Ukutungilila Umulimo wa Bufumu mu Calo Cenu E lyo na mwi Sonde Lyonse

PA KUFIKILISHA ukusesema kwa kwa Yesu uko alandile pa nshiku sha kulekelesha, Inte sha kwa Yehova balabila imbila nsuma ukufika “na ku mpela ya pano isonde.” (Imil. 1:8; Mat. 24:14) Pa kuti balebila imbila nsuma, balaitemenwa ukubomfya inshita na maka yabo. Apo balicetekela ukuti Yehova alafwa ababombela pamo nankwe, balatwalilila ukubika ifya Bufumu intanshi. (Mat. 6:25-34; 1 Kor. 3:5-9) Ififuma mu mulimo babomba filanga fye apabuuta tuutu ukuti Yehova alabapaala pa fyo babombesha.

UKUFUMA INDALAMA TUBOMFYA KU MULIMO WA BUFUMU UWA MWI SONDE LYONSE

² Abantu nga bamona ifyo tubila imbila nsuma, baishiba no kuti tupeela fye abantu amaBaibolo ne mpapulo ishilanda pali Baibolo ukwabula ukubalipilisha, bamo balepusha ukuti: “Bushe mufumya kwi indalama mubomfya apo tamushitisha impapulo shenu?” Ca cine, indalama shilakabilwa pa kupulinta no kupanga amaBaibolo ne mpapulo ishilanda pali Baibolo. Tulakabila indalama pa kukuula e lyo no kuwamya amaofeshi ya Nte sha kwa Yehova apabombela abapulinta impapulo, abangalila umulimo wa kushimikila e lyo na babomba imilimo imbi iitungilila umulimo wa kubila imbila nsuma. Na kabili, bakangalila ba muputule, bamishonari, bapainiya baibela, na bambi ababa mu mulimo wa nshita yonse uwaibela balabapeelako indalama ne fintu fimbi ifyo bakabila ilyo balebomba umulimo wa Bufumu. Kanshi indalama ishibomfiwa pa kuti fye umulimo wa kubila imbila nsuma ulebombwa mu calo cenu na mwi sonde fye lyonse, shingi nga nshi. Nomba bushe ishi indalama shifuma kwi?

³ Abengi abatemwa umulimo uo Inte sha kwa Yehova babomba uwa kusambilisha abantu Baibolo, balaitemenwa ukupeelako indalama ku kutungilila umulimo wa mwi sonde lyonse. Lelo abatungilila sana uyu mulimo ni Nte sha kwa Yehova abene. Bamo balatuma umusangulo kwi ofeshi lya musambo mu calo cabo. Ifi bacita bapashanya ababomfi ba kwa Lesa aba ku kale abatungilile umulimo wa kukuula icikuulwa ca kupepelapo Yehova. (Ukufu. 35:20-29; 1 Imila. 29:9) Bamo balalemba ukuti nga bafwa, ing’anda yabo, ifikuulwa nelyo impanga bakwata bakapeele iofeshi lya musambo. Imisangulo imbi ifuma ku ba bwananyina, ku filonganino na ku miputule, kabili ilingi line iyi misangulo iba fye iinono. Iyi misangulo yonse nga baibika pamo, eyo babomfya ku kutungilila umulimo wa Bufumu.

⁴ Inte sha kwa Yehova balishiba ukuti cisuma nga nshi ukubomfya indalama shabo ne fintu fimbi ifyo bakwata ku kutwala umulimo wa kubila imbila nsuma pa ntanshi. Nangu fye ni Yesu na basambi bakwe balikwete akabokoshi ka ndalama umo balesungila indalama isho balebomfya. (Yoh. 13:29) Baibolo yalilanda na pa banakashi bamo abaleafwilisha Yesu na basambi bakwe. (Marko 15:40, 41; Luka 8:3) Umutumwa Paulo aletasha pa fya bupe balemupeela ku ba bwananyina abalefwaisha ukuti umulimo wa kubila imbila nsuma ulelunduluka, na balefwaya ukumutungilila pa kuti atwalilile ukubomba uyu mulimo. (Fil. 4:14-16; 1 Tes. 2:9) Filya fine ababomfi ba kwa Lesa aba ku kale balecita e fyo ne Nte sha kwa Yehova bacita, baliba abacincila mu mulimo wa kwa Lesa kabili ni bakapekape. Ukucita ifi kulenga abantu abafwaya ukusambilila icine bapokelela “amenshi ya mweo aya bupe fye.”—Ukus. 22:17.

UKUFUMA INDALAMA ICILONGANINO CENU CIBOMFYA

⁵ Indalama isho icilonganino cenu cibomfya nasho shifuma ku misangulo ya kuitemenwa. Takuba ukusonkesha indalama, ukupimina cila muntu indalama afwile ukusangula, kabili takuba ukulombelesha indalama. Pa fifulo fya kulonganinapo palaba utubokoshi twa misangulo umo umuntu uulefwaya ukupeela ubupe engabika indalama ukulingana na “umo apangile mu mutima wakwe.”—2 Kor. 9:7.

⁶ Indalama isho tusangula shibomba maka maka ku kulipila fimo no kushitamo ififwaikwa pa kuti Ing’anda ya Bufumu ilemoneka bwino. Baeluda nalimo kuti bapingulapo ukutuma indalama shimo kwi ofeshi lya musambo ilya Nte sha kwa Yehova mu calo cenu pa kuti bakashibomfye ku kulundulula umulimo wa mwi sonde lyonse. Lelo ilyo bashilatuma ishi ndalama balingile ukusuminishanya ne cilonganino. Ukucita ifi kulenga ifilonganino ifingi filesangwilako lyonse ku mulimo wa mwi sonde lyonse. Nga ca kuti bonse mu cilonganino balesangula lyonse, te kuti balebilisha lyonse ukuti indalama shilefwaikwa.

UKUSUNGA IMISANGULO

⁷ Pa numa ya kulongana, bamunyinefwe babili balafumya indalama mu tubokoshi twa misangulo, kabili balashipenda no kushilemba. (2 Isha. 12:9, 10; 2 Kor. 8:20) Baeluda balapekanya ifyo isho ndalama shingasungwa bwino mpaka ilyo bakashibomfya pa cilonganino nelyo ilyo bakashituma kwi ofeshi lya musambo. Cila mweshi munyinefwe uubombela ku ndalama sha cilonganino alalemba lipoti ya ndalama iya cila mweshi iyo babelengela icilonganino, kabili lyonse pa numa ya myeshi itatu kampanya we bumba lya baeluda alapekanya ukuti kube ukupituluka mu fyalembwa fya ndalama sha cilonganino.

UKUFUMA INDALAMA TUBOMFYA PA KULONGANA KWA MUPUTULE

⁸ Ba Nte aba mu filonganino ifyaba mu muputule e basangula indalama isho babomfya pa kulongana kwa muputule, nelyo isho umuputule ubomfya ku fintu fimbi. Pali uku kulongana palaba utubokoshi twa misangulo umo abalefwaya ukupeela ubupe babika indalama. Na kabili pa kuti umuputule ukwate indalama sha kubomfya ku filekabilwa, ifilonganino filasangula indalama na lintu kushili ukulongana kwa muputule.

⁹ Ilingi line umuputule ufwile ukukwata indalama ishingalinga ukushitamo no kulipila fyonse ifilefwaikwa pa kulongana, e lyo nga kwashala shimo balashituma ku mulimo wa mwi sonde lyonse. Lelo nga ca kuti indalama isho umuputule ukwete shinono ica kuti te kuti shikumane kuli fyonse ifilefwaikwa pa kulongana nelyo pa kulongana ku kakonkapo, pamo nga indalama sha kusonkela apa kulonganina, kangalila wa muputule kuti aeba ifilonganino ukusangula indalama ishilefwaikwa. Baeluda mu cilonganino cimo na cimo balalanshanya no kumona indalama icilonganino cabo cingasangwilako. Lyena baeluda bakasuminishanya ne cilonganino indalama balasangwilako ku kulongana kwa muputule.

¹⁰ Nga ca kuti kuli indalama ishilefwaikwa isho baeluda ba mu muputule balingile ukulanshanyapo, kufwile ukuba ukukumana kwa baeluda ababa mu muputule pa bushiku bwa kulongana kwa muputule. Nga ca kuti baeluda balefwaya ukubomfya indalama ku fintu fimbi ukucila pa fyo bashibomfya lyonse, bafwile ukusuminishanya. Lyonse ilyo balefwaya ukubomfya indalama kuli fimbi bafwile ukusuminishanya no kulemba icipendo ca ndalama, bafwile no kweba baeluda bonse pa kuti basuminisheko.

¹¹ Kulaba ukupekanya ukupituluka mu maakaunti ya muputule.

UKUSAKAMANA ABAPIINA

¹² Cimo ico Yesu na basambi bakwe bakwatile akabokoshi ka ndalama, kwafwilishako abapiina. (Marko 14:3-5; Yoh. 13:29) Uyu mulimo wa kwafwa abapiina walitwalilila na muno nshiku pantu Yesu atile: “Abapiina mwaba na bo lyonse.” (Marko 14:7) Bushe Inte sha kwa Yehova muno nshiku bafwilisha shani abapiina?

¹³ Inshita shimo, Abena Kristu abakalamba, abalwalilila nelyo abakwata amafya yambi ayakalamba balakabila ukubafwilisha mu mikalile yabo. Kanshi balupwa e lyo na bantu bambi abeshibe pali ubo bwafya kuti babafwilishako mu fyo balekabila. Ifi fine e fyo no mutumwa Yohane alandile, atile: “Onse uukwete ifikabilwa mu mikalile ya pano calo, nga amona munyina nabulisha, lelo akaana ukumulanga inkumbu, bushe ninshi ukutemwa Lesa kwaikala shani muli uyu muntu? Mwe twana, twitemwa fye ku mashiwi nangu ku lulimi, lelo tutemwane mu milimo na mu cine.” (1 Yoh. 3:17, 18; 2 Tes. 3:6-12) Kanshi Abena Kristu ba cine bafwile no kulasakamana Abena Kristu banabo abakabila ukubafwa mu mikalile yabo.—Yako. 1:27; 2:14-17.

¹⁴ Muli kalata ya kubalilapo iyo umutumwa Paulo alembeele Timote, alondolwele ifyo bengacita pa kwafwa abalingile ukupokelela ubwafwilisho. Kuti mwabelenga ifyo alandile pali 1 Timote 5:3-21. Umwina Kristu onse afwile ukulasakamana aba mu ng’anda yakwe. Abalingile ukwafwa abakalamba nelyo abalwalilila, bana, abeshikulu nelyo balupwa lwabo bambi. Limo ubuteko nelyo utubungwe utwafwa abalanda tulaafwa abalekabila ubwafwilisho, kanshi balupwa nelyo abantu bambi kuti ba-afwa abalekabila ubwafwilisho ukuyalembesha. Limo kuti kwaba fimo ifingalenga icilonganino cala-afwilisha bamunyinefwe na bankashi ababombela Yehova ne cishinka pa myaka iingi nga ca kuti balekabila ubwafwilisho. Nga ca kuti takuli balupwa abengabafwa e lyo no buteko tabulebafwa, ibumba lya baeluda kuti lyalanshanya ifyo bengacita pa kubafwa. Abena Kristu bamona ukuti cisuma sana ukupeelako bambi ifyo bakabila mu mikalile.

¹⁵ Fimo ifilenga bamunyinefwe na bankashi abengi balekabila ubwafwilisho mu mikalile ni nkondo, ukubacusha, ifinkukuma, imfula ukulokesha, ifipowe, nelyo amasanso yambi ayakalamba ayacitika muli shino nshiku shayafya nga nshi. (Mat. 24:7-9) Inshita shimo ifilonganino ifyaba ku ncende ukuli aya amafya te kuti fikwate nangu fimo ifya kupeela aba bwananyina, e ico Ibumba Litungulula lilapekanya ukuti aba bwananyina mu ncende shimbi bafwilishe Abena Kristu banabo abali mu bwafya. Ifi fine e fyo na Bena Kristu ku Asia Minor bacitile, balitumine ifya kulya ku ba bwananyina mu Yudea ilyo kwali icipowe. (1 Kor. 16:1-4; 2 Kor. 9:1-5) Nga tulebapashanya, ninshi twalitemwa aba bwananyina kabili ninshi tulelanga ukuti tuli basambi ba cine cine aba kwa Yesu Kristu.—Yoh. 13:35.

UKUPEELA IMPAPULO

¹⁶ Baibolo e lyo ne mpapulo ishilanda pali Baibolo e shilenga ukuti umulimo wa kubila pa Bufumu ulelunduluka. Ilingi line baeluda balasala umubomfi utumikila uwa kubombela ku mpapulo. Bamunyinefwe ababombela ku mpapulo balibika sana amano ku mulimo babomba. Balalemba no kusunga ifyalembwa fya mpapulo pa kuti pa cilonganino paleba impapulo shalinga isha kubomfya.

¹⁷ Apo tuli Bena Kristu abaipeela, twalishiba ukuti inshita yesu, amaka na mano twakwata, imilimo twacenjelamo e lyo ne fyuma twakwata, ukubikako fye no bumi bwesu, bupe ubo Lesa atupeela kabili afwaya ukuti tulefibomfya mu mulimo wakwe. (Luka 17:10; 1 Kor. 4:7) Nga tulebomfya bwino ifyo twakwata, tukalanga ifyo twatemwa Yehova. Tulafwaisha ukubomfya ifyuma fyesu ku kucindika Yehova pantu twalishiba ukuti alasekelela pali fyonse ifyo tumupeela no mweo onse. (Amapi. 3:9; Marko 14:3-9; Luka 21:1-4; Kol. 3:23, 24) Yesu atile: “Mwapeelwe fye ubupe, na imwe mulepeela fye.” (Mat. 10:8) Nga tulebombela Yehova kabili tulebomfya ne fyo twakwata mu mulimo wakwe, tulaba ne nsansa nga nshi.—Imil. 20:35.