Ulubembu Imfumu Davidi Yacitile

Ilyo Shauli afwile, Davidi e waishileba imfumu. Ali ne myaka 30. Ilyo papitile imyaka iingi ukutula apo Davidi abelele imfumu, bushiku bumo aile pa mutenge we sano lyakwe e lyo amona umwanakashi umusuma alesamba. Davidi bamwebele ati ishina lya mwanakashi amwene ni Bati-sheba kabili umulume wakwe ali ni Uria umushilika. Davidi aitile Bati-sheba kwi sano. Ilyo Bati-sheba aile kwi sano, Davidi alileele nankwe kabili Bati-sheba alikwete ifumo. Davidi talefwaya umuntu nangu umo aishiba ifyo acitile. Aebele umukalamba wa bashilika ukuti abike Uria ku ntanshi uko inkondo yakosele no kuti bena babwelele ku numa. Ilyo Uria bamwipeye mu nkondo, Davidi alyupile Bati-sheba.

Yehova alimwene ifyabipa fyonse ifyacitike. Cinshi ali no kucitapo? Yehova atumine Natani kuli Davidi. Natani aebele Davidi ati: ‘Kwali umwaume uwa fyuma uwakwete impaanga ishingi, e lyo kwali no mwaume umupiina uwakwete fye impaanga imo iyo atemenwe sana. Uwa fyuma ailesenda impaanga imo iyo umupiina akwete fye.’ Davidi alifulilwe kabili alandile ati: ‘Uyo umuntu wa fyuma alingile ukufwa!’ E lyo Natani aebele Davidi ati: ‘Uyo muntu nimwe!’ Davidi alyumfwile sana ububi ica kuti aebele Natani ati: ‘Nimembukila Yehova.’ Ifi Davidi acitile fyalengele akwata amafya kabili na mu lupwa lwakwe namo mwali amafya. Yehova alikandile Davidi pa fyo acitile, lelo tamwipeye pantu Davidi alisumiine ukuti alilufyenye kabili ali-icefeshe.

Davidi alefwaya ukukuulila Yehova itempele, lelo Yehova asalile umwana wa kwa Davidi Solomone ukuti e o akakuule itempele. Davidi atendeke ukupekanishishako Solomone ifya kubomfya pa kukuula itempele, alandile ati: ‘Itempele lya kwa Yehova lifwile ukuba ilisuma sana. Solomone acili mwaice, kanshi nalamwafwa ukupekanya ifintu.’ Davidi alisangwilileko indalama ishingi pa kuti bakashibomfye pa kukuula itempele. Alifwaile na ba kukuula abaishibe sana ukukuula. Alifwaile golde, silfere, ne fimuti fya mikedari ifyo baletele ukufuma ku Turi na ku Sidone. Ilyo Davidi ali mupepi no kufwa, apeele Solomone apo alembele ifya kukonka pa kukuula itempele. Amwebele ati: ‘Yehova alinjebele ukulemba ifyo ulingile ukukonka. Yehova akakwafwa. Witiina. Kosa kabili kabombe umulimo.’