Takwali Icali no Kubalesha

Kwali umwaume uushale-enda uwaleikala cila bushiku pa mwinshi we tempele alelombelesha. Bushiku bumo mu cungulo kasuba, amwene Petro na Yohane baleingila mwi tempele e lyo abeba ati: ‘Napaapaata mpeniko akali konse.’ Petro amwebele ati: ‘Ifyo nalakupeela naficila na pa ndalama ningakupeela. Mwi shina lya kwa Yesu, ima, enda!’ Lyena Petro alimwafwile ukwima, e fyo umwaume atendeke ukwenda! Abantu abamweneko ifyacitike balitemenwe sana ica kuti abengi balitetekele.

Lelo bashimapepo na baSaduke balifulilwe. Baikete abatumwa, babatwala ku cilye e lyo babeba ati: ‘Nani wamupeela amaka ya kundapa uyu mwaume?’ Petro ayaswike ati: ‘Yesu Kristu uo imwe mwaipeye e watupeela amaka.’ Bashimapepo balikalipe, batile: ‘Lekeni ukulanda pali Yesu!’ Lelo abatumwa batile: ‘Tulingile ukulanda pali ena. Tatwakaleke.’

Ilyo Petro na Yohane bafumine mu cilye, baile ku basambi bambi no kubeba ifyacitike. Balipepeele pamo no kulomba Yehova ati: ‘Twapaapaata twafweni ukuba abashipa pa kuti tutwalilile ukubomba umulimo wenu.’ Yehova alibapeele umupashi wa mushilo kabili balitwalilile ukubila imbila nsuma no kundapa abalwele. Abantu abengi balitetekele. AbaSaduke balyumfwile ububi, e ico balikete abatumwa no kubabika mu cifungo. Nomba mu nshita ya bushiku, Yehova atumine malaika uwaiswile ifiibi fya mu cifungo kabili aebele abatumwa ati: ‘Bweleleni kwi tempele mu kusambilisha abantu.’

Ubushiku bwakonkelepo ulucelo, bashimapepo ba mu cilye ca Sanhedrini babebele ati: ‘Ifiibi fya mu cifungo ficili nafikomwa lelo abaume mwaikete nabaya! Bali mwi tempele, balesambilisha abantu!’ Abatumwa balibekete na kabili no kubatwala ku cilye ca Sanhedrini. Shimapepo mukalamba atile: ‘Twalimwebele ukuti muleke ukulanda pali Yesu!’ Lelo Petro abaswike ati: “Tufwile ukunakila Lesa ukucila ukunakila abantu.”

Bashimapepo balifulilwe sana ica kuti balefwaya ukwipaya abatumwa. Lelo umuFarise uo baleita ati Gamaliele aliminine no kubeba ati: ‘Mucenjele sana! Nalimo Lesa ali na aba baume. Bushe mulefwaya ukulwa na Lesa?’ Balyumfwile ifyo alandile. Pa numa ya kulopola abatumwa, babebele na kabili ati baleke ukubila imbila nsuma, kabili balibalekele baya. Lelo ifi bacitile tafyalengele abatumwa baleka ukubila imbila nsuma. Abatumwa balitwalilile ukubila imbila nsuma mwi tempele na ku ng’anda ne ng’anda.