Ifyo Icitetekelo Cakwe Caeshiwe

Abrahamu alisambilishe umwana wakwe Isaki ukutemwa Yehova no kucetekela ukuti fyonse ifyo Yehova alaya, filacitika. Nomba ilyo Isaki ali ne myaka nalimo 25, Yehova aebele Abrahamu ukucita icintu cimo icali ica-afya. Cinshi amwebele ukucita?

Lesa aebele Abrahamu ati: ‘Senda umwana obe umwaume umo fye uo wakwata umutuule ilambo pa lupili ulwaba mu mpanga ya Moria.’ Abrahamu taishibe icalengele Yehova amwebe ukucita ifi. Na lyo line alicitile ifyo Yehova amwebele.

Lucelocelo ubushiku bwakonkelepo, Abrahamu asendele Isaki na babomfi bakwe babili no kuya ku Moria. Pa numa ya kwenda inshiku shitatu, balitendeke ukumona ulupili uko baleya. Lyena Abrahamu aebele ababomfi bakwe ukushala, pa kuti ena na Isaki baye mu kutuula ilambo. Abrahamu aebele Isaki ukusenda inkuni, e lyo ena asendele umwele. Isaki aipwishe wishi ati: ‘Bushe inama tuleya mu kutuula ili kwi?’ Abrahamu amwaswike ati: ‘Mwana wandi, Yehova alatupeela.’

Ilyo bafikile pa lupili, balikuulile iciipailo. Lyena Abrahamu akakile Isaki amaboko na molu amubika na pa ciipailo.

Lyena Abrahamu abuulile umwele. Apo pene fye malaika wa kwa Yehova alandile ukufuma ku muulu ati: ‘Abrahamu! Wi-ipaya umulumendo! Nomba naishiba ukuti walikwata icitetekelo muli Lesa pantu taukeene ukutuula umwana obe ilambo.’ Lyena Abrahamu amwene impaanga naikatwa insengo mu fimpusa. Ukwabula no kupoosa inshita, Abrahamu alikakwile Isaki kabili alituulile impaanga ilambo.

Ukutula lilya line, Yehova aleita Abrahamu ukuti cibusa wakwe. Bushe walishiba ico alemwitila ifi? Abrahamu alecita fyonse ifyo Yehova alemweba ukucita, nangu teshibe ico Yehova amwebela ukucita fimo, ena alecita ifyo fine amweba.

Yehova alilaile Abrahamu na kabili ukuti: ‘Nkakupaala, kabili nkalenga abana bobe bakafule.’ Ifi alandile fyalolele mu kuti Yehova ali no kupaala abantu abacita ifisuma ukupitila mu lupwa lwa kwa Abrahamu.