Yesu Acita Icipesha Amano Ca Bubili Ninshi Ali Mu Kana

Pa numa ya kwikala inshiku shibili mu Samaria, Yesu alibwelelemo ku mwabo. Alibilile sana imbila nsuma mu Yudea, lelo ilyo abwelelemo ku Galili, taile ku kutuusha. Atendeke ukubila sana imbila nsuma mu calo umo akuliile. Tale-enekela abantu ukumupokelela bwino, pantu nga fintu alandile, “kasesema tabamucindika ku mwabo.” (Yohane 4:44) Mu nshita ya kuba na Yesu, abasambi bakwe balibwelelemo ku mayanda yabo, kuli balupwa wabo na ku kubomba incito balebomba kale.

Finshi alelandapo ilyo alebila? Aleti: “Ubufumu bwa kwa Lesa nabupalama. Lapileni, no kutetekela imbila nsuma.” (Marko 1:15) Bushe abantu balikutike nelyo iyo? Abena Galili abengi balikutike ku mbila alebila kabili balimucindike. Imbila alebila te yalengele fye ukuti basumine, lelo abena Galili bamo e ko bali na ku Ca Kucilila icali mu Yerusalemu mu myeshi ya ku numa kabili balimwene ifipesha amano ifingi ifyo Yesu acitile.—Yohane 2:23.

Yesu alibilile sana na mu Galili. Ni kwi atendekeele? Afwile atendekeele ku Kana uko asangwile amenshi yaba umwangashi pa mutebeto wa bwinga. Ilyo aile kulya pa muku walenga bubili, Yesu bamwebele ukuti kalume nalwala sana ica kuti ali mupepi no kufwa. Uyu kalume ali mwana wa kwa cilolo wa mu buteko bwa kwa Herode Antipa, imfumu iyaipeye Yohane Kabatisha. Ilyo uyu cilolo aumfwile ukuti Yesu nafuma ku Yudea no kuya ku Kana, afumine ku Kapernahumu uko aleikala, aya ku Kana ukwali Yesu. Uyu cilolo uwali no bulanda apaapeete Yesu ati: “Mwe Shikulu, tuleyeni ilyo umwana wandi ashilafwa.”—Yohane 4:49.

Ifyo Yesu ayaswike uyu cilolo fyalimupapwishe. Amwebele ati: “Kabiye; umwana obe napola.” (Yohane 4:50) Cilolo wa kwa Herode alicetekele ifyo Yesu amwebele kabili alibwelelemo ku mwabo. Ilyo ali mu nshila, abasha bakwe balimukumenye kabili bamwebele ilyashi ilisuma. Bamwebele abati umwana obe napola! Apo alefwaya ukwishiba bwino bwino ilyo apolele, alibepwishe ati: ‘Ni nshita nshi acipola?’

Bamwaswike abati: “Impepo yamulekele mailo pe awala lyalenga 7.”—Yohane 4:52.

Cilolo alibukishe ukuti pe awala lyalenga 7 e po Yesu amwebele ati, “Umwana obe napola.” Ilyo umwana apolele, uyu cilolo uwali umukankaala sana, uwakwete na basha, aishileba umusambi wa kwa Kristu pamo na ba mu ng’anda yakwe bonse.

Yesu acitile ifipesha amano fibili mu Kaana. Asangwile amenshi yaba umwangashi no kundapa kalume uwali ukutali, nalimo amakilomita 26 ukufuma uko Yesu aali. Ifi te fipesha amano fyeka fye ifyo Yesu acitile. Na lyo line, ukuposha kalume mu cisungusho kwalicindeme sana, pantu kwalengele abantu baishiba ukuti Yesu nabwela mu Galili. Ifi fyonse fyalangile ukuti Yesu ali ni kasesema wa kwa Lesa, lelo bushe uyu ‘kasesema ali no kucindikwa ku mwabo’?

Ici icipusho calyaswikwe ilyo abwelelemo ku mwabo ku Nasarete. Finshi fyacitike kulya?