Yehova Acingilila Yehoshafati

Yehoshafati imfumu ya baYuda alyonawile ifilubi ne fiipailo apo balepepela Baali. Alefwaya ukuti abantu beshibe amafunde ya kwa Yehova. E ico atumine bacilolo na bena Lebi ukuya mu Yuda monse mu kusambilisha abantu amafunde ya kwa Yehova.

Abantu abaleikala mu fyalo ifyali mupepi baletiina ukuya mu kulwa na baYuda pantu balishibe ukuti Yehova aleafwa abantu bakwe. Aba bantu baletwala ne fya bupe ku Mfumu Yehoshafati. Nomba abena Moabu, abena Amone na baleikala mu citungu ca Seiri baile mu kulwa na baYuda. Yehoshafati alishibe ukuti alingile ukulomba Yehova ukuti amwafwe. E ico aebele abaume, abanakashi, na bana ukuya ku Yerusalemu. Apepele ipepo ninshi bonse baleumfwako ati: ‘Mwe Yehova nga tamwatwafwe tatwacimfye. Twapaapaata twebeni ifyo tulingile ukucita.’

Yehova alyaswike ipepo, abebele ati: ‘Mwitiina. Nalamwafwa. Tantameni, iminineni shilili, no kumona ifyo nalamupususha.’ Bushe Yehova abapuswishe shani?

Ulucelo lwakonkelepo, Yehoshafati asalile aba kwimba no kubeba ati babe pa ntanshi ya bashilika. Balyendele ukufuma mu Yerusalemu no kuya ku Tekoa uko balelwila inkondo.

Abaleimba inyimbo sha kulumbanya Yehova nga baimbisha, e lyo Yehova alebacimfishako abalwani babo. Alifulungenye abena Amone na bena Moabu ica kuti batendeke ukulwa beka beka, kabili bonse fye balifwile. Lelo Yehova alicingilile abaYuda, abashilika na bashimapepo. Abantu bonse abali mu fyalo ifyali mupepi balyumfwile ifyo Yehova acitile, kabili balishibe ukuti Yehova aleafwa abantu bakwe. Bushe Yehova apususha shani abantu bakwe? Alabapususha mu nshila ishingi. Takabila abantu ukumwafwa pa kupususha abantu.