Yesu Abuusha Lasaro

Ilyo Yesu amonene na Marita e lyo na Maria mupepi na ku Betani, baile ku nshiishi ya kwa Lasaro. Iyi inshiishi yali mu lucengo e lyo pa mwinshi baiselepo ilibwe. Yesu atile: “Fumyenipo ilibwe.” Apo Marita taishibe ico Yesu alefwaya ukucita, amwebele ati: “Mwe Shikulu, ino nshita alenunka, pantu napapita inshiku shine.” Lelo Yesu amwebele ati: “Bushe nshikwebele ukuti nga wasumina, ulemona ubukata bwa kwa Lesa?”—Yohane 11:39, 40.

E ico balifumishepo ilibwe. Lyena Yesu ainwine amenso mu muulu kabili apepele ati: “Tata, ndemutootela ukuti mwang’umfwa. Ca cine, nalishiba ukuti lyonse mulang’umfwa; lelo nalanda ifi pa mulandu wa bantu bali pano, pa kuti basumine ukuti ni mwe mwantumine.” Filya Yesu apepele pa cintubwingi calengele abantu baishiba ukuti Lesa e wamupeele amaka ya kubuusha Lasaro. Awe abilikishe ishiwi ilikalamba ati: “We Lasaro, fuma!” Na Lasaro alifumine ku nse, ninshi napombwa insalu ku makasa na ku maboko e lyo na ku menso. Lyena Yesu abebele ati: “Mukakuleni, mulekeni aleya.”—Yohane 11:41-44.

AbaYuda abengi abaile mu kusansamusha Maria na Marita abamweneko ici icipesha amano, balitetekele Yesu. Lelo bambi baile ku baFarise no kubeba ifyo Yesu acitile. AbaFarise ne ntungulushi sha bashimapepo abaali mu cilye cikalamba ica baYuda, ica Sanhedrini, balitekele icilye. Muli ici cilye mwali na Kayafa, shimapepo mukalamba. Bamo batendeke ukulanda abati: “Tulecita shani, pantu uyu muntu alecita ifipesha amano ifingi? Nga twamuleka ifi fine, bonse bakamutetekela, na bena Roma bakesa no kutupoka itempele no luko lwesu.” (Yohane 11:47, 48) Nangu ca kutila balyumfwile ku bamweneko ukutila Yesu “alecita ifipesha amano ifingi,” aba bantu tabasekelele pa fyo Lesa alecita ukupitila muli Yesu. Ifyo babikileko sana amano, fifulo no butungulushi ubo bapeelwe.

AbaSaduke balyumfwile sana insoni ilyo Lasaro abuushiwe pantu tabacetekeele mu kubuuka. Kayafa, uwali umuSaduke asosele ati: “Tamwishibe nangu cimo, kabili tamuletontonkanya ukutila kuti camuwamina umuntu umo nga afwila abantu ukucila uluko lonse ukonaulwa.”—Yohane 11:49, 50; Imilimo 5:17; 23:8.

Apo Kayafa ali ni shimapepo mukalamba, Lesa e walengele alande aya mashiwi, talandile ici “umwine eka.” Kayafa aloseshe mu kuti, Yesu alingile ukwipaiwa pa kuti tatwalilile ukucita ifingalenga abantu basuula bashimapepo abaYuda. Lelo amashiwi ya kusesema ayo Kayafa alandile yalolele na mu kuti Yesu tali no kufwila fye abaYuda lelo ali no kufwila na ‘bana ba kwa Lesa abasalangene.’—Yohane 11:51, 52.

Ifyo Kayafa alandile fyalengele aba mu cilye ca Sanhedrini basuminishanye ukwipaya Yesu. Bushe nalimo Nikodemo, uwali mu cilye ca Sanhedrini alisokeleko Yesu ukuti aba bantu balepanga ukumwipaya? Tatwaishiba nga alimusokele nelyo iyo. Na lyo line, Yesu alifumine muli uyu mushi uwali mupepi na Yerusalemu no kuya ku cifulo cimbi. E ico tabamwipeye pantu inshita ya kuti afwe yali tailafika.