Icipandwa 27

Mulandu Nshi Mfwaila Ukulacita Ifintu Kwati Nalipwililika?

Bushe ulafulwa nga wakwata amatoni ayanono pa mashindano?

□ Ee

□ Awe

Ilyo bambi bakuseka pa fyo wacicita, bushe umona kwati tapali ifyo wingacita?

□ Ee

□ Awe

Bushe cilakwafya ukukwata ifibusa nelyo ukutwalilila ukumfwana ne fibusa pa mulandu wa kuti tapaba nangu umo uucita ifyo ufwaya?

□ Ee

□ Awe

NGA waswike ukutila ee ku cipusho cimo nelyo ukucilapo ninshi nalimo walikwata ubwafya bwa kufwaya ukulacita ifintu kwati walipwililika. Limbi kuti waipusha ukutila, ‘Nomba bushe mwaliba ububi mu kulacita ifintu bwino sana?’ Kwena, caliba fye bwino ukufwaya ukulacita ifintu bwino sana. Baibolo ilatasha umuntu “uwacenjela mu mulimo wakwe.” (Amapinda 22:29) Nomba umuntu uufwaya fye lyonse ukulacita ifintu bwino sana ne fyo ashingacita, ninshi alikwata ubwafya.

Ku ca kumwenako fye, Jason uuli ne myaka 19, atile: “Mu mwaka nalepwishishamo isukulu, natontonkenye ukuti nga nshakakwate amatoni ayengi pa mashindano, ninshi nshakwata mano ku sukulu. Nalelishako na piano, kabili naletontonkanya ukutila nkalalisha piano kwati fye ni ulya uulisha pa fiila ifikalamba.”

Nga ulefwaisha ukulacita ifintu fimo kwati walipwililika, nalimo te kuti ulepepa bwino Yehova. Tontonkanya pa fyo caleba ku mwaice umo uo bonse balefwaya ukuti balepashanya. Apo bonse e o balebikako amano, nalimo alefilwa no kucita nelyo ukulanda ifintu fimo, pantu conse ico acita no kulanda ninshi e caba ilyashi lya kulandapo. Na kuba, Abena Kristu fye bonse, abaice na bakalamba balanonkelamo mu kuba pamo na ba mibele isuma mu cilonganino. Nomba Umwina Kristu wacaice nga alafwaya ukulacita ifintu ukwabula ukulufyanyamo, kuti capwisha insansa shakwe mu kubombela Lesa. Ifi nga e fyo umwaice ali, ninshi alefwaikwa ukumwafwa. Lelo kuti afilwa ukwebako bambi, pa mulandu wa kutiina ukuti abamucindika nga baishiba tabakatemwe. Nalimo kuti alafwaya fye no kuleka ukulacitako ifintu fimo, ukulatontonkanya ukutila, ‘Apo nafilwa ukucita ifi bwino sana, kanshi cawama fye no kuleka.’

Wilacita Ifintu Kwati Muntu Uwapwililika

Abafwaya ukulacita ifintu kwati balipwililika balaicusha sana pantu bamona kwati takwaba na kulufyanya. Nomba ukutontonkanya kwa musango yu kuibepa fye. Baibolo itila, “bonse babembu kabili balifilwa ukufika pa bukata bwa kwa Lesa.” (Abena Roma 3:23) Pali ino nshita, takwingaba nangu umo uwingaba uwapwililika. Na kuba, ukutontonkanya ukutila kuti wacita fimo ukwabula ukulufyanyapo, cimo fye no kutontonkanya ukuti kuti wapupuka kwati cuni. Nangu wingaicetekela sana ukutila kuti wapupuka, te kuti upupuke!

Bushe kuti wacita shani pa kuti uleke ukulatontonkanya fye pa kulacita ifintu ukwabula ukulufyanyapo? Esha ukucita ifyakonkapo:

Tontonkanyapo na kabili. Bushe ulebombesha sana ukufwaya ukucila bambi? Baibolo itila ukubombesha kwa musango yu, “kuicusha fye.” (Lukala Milandu 4:4, ukulingana na Baibolo ya Diocese of Mbala) Na kuba, bantu fye abakupenda e bacitako ifintu fimo ifya kuti bacila abanabo. Na lyo line na lintu umo acita fimo ukucila bambi, papita fye inshita iinono kwaba na umbi uwacita fimo ifya kuti amucila. Ukubomba bwino cipilibula ukubombesha ukulingana na maka yobe, te kucila pa maka yobe.—Abena Galatia 6:4.

