Imfumu ya Kubalilapo iya Bena Israele

Abapingushi e bo Yehova aebele ukulatungulula abena Israele, lelo abena Israele bena balefwaya ukukwata imfumu. Baebele Samwele ati: ‘Ifyalo fyonse ifya mupepi fyalikwata imfumu. Na ifwe tulefwaya ukukwata imfumu.’ Samwele amwene ukuti ifyo balefwaya tafyali bwino, e ico alipepele kuli Yehova. Yehova amwebele ati: ‘Abantu tabakeene iwe. Bakeene ine. Ubebe ati nabasuminisha ukukwata imfumu, lelo iyo imfumu ikalafwaya ifintu ifingi kuli bena.’ Nomba abantu bonse batile: ‘Nangu fye. Ifwe tulefwaya fye ukukwata imfumu!’

Yehova aebele Samwele ati umwaume uwe shina lya kuti Shauli e ukaba imfumu ya kubalilapo. Ilyo Shauli aile kuli Samwele ku Rama, Samwele alisubile Shauli ukuba imfumu, aitulwilile amafuta pa mutwe wakwe.

Pa numa Samwele aitile abena Israele bonse pa kuti abalange imfumu yabo. Nomba balifililwe ukumumona. Bushe nawishiba icalengele? Pantu Shauli alibeleme mu fipe. Ilyo bamusangile, balimusendele kabili bamwimike pa kati ka bantu. Shauli ali umutali sana ukucila bonse abalipo, kabili ali umusuma sana. Samwele atile: ‘Moneni umuntu uo Yehova asalile.’ Abantu balitemenwe, kabili batile: ‘Kalebalika mwe mfumu!’

Ilyo Shauli atendeke fye ukuteka, alekutika ifyo Samwele alemweba kabili alecita ifyo Yehova alefwaya. Lelo mu kupita kwa nshita alilekele ukumfwila Yehova. Ku ca kumwenako, imfumu tayalingile ukutuula ilambo kuli Lesa. Nomba bushiku bumo, Samwele aebele Shauli ati amulolele, lelo Samwele taile bwangu. E ico Shauli asalilepo ukutuula amalambo umwine. Bushe Samwele acitile shani ilyo afikile? Aebele Shauli ati: ‘Naulufyanya, wacita ifyo Yehova akukeenye ukucita.’ Bushe Shauli alitampile ukucita ifyo Yehova alefwaya?

Pa numa, ilyo Shauli aile mu kulwa na bena Amaleke, Samwele aebele Shauli ati akepaye bonse abena Amaleke. Lelo Shauli taipeye Imfumu Agagi. Yehova aebele Samwele ati: ‘Shauli nanjalukila, kabili talecita ifyo ndemweba.’ Samwele alifulilwe sana, aebele Shauli ati: ‘Apo taulefwaya ukumfwila Yehova, alasala umbi ukuba imfumu.’ Ilyo Samwele alefwaya ukuya, Shauli amwikete ku ca kufwala kabili ica kufwala calilepwike. Lyena Samwele aebele Shauli ati: ‘Yehova nakupoka ubufumu.’ Yehova ali no kupeela ubufumu ku muntu umbi uwamutemenwe kabili uwalemumfwila.