Ulupungu lwa Babele

Pa numa ye Lyeshi, abana ba kwa Noa balikwete abana abengi. Indupwa shabo shalikulile, kabili shatendeke ukwikala mu ncende ishalekanalekana pano calo. Ifi fine e fyo Yehova abebele.

Lelo kwali bamo abakeene ukumfwila Yehova. Balandile abati: ‘Natukuule umusumba no kwikala pano pene. Twalakuula ulupungu ulutali ica kuti lukafike ku muulu. Nga twacita ifi tukalumbuka.’

Yehova tatemenwe ifyo balya bantu balecita, e ico alibaleseshe. Bushe walishiba ifyo acitile pa kubalesha? Alifulungenye ululimi balelanda kabili batendeke ukulanda indimi ishapusanapusana. Ici calengele balafilwa ukumfwa ifyo bambi balelanda, e ico balilekele ukukuula. Umusumba uo balekuula batendeke ukuwita abati Babele, icalola mu kuti “Icimfulumfulu.” Abantu batendeke ukuya mu ncende shonse isha pano calo. Nomba tabalekele ukucita ifyabipa na mu ncende umo baile mu kwikala. Bushe kwaliko bamo abatemenwe Yehova? Mu cipandwa cikonkelepo tukamona nga ca kuti e ko bali.