Ulebomba ukulingana na maka yobe. Ifyo ulefwaya ukucita fifwile ukulingana na maka yobe ne fyo waba. Ukufwaya ukucita ificilile pa maka yobe kuti capilibula ukuti tawayishiba bwino we mwine nelyo ukuti uli wa cilumba. Umutumwa Paulo apeele ukufunda kusuma, atile: “Nde-eba imwe bonse ukuti mwilaitunga ukucila pa fyo mwaba.” (Abena Roma 12:3) Kanshi ufwile ukucita ifintu ukulingana na maka yobe. Tontonkanya na kabili pa fyo ufwaya we mwine ukucita. Esha ukubombesha, nomba wienekela ukucita ifintu ukwabula ukulufyanyapo.

Tekanya! Esha ukucitako fimo ifyo ushaishiba, pamo nga ukulisha icilimba ca nsale. Ukwabula no kutwishika, kuti walufyanya imiku iingi. Nga wafilwa ukulisha bwino, wisakamana sana. Baibolo ilanda ukuti kwaliba “ne nshita ya kuseka.” (Lukala Milandu 3:4) Nomba apo naufilwa, tekanya fye wisakamana! Ici kuti cakwafwa ukwishiba ukutila nga ulelufyanya ilyo ulecita fimo ninshi umo mwine e mukusambilila. Kwena calyafya ukusumina ukuti ulalufyanyako mumo mumo. Lelo ulingile ukwesha na maka ukuleka ukutontonkanya pa fingalenga wafupuka no kuilengulula we mwine.

Ico ulingile ukulaibukisha ca kuti Yehova tatwenekela ukuba abapwililika mu fyo tucita; afwaya fye tuleba aba cishinka kuli ena. (1 Abena Korinti 4:2) Nga ule-esha na maka yobe ukuba uwa cishinka, ukwabula ukutwishika ukaba ne nsansa sana, nangu ca kutila tawapwililika.

ILEMBO

“Pano isonde tapaba umuntu umulungami uucita icisuma lyonse kabili uushibembuka.”—Lukala Milandu 7:20.

IFYO WINGACITA NI FI

Tontonkanya pa mulimo umo uo wafilwa ukubomba pa mulandu wa kuti ulatwishika nga kuti waubomba bwino sana ukwabula ukulufyanyapo. Lyena imika ubushiku ubo ukabomba no kupwisha.

NAWISHIBA . . . ?

Yehova alipwililika, lelo tenekela fwe bantunse abashapwililika ukulacita ifintu kwati twalipwililika kabili tatwenekela ukulacita ifyo tushingaba na maka ya kucita.

IFYO NDEFWAYA UKUCITA!

Nga natampa ukuilengulula sana, ifyo nkacita ni fi

Nga natampa ukulengulula sana bambi, ifyo nkacita ni fi

Ifyo ningatemwa ukwipusha abafyashi bandi pali ili lyashi ni fi

ULETIPO SHANI?

● Bushe kuli fimo ifyo uletontonkanya ukucita ificilile sana pa maka yobe?

● Malembo nshi aya mu Baibolo ayalondolola ukuti pali ino nshita Yehova Lesa tenekela ababomfi bakwe ukuba abapwililika mu fyo balecita?

● Mulandu nshi nalimo bamo bashingatemenwa ukuba pamo nobe nga ca kuti ulefwaya ukuba uwapwililika mu fyo ulecita?

● Ukacita shani ilyo ukafilwa ukucita fimo bwino?

[Amashiwi pe bula 226]

“Ukubomba bwino sana no kufwaya ukuba uwapwililika fyalipusana; pantu ukubomba bwino cipilibula ukulinga, lelo ukufwaya ukuba uwapwililika kwena kucishamo.”—E fyalandile Megan

[Akabokoshi pe bula 228]

Ukufwaya Ukuba Uwapwililika mu fyo Ucita Nelyo Ukufwaya Ukuba ne Fibusa

Bushe taufwaya ukuba na bantu pa mulandu fye wa kutila balafilwa ukucita ifyo ufwaya? Nelyo bushe abantu ababa ne mibele isuma balafilwa ukuba ifibusa fyobe pantu te kuti bafikepo ukucita ifyo ufwaya? Baibolo itweba ukuti: “Wicilamo ukuba umulungami, nangu ukucilamo ukuicita uwa mano. Cinshi uleyonawila?” (Lukala Milandu 7:16) Inshila imo iyo uufwaya ukucita ifintu kwati alipwililika ayonawilamo umwine, kulatalusha abantu abalefwaya ukupalama kuli ena. Amber umukashana atile, “Takwaba umuntu uwatemwa ukuba pamo na bengamukalifya, kabili nalimonapo uko pa milandu fye iinono, abantu abasuma bataluka umuntu uufwaya ukulacita ifintu kwati alipwililika.”

[Icikope pe bula 229]

Ukufwaya ukuba uwapwililika kuicusha fye, ciimo no kufwaya ukupupuka