Umwana wa kwa Mukamfwilwa Balimubuushishe Ilyo Afwile

Ilyo mu Israele mwali icilala, Yehova aebele Eliya ati: ‘Kabiye ku Sarefati. Mukamfwilwa akayakupeela ifya kulya.’ Ilyo aleingila mu musumba wa Sarefati, Eliya amwene mukamfwilwa umupiina aleteeba inkuni. Eliya alombele uyu mwanakashi amenshi. Ilyo aleya mu kumusendela amenshi, Eliya amwebele ati: ‘Undeteleko no mukate.’ Nomba mukamfwilwa amwaswike ati: ‘Nshikwete umukate uwa kuti imupeele. Nkwete fye fulaulo na mafuta ayanono aya kupangilamo fye ifya kulya fyandi no mwana wandi.’ Eliya amwebele ati: ‘Yehova alandile ati nga wampangila umukate, fulaulo na mafuta ifyo ukwete tafyakapwe mpaka imfula ikese.’

E fyo mukamfwilwa aingile mu ng’anda, apanga no mukate atwalila na kasesema wa kwa Yehova. Nga filya fine Yehova alandile, ifya kulya mukamfwilwa akwete tafyapwile mpaka imfula yabwela. Fulaulo tayapwile na mafuta nayo tayapwile.

Nomba kwalicitike icintu cimo icabipile sana. Umwana umwaume uwa kwa uyu mukamfwilwa alilwele sana ica kuti asukile afwa. E ico mukamfwilwa alombele Eliya ukuti amwafwe. Eliya asendele umwana no kumutwala mu muputule wa pa muulu. Alaalike umwana pa busanshi e lyo apepa ati: ‘Yehova, napaapaata buusheni uyu mwana.’ Bushe walishiba umulandu cawamine ukuti Yehova abuushe uyu mwana? Pantu pali ilya nshita takwali nangu umo uwafwile uo Lesa abuushishepo. Na kabili uyu mukamfwilwa no mwana wakwe tabali bena Israele.

Umwana alibuukile kabili alitampile no kupeema! Eliya aebele mukamfwilwa ati: ‘Mona! Umwana obe ali no mweo.’ Ala alitemenwe, kabili aebele Eliya ati: ‘Kwena ca cine uli muntu wa kwa Lesa. Ico nalandila ifi ni co ulanda fye ifyo Yehova akweba.’