Yesu Aali Uwa Cumfwila

Bushe cilakwangukila ukumfwila abafyashi bobe?— Inshita shimo cilafya. Bushe walishiba ukuti Yesu aleumfwila Yehova na bafyashi bakwe?— Nga wakonka ifyo Yesu alecita, kuti na iwe walaumfwila abafyashi bobe nangu ca kuti calyafya. Leka tusambilile na fimbi pali Yesu.

Ilyo Yesu ashilaisa pano calo, aleikala na Wishi, Yehova, ku muulu. Lelo alikwete abafyashi na pano calo. Amashina yabo bali ni Yosefe na Maria. Bushe walishiba ifyo Yesu aishilefyalwa pano calo?—

Yehova afumishe ubumi bwa kwa Yesu ku muulu no kububika mwi fumo lya kwa Maria pa kutila Yesu afyalwe no kwikala pano calo. Ici cali cipesha amano! Yesu alekula mwi fumo lya kwa Maria nga filya fine ciba ku bana bambi. Ilyo papitile imyeshi 9, Yesu alifyelwe. Ifi e fyo cali pa kuti Yosefe na Maria babe abafyashi ba kwa Yesu.

Ilyo Yesu ali fye ne myaka 12, alicitile icintu icalangile ukuti alitemenwe sana Wishi, Yehova. Ici cacitike lintu Yesu no lupwa lwakwe baile ku Yerusalemu ku Ca Kucilila. Ilyo balebwelela ku ng’anda, Yosefe na Maria tabaishibe ukwali Yesu. Bushe nawishiba ukwali Yesu?—

Ilyo line Yosefe na Maria balibwelelemo ku Yerusalemu ku kufwaya Yesu. Balisakamikwe sana pantu tabamusangile. Ilyo papitile inshiku shitatu, bamusangile mwi tempele. Bushe nawishiba ico Yesu abelele mwi tempele?— Pantu kwi tempele e ko ali no kusambilila pali Wishi, Yehova. Alitemenwe Yehova kabili alefwaya ukusambilila ifyo Yehova afwaya. Ilyo akulile, Yesu aleumfwila Yehova nangu ca kuti limo caleyafya kabili alecula pa kucita ifi. Inga Yosefe na Maria, bushe nabo alebomfwila?— Baibolo ilanda ukuti alebomfwila.

Finshi wingasambilila kuli Yesu?— Ulingile ukulaumfwila abafyashi nangu ca kuti limo cilafya. Bushe na iwe wakulaumfwila abafyashi bobe?—