ISAMBILILO 23

Bushe Ifitabo Fyesu na Magazini Filembwa Shani no Kupilibulwa?

Munyinefwe alebomba mu Departimenti iilemba impapulo, ku U.S.A. — Dipartimenti iilemba impapulo, U.S.A.

Ibumba lya bakapilibula mu South Korea — South Korea

Umwaume umwina Armenia naikata icitabo ico ba Nte bapilibula — Armenia

Akakashana ka ku Burundi nakekata icitabo icapilibulwa ne Nte sha kwa Yehova — Burundi

Umwanakashi mu Sri Lanka naikata magazini iyapilibulwa ne Nte sha kwa Yehova — Sri Lanka

Pa kuti tuleshimikila bwino “imbila nsuma” ku “nko shonse na ku mitundu yonse na ku ba ndimi shonse na ku bantu bonse,” tulapilibula impapulo mu ndimi ukucila pali 750. (Ukusokolola 14:6) Tubomba shani uyu mulimo uukalamba? Twalikwata abalemba ifyebo ifiba mu mpapulo shesu ababa mu fyalo fyalekanalekana, e lyo na bakapilibula abaipeelesha. Aba bonse ni Nte sha kwa Yehova.

Ifyebo fyonse bafilemba mu ciNgeleshi. Ibumba Litungulula e lyangalila Dipartimenti iilemba ifiba mu fitabo fyesu, ne yi dipartimenti yaba pa maofeshi yakalamba ku New York. Iyi dipartimenti e yeba bakalemba ababa pa maofeshi yakalamba ku New York e lyo na baba mu fyalo fimbi ifya kulemba. Ukukwata bakalemba mu fyalo fyalekanalekana, kulalenga tulelemba ifyebo ifikuma abantu ba mu fyalo fyalekanalekana, ne ci, cilenga ifitabo fyesu fileafwa abantu bonse.

Balatuma ifyebo kuli bakapilibula. Nga balemba ifyebo, kulaba abapitulukamo no kumona ukuti nafilinga, na pa numa balafituma kuli bakapilibula mu fyalo fyalekanalekana ukubomfya kompyuta. Ilyo bapilibula ifyebo, balabelengamo mpaka fyaumfwika bwino bwino. Basala “amashiwi ayalungama aya cine” ayalondolola bwino ifyo iciNgeleshi cilelanda.—Lukala Milandu 12:10.

Kompyuta ilatwafwa ukubomba bwangu. Kompyuta te kuti ilembe nelyo ukupilibula ifyebo, bantu bacita ifyo. Na lyo line, iyi milimo ilenda bwangu nga balebomfya kompyuta na madikishonari yabapo e lyo na maprogramu yambi ayabafwa ukufwailisha ifyebo. Inte sha kwa Yehova balipanga programu beta ati, Multilanguage Electronic Publishing System (MEPS), iyo babomfya ku fitundu ifingi sana pa kupekanya ifyebo fipilibwilwe no kubikamo ifikope pa kuti fiyepulintwa.

Mulandu nshi tupilibwila ifitabo na magazini na mu fitundu ifyo abantu fye abanono balanda? Ni co Yehova afwaya “abantu balekanalekana bakapusuke no kwishiba bwino bwino icine.”—1 Timote 2:3, 4.

Bushe ifitabo fyesu na magazini filembwa shani?
Mulandu nshi tupilibwila ifitabo fyesu na magazini mu fitundu ifingi?