Itenti lya Mushilo Ilya Kupepelamo

Ilyo Mose ali pa Lupili lwa Sinai, Yehova amwebele ukupanga itenti ilyaibela ilyo baleita abati itenti lya mushilo, umo abena Israele baali no kulapepela Lesa. Abena Israele baali no kulasenda itenti lya mushilo konse uko baya.

Yehova atile: ‘Eba abantu bapeele ubupe pa kuti bapange itenti lya mushilo.’ Abena Israele balitwele golde, silfere, umukuba, amabwe ayasuma sana ne fibekobeko. Na kabili, balitwele insalu ishisuma, impapa sha nama e lyo ne fintu fimbi. Balitwele ifintu ifingi sana ica kuti Mose abebele ati: ‘Lekeni ukuleta ifintu pantu ifyo muletele nafifula!’

Abaume na banakashi abengi abaishibe ifya kupanga ifintu, e bapangile itenti lya mushilo. Yehova alibapeele amano pa kuti babombe umulimo. Bamo balepikula no kubila ifya kufwala. Bambi balelepula amabwe, bambi balepanga ifipe fya golde e lyo bambi balepanga ifipe fya fimuti.

Abantu bapangile itenti lya mushilo ukulingana ne fyo Yehova abebele. Balipangile insalu iisuma nga nshi iyo babikile pa kati, iya-akenye Umuputule uwa Mushilo e lyo no muputule wa Mushilo Nga Nshi. Mu Muputule wa Mushilo Nga Nshi e mwali icipao ca cipangano, bacipangiile ne fimuti fya munganunshi na golde. Mu Muputule wa Mushilo babikilemo ilampi ilya golde, itebulo, ne ciipailo apo baleocela ububani. Mu lubansa lwe tenti lya mushilo mwali ica kubikamo amenshi ico bapangiile no mukuba, kabili mwali ne ciipailo icikalamba. Icipao ca cipangano calelenga abena Israele baleibukisha ifyo balaile Yehova. Bushe icipangano walicishiba? Icipangano bulayo ubwaibela.

Yehova asalile Aarone na bana bakwe ukuba bashimapepo no kulabombela pe tenti lya mushilo. Balingile ukulalisunga bwino kabili e po bali no kulatuulila amalambo kuli Yehova. Aarone, shimapepo mukalamba e o basuminishe fye ukulaingila mu Muputule uwa Mushilo Nga Nshi. Aleingila muli uyu muputule umuku umo fye mu mwaka mu kutuula amalambo pa membu shakwe, pa membu sha lupwa lwakwe e lyo ne sha bena Israele bonse.

Pa kuti abena Israele bapange ili itenti, palipitile umwaka umo ukutula apo bafumiine mu Egupti. Ilyo bapwishishe ukupanga itenti, e lyo bakwete umwa kupepela Yehova.

Ikumbi lyaishile pe tenti lya mushilo, no bukata bwa kwa Yehova bwaiswile mwi tenti lya mushilo. Ikumbi nga talimine pe tenti lya mushilo, abena Israele tabalefuma pa cifulo apo baleba. Lelo ikumbi nga lyaima, baleima no kutampa ukwenda. Balepangulula itenti lya mushilo no kukonka ukwaleya ikumbi.