Abantu 8 E Bapuswike no Kwingila mu Calo Icipya

Noa no lupwa lwakwe balingiile mu cibwato pamo ne nama. Yehova alisele iciibi ne mfula yalitendeke ukuloka. Imfula yalilokele sana ica kuti icibwato calitendeke ukweleela. Imfula yaleloka fye mpaka mu calo monse mwaba fye amenshi. Abantu abashaingile mu cibwato balifwile. Lelo Noa no lupwa lwakwe tabafwile pantu bali mu cibwato. Ala balitemenwe pantu balicitile ifyo Yehova abebele!

Imfula yalokele pa nshiku 40 akasuba no bushiku no kuleka yaleka. Panono panono amenshi yaile yalepwa mpaka icibwato caikala pa mpili. Lelo amenshi tayapwile yonse pa calo, kanshi Noa no lupwa lwakwe tabafumine mu cibwato ilyo line.

Panono panono amenshi yasukile yapwa. Noa no lupwa lwakwe baikele mu cibwato ukucila pa mwaka umo. Lyena Yehova abebele ukutila kuti bafuma mu cibwato no kwikala mu calo icali kwati calo icipya. Balitashishe sana Yehova pa fyo abapuswishe, kabili balituulile ilambo kuli Yehova pa kulanga ukuti balitashishe.

Yehova alitemenwe ilambo bamupeele. Abalaile ukuti takonaule na kabili ifintu mu calo ku lyeshi. Alibikileko no mukolamfula pa kulanga ukuti akacita ifyo alaile. Bushe waliumonapo umukolamfula?

Lyena Yehova aebele Noa no lupwa lwakwe ukuti bakwate abana pa kuti mu calo conse mukabe abantu.