya. Abana bamo balaya mu kupoosa ifisooso cila bushiku. Te mulandu ne fyo wingacita, ninshi ulebombela bambi, nge fyacitile Yesu.

Bushe walikwata abaice bobe abo wingabombela? Ibukisha, Yesu, Kasambilisha Mukalamba, alebombela na bakonshi bakwe. Pa kubombela abaice bobe ninshi ulepashanya Yesu. Finshi wingabacitila?— Napamo kuti wabasambilisha ukubika bwino ifya kwangasha lintu bapwa ukwangala. Nelyo pambi kuti wabafwikako ifya kufwala. Napamo kuti wabaafwa ukwanshika apa kulaala. Bushe kuti watontonkanya pa cili conse cimbi wingabacitila?— Bakakutemwa pa kubacitila ifi ifintu, filya fine abakonshi ba kwa Yesu bamutemenwe.

Na ku sukulu na ko kuti wabombela abantu bambi. Kuti baba bantu usambilila na bo nelyo bakafundisha obe. Nga umo aponya amabuuku, kuti wacita icisuma nga wamutoolela. Kuti waipeela ukuwamya pa cipampa bakafundisha balemba nelyo ukucitilako bakafundisha obe icintu cimbi. No kwiswilako umuntu iciibi mulimo uusuma.

Limo ukamona ukuti abantu tabatasha pa kubabombela. Bushe uletontonkanya ukuti ici cifwile ukutulesha ukucite cisuma?— Iyo! Abantu abengi tabatashishe Yesu pa milimo yakwe iisuma. Lelo ico tacamuleseshe ukucite cisuma.

E co twilaleka ukubombela bambi. Natwibukishe Kasambilisha Mukalamba, Yesu, no kwesha lyonse ukukonka ica kumwenako cakwe.