Hana Alomba Umwana Umwaume

Elkana umwina Israele aupile abanakashi babili, umo ali ni Hana e lyo umbi ali ni Penina. Elkana atemenwe sana Hana. Penina aleseka Hana pantu takwetepo umwana e lyo ena alikwete abana abengi. Cila mwaka, Elkana alesenda ulupwa lwakwe ku kupepa pe tenti lya mushilo ilyali mu Shilo. Bushiku bumo ilyo bali pe tenti lya mushilo, Elkana alimwene ukuti Hana uo atemenwe sana alelila. Elkana amwebele ati: ‘Hana leka ukulila. Nangu tawakwata abana, walikwata ine ne mulume obe kabili nalikutemwa.’

Pa numa, Hana aile eka mu kupepa. Ilyo alepaapaata Yehova ukuti amwafwe, alelila no kulila. Hana alaile Yehova ati: ‘Nga mwampeela umwana umwaume, nkapeela uyo mwana kuli imwe kabili akalamubombela mpaka akafwe.’

Ilyo Eli Shimapepo Mukalamba amwene Hana alelila ilyo alepepa, atontonkenye ukuti Hana nakolwa. Hana ayaswike ati: ‘Awe mwe shikulu, nshikolelwe. Ninkwata ubwafya ubukalamba, kabili nde-eba Yehova ubwafya nkwete.’ Eli alilwike ukuti ifyo acilanda tafyaciba bwino kabili aebele Hana ati: ‘Lesa akupeele ico ulefwaya.’ Hana alilekele ukumfwa ububi kabili alifuminepo no kuya aya. No mwaka tawapwile Hana alikwete umwana kabili amwinike ati Samwele. Bushe kuti waelenganya ifyo Hana atemenwe?

Hana talabile ifyo alaile Yehova. Ilyo Samwele asumwike, amutwele pe tenti lya mushilo ku kubombela Yehova. Hana aebele Eli ati: ‘Uyu e mwana uo nalepepela ukuti Lesa ampeele. Na-ashimisha Yehova uyu mwana mpaka akafwe.’ Cila mwaka Elkana na Hana baleya mu kumona Samwele kabili balemutwalila ica kufwala icabula amaboko icipya. Yehova alilengele Hana akwata abana abaume na bambi batatu e lyo na banakashi babili.