Abo Wingapanshanya—Asafi

Asafi alikwete ubwafya. Alemona uko abantu balepula mu mafunde ya kwa Lesa lelo tapaali ne calebacitikila! E calengele ukuti Asafi aletwishika nampo nga cisuma ukulabombela Lesa. Atile: “Kanshi naicusha fye pa kusangulula umutima wandi kabili ca fye ukusamba iminwe yandi muli bukaele.” Lelo ilyo atontonkenyepo sana, Asafi alyalwile amano. Asangile ukuti nangu ababifi baleikala bwino tacakabelelele. Finshi Asafi acitile? Aebele Yehova mu lwimbo ati: “Pano isonde tapali uo natemwa nge fyo namutemwa.”—Amalumbo 73:3, 13, 16, 25, 27.

Nalimo na iwe limo limo ulatwishika nampo nga cisuma ukulakonka amafunde ya kwa Lesa. Lelo ulingile ukupashanya Asafi, kabili wilamona fye ku nse. Tontonkanya pa fyo abantu abasuula amafunde ya kwa Yehova bekala. Bushe cishinka balekala umutende? Bushe balisanga inshila ya kubelamo ne nsansa iyo abantu ba cishinka kuli Lesa bashaishiba? Na iwe nga watontonkanyapo sana, ufwile ukalanda amashiwi ya kwa Asafi ayatila: “Ukupalama kuli Lesa kusuma kuli ine.”—Amalumbo 73:28.