Esra Alesambilisha Abantu Amafunde ya kwa Lesa

Palipitile imyaka nalimo 70 ukutula apo abena Israele abengi babwelelemo ku Yerusalemu, lelo abena Israele bambi balishele mu calo ca bena Persia. Umo pa bashele ni shimapepo Esra, uwalesambilisha abantu Amafunde ya kwa Yehova. Esra alyumfwile ukuti abantu mu Yerusalemu tabalekonka Amafunde, e ico alefwaya ukuyabafwa. Imfumu ya bena Persia Artakishashete yamwebele ati: ‘Lesa alikupeela amano pa kuti ulesambilisha Amafunde yakwe. Kabiye, kabili usende onse uulefwaya ukuya nobe.’ E ico Esra akumene na bonse abalefwaya ukubwelelamo ku Yerusalemu. Lyena bapepele kuli Yehova ukuti abacingilile ilyo baleya ku Yerusalemu, ilyo bapwile ukupepa balimine balaya.

Pa numa ya myeshi 4, balifikile mu Yerusalemu. Bacilolo ba mu Yerusalemu baebele Esra ati: ‘Abena Israele tabomfwila Yehova, kabili balyupa abanakashi abapepa balesa ba bufi.’ Cinshi Esra acitile? Esra alifukeme ninshi na bantu balemonako kabili apepele ati: ‘Mwe Yehova ifyo mwatucitila fingi, lelo natumulufyanya.’ Abantu balilapiile, lelo fimo ifyo balecita fyalibipile. E ico Esra asalile abakalamba e lyo na bakapingula ukuti babombele pali ubu bwafya. Mu myeshi yakonkelepo itatu, bonse abashalepepa Yehova balibatamfishe mu Yerusalemu.

Pa numa ya myaka 12, ninshi ne fibumba fya Yerusalemu balifikuula cipya cipya, Esra aitile abantu mu lubansa pa kuti ababelengele Amafunde ya kwa Lesa. Ilyo Esra akupukwile ibuuku, abantu baliminine. Esra alilumbenye Yehova, kabili abantu balimishe amaboko pa kuti basuminishe ifyo alandile. Lyena Esra abelengele Amafunde no kuyalondolola, kabili abantu balekutika. Awe abantu balisumine ukuti na kabili balilekele ukupepa Yehova, e ico balililile. Ubushiku bwakonkelepo, Esra alibabelengeele Amafunde na yambi. Abantu balisambilile ukuti tapali no kupita inshita iikalamba bali no kusefya Umutebeto wa Nsakwe. E ico ilyo line fye balitendeke ukupekanya umutebeto.

Pa nshiku 7 isho basefeshe umutebeto, abantu balisekelele kabili balitashishe Yehova pantu balikwete ifya kulya ifingi ifyo basombwele. Ukutula mu nshiku sha kwa Yoshua tabatalile abasefyapo uyu mutebeto nge fi basefeshe. Ilyo umutebeto wapwile, abantu balilongene pamo, kabili bapepele ati: ‘Mwe Yehova mwalitulubwile mu busha, mwalitupeele ifya kulya ilyo twali mu mpanga, kabili mwalitupeela ici calo icisuma. Lelo pa miku iingi, tatwalemumfwila. Mwaletutumina bakasesema ukwisa mu kutusoka, lelo tatwalebomfwila. Na lyo line tamwatonawile. Mwalicitile ifyo mwalaile Abrahamu. Nomba tulemulaya ukuti twakulamumfwila.’ Awe balilembele ifyo balaile Lesa, kabili bacilolo, abena Lebi na bashimapepo balibikile icifwati pa fyo abantu balembele.