Abo Wingapashanya—Lidia

Nangu ca kuti tapaakokwele sana apo Lidia atendekele ubuKristu, ali-itemenwe umwine ukupokelela Paulo na banankwe mu ng’anda mu mwakwe. (Imilimo 16:14, 15) E calengele ukuti akwate ne shuko lishaiwaima ilya kwampana pamo na aba basambi. Ilyo Paulo na Sila bafumine mu cifungo, ni kwi baile? Ukwabula no kwikata ku cani, baile fye ku ng’anda kuli Lidia!—Imilimo 16:40.

Bushe na iwe kuti waitendekelako we mwine ukwishibana na bantu bambi nga filya Lidia acitile? Kuti wacita shani? Kuti watampa fye panono panono. Ule-esha ukulanda no muntu umo cila nshita. Nalimo kuti wapanga ukuti wakulalanda ku muntu umo lyonse nga waya ku kulongana. Ulemwentulako no kumwentula. Nga taukwete ifya kulanda, bepusheko ifipusho nangu kuti wabashimikilako fimo pa fyo waba. Ulekutikisha. Umuye nshiku nalimo kuti walakwata ne lyashi lya kulanda na bo. Abantu balomfwa bwino nga baumfwa ukuti ifyo ulelanda filefuma mu mutima obe kabili ulelanda na bo cikuuku cikuuku. (Amapinda 16:24) Pa mulandu wa kuti Lidia aali wa cikuuku kabili alepokelela abeni, alikwete sana ifibusa ifisuma. Nga wamupashanya, na iwe kuti wakwata ifibusa ifisuma!