Yesu Asala Sauli

Sauli ali mwina Roma uwafyalilwe mu Tarsi. Ali muFarise uwasambilile Amafunde ya baYuda, kabili alipatile sana Abena Kristu. Alefumya Abena Kristu abaume na banakashi mu mayanda yabo no kubatwala mu fifungo. Alimweneko no ko abantu balepoola Stefani amabwe mpaka afwa.

Lelo Sauli talefwaya fye ukwikata Abena Kristu abaleikala mu Yerusalemu. Aebele shimapepo mukalamba ukumusuminisha ukuya ku musumba wa Damaseke pa kuti akayeikata Abena Kristu abaleikalamo. Ilyo Sauli ali mupepi no