Bushe Ubufumu Bwa Kwa Lesa Cinshi? Ifya Kulanga Ukuti Tulebufwaya

BUSHE ipepo Yesu asambilishe abakonshi bakwe walilishiba?— Nga tawalishiba, kuti twalibelengela pamo muli Baibolo, pali Mateo 6:9-13. Ili pepo, ilyo abengi beta ati Ipepo lya We Shifwe, lyakwata na mashiwi ya kuti: “Ubufumu bwenu bwise.” Bushe Ubufumu bwa kwa Lesa walibwishiba?—

Imfumu yaba e kateka wa calo nelyo icifulo. Kabili ubuteko bwakwe bwitwa ati ubufumu. Mu fyalo fimo umukalamba mu buteko etwa ati presidenti. Bushe Kateka wa buteko bwa kwa Lesa etwa ati ani?— Etwa ati Imfumu. E mulandu wine ubuteko bwa kwa Lesa bwitilwa ati Ubufumu.

Bushe walishiba untu Yehova Lesa asalile ukuba Imfumu ya buteko Bwakwe?— Mwana wakwe, Yesu Kristu. Mulandu nshi awamina ukucila kateka uuli onse abantu bengasala?— Pantu Yesu alitemwa sana Wishi, Yehova. E co lyonse acita ifyalungama.

Kale sana ilyo Yesu talafyalwa mu Betlehemu, Baibolo yalandile pa kufyalwa kwakwe no kusosa ukuti ali no kuba Kateka wasalwa uwa kwa Lesa. Natubelenge ci pali Esaya 9:6, 7. Patila: ‘Umwana nafyalilwa kuli ifwe, umwana mwaume napeelwa kuli ifwe; bukateka bukaba pa kubeya kwakwe, ne shina lyakwe akenikwa . . . Cilolo wa mutende. Ku kukula kwa bukateka bwakwe, na ku mutende, takwakabe mpela.’

Bushe walishiba umulandu Kateka wa Bufumu bwa kwa Lesa pano aitilwa ati “Cilolo”?— Uyu cilolo mwana wa mfumu. Kabili Yesu Mwana wa Mfumu Nkalamba, Yehova. Lelo Yehova alibika Yesu ukuba Imfumu ya buteko Bwakwe, ubukateka isonde pa myaka 1,000. (Ukusokolola 20:6) Ilyo Yesu abatishiwe, atendeke “ukubila, no kutila, Lapileni, pantu ubufumu bwa mu muulu nabupalama.”—Mateo 4:17.

Mulandu nshi uletontonkanishisha Yesu alandiile ati Ubufumu nabupalama?— Pantu Imfumu, iyali no kuteka ku muulu, yali pali bene! E mulandu wine Yesu aebele balya bantu ukuti: “Ubufumu bwa kwa Lesa buli mu kati ka imwe.” (Luka 17:21) Bushe te kuti utemwe ukupalama ku Mfumu iyo Yehova asonta ica kuti waikatamo no kuikata?—

E co njebako, mulimo nshi uwacindama Yesu aishile pe sonde mu kucita?— Yesu ayaswike ico cipusho pa kusosa ukuti: “Ndi no kubile mbila nsuma ya bufumu bwa kwa Lesa na mu mishi imbi, pa kuti e co natuminwa.” (Luka 4:43) Yesu alishibe ukuti te kuti ashimikile eka. E co cinshi uletontonkanya acitile?—

Yesu asendele abantu no kubasambilisha ifya kushimikila. Abo abalilepo ukusambilisha bali ni balya 12 asalile ukuba abatumwa. (Mateo 10:5, 7) Lelo bushe Yesu asambilishe fye abatumwa bakwe ukubomba uyu mulimo? Iyo, Baibolo itila Yesu asambilishe na bambi abengi ukushimikila. Mu kupita kwa nshita, atumine abasambi bakwe bambi 70, ukuya babili babili. Kabili finshi basambilishe abantu?— Yesu atile: “Mutile kuli bene, Ubufumu bwa kwa Lesa nabupalama kuli imwe.” (Luka 10:9) Muli iyi nshila abantu basambilile pa lwa buteko ba kwa Lesa.

Kale sana mu Israele, ishamfumu shipya shaleendela pa mwana wa mpunda ukwingila mu musumba ku kumonekela ku bantu. Nomba ici e co Yesu acita ilyo aya ku Yerusalemu umuku wa kulekelesha. Nawishiba, Yesu akaba Kateka wa Bufumu bwa kwa Lesa. Bushe abantu balefwaya abe Imfumu?—

Ilyo aninine pa mwana wa mpunda, abantu abengi mwi bumba batendeka ukwansa amalaya yabo mu musebo pa ntanshi yakwe. Bambi bakontola imisambo ku miti no kubika mu musebo. Pa kucite fi balanga ukuti balefwaya Yesu ukuba Imfumu yabo. Babilikisha ati: “Yalipaalwa Imfumu iileishila mwi shina lya kwa Shikulu!” Lelo te bonse abatemenwe. Na kuba, bashimapepo bamo basosa kuli Yesu ati: ‘Ebeni abasambi benu ukutalala.’—Luka 19:28-40.

Ilyo papite nshiku 5, Yesu bamwikata no kumutwala ku ng’anda ya kwa kateka ku kumonekela kuli wene, Ponti Pilato. Abalwani ba kwa Yesu batila Yesu aitunga ukuba imfumu no kuti alwisha ubuteko bwa ciRoma. E co Pilato aipusha Yesu pali ci. Yesu alanda ukuti taleesha ukupoka ubuteko. Aeba Pilato ati: “Ubufumu bwandi te bwa pano isonde.”—Yohane 18:36.

Lyene Pilato afumina pa nse no kweba abantu ukuti tasangile mulandu kuli Yesu. Lelo aba bantu tabalefwaya Yesu ukuba Imfumu yabo. Tabalefwaya akakulwe. (Yohane 18:37-40) Pa numa ya kulanda na Yesu na kabili, Pilato ashininkisha ukuti Yesu takwete mulandu uuli onse. E co, pa numa ya kutwala Yesu pa nse umuku wa kulekelesha, Pilato atila: “Moneni imfumu yenu!” Lelo abantu babilikisha ati: ‘Mufumyeni apa! Mufumyeni apa! Mwipayeni!’

Pilato aipusha ati: ‘Bushe imfumu yenu e yo njipaye?’ Bashimapepo bakalamba bayasuka ukuti: “Tatukwete mfumu, kano Kaisare.” Citontonkanye! Balya bashimapepo babifi balenga abantu ukwalukila Yesu!—Yohane 19:1-16.

Ilelo cili fye nga fintu cali ilya nshita. Abantu abengi tabafwaya Yesu ukuba Imfumu yabo. Kuti batila balisumina muli Lesa, lelo tabafwaya Lesa nelyo Kristu ukubeba ica kucita. Bafwaya ubuteko bwabo pano isonde.

Nga ifwe? Ilyo twasambilila pa Bufumu bwa kwa Lesa ne fintu fyonse ifisuma ifyo bukacita, ico citulenga ukumfwa shani pali Lesa?— Tulamutemwa, bushe te ifyo?— E co kuti twalanga shani Lesa ukuti twalimutemwa no kuti tulefwaya Ubufumu bwakwe buletuteka?—

Kuti twalanga Lesa ifyo tumfwa pa kukonka ica kumwenako ca kwa Yesu. Kabili cinshi Yesu acitile ku kulanga ukuti alitemwa Yehova?— Yesu alondolwele ati: ‘Ncita pe ifya kumusekesha.’ (Yohane 8:29) Yesu aishile pe sonde ‘ku kucito kufwaya kwa kwa Lesa’ no “kupwisho mulimo wakwe.” (AbaHebere 10:7; Yohane 4:34) Mona ico Yesu acitile ilyo talatendeka umulimo wa kushimikila.

Yesu aile kuli Yohane Kabatisha ku Mumana wa Yordani. Ilyo baingile mu menshi, Yohane aibishe Yesu umupwilapo mu menshi no kumwimya na kabili. Bushe walishiba umulandu Yohane abatishishe Yesu?—

Yesu aebele Yohane ukucite co. Lelo twaishiba shani ukuti Lesa alefwaya Yesu ukubatishiwa?— Twaishibe co pantu ilyo Yesu afumine mu menshi, aumfwile ishiwi lya kwa Lesa ku muulu lyatila: “Ni we Mwana wandi watemwikwa, muli iwe e mo mbekelwa.” Lesa atumine no mupashi wakwe uwa mushilo nge nkunda ukwikila pali Yesu. E co pa kubatishiwa, Yesu alangile ukuti alefwaya ukubombela Yehova ubumi bwakwe bonse, ee, umuyayaya.—Marko 1:9-11.

Nomba ucili ulekula. Lelo cinshi ukacita ku ntanshi?— Bushe ukaba nga Yesu no kubatishiwa?— Ufwile ukumupashanya, pantu Baibolo itila akushilile ‘ica kumwenako ukuti ukonke mu makasa yakwe.’ (1 Petro 2:21) Nga wabatishiwa, ukalalanga ukuti ulefwaya ukutekwa no Bufumu bwa kwa Lesa. Lelo tatufwile ukupelela fye pa kubatishiwa.

Tufwile ukumfwila fyonse Yesu asambilishe. Yesu alandile ati tatufwile ukuba ‘aba pano isonde.’ Bushe nga tulecita ifintu fya mu calo ninshi tulemumfwila? Yesu na batumwa bakwe batalwike ku fintu fya musango yu. (Yohane 17:14) Lelo cinshi bacitile?— Balandile na bantu bambi pa lwa Bufumu bwa kwa Lesa. Uyo wali e mulimo ukalamba mu bumi bwabo. Bushe na ifwe kuti twabomba uyo mulimo?— Ee, kabili tukaubomba nga ca kuti lintu tulepepa ukuti Ubufumu bwa kwa Lesa bwise ifyo fine e fyo tulefwaya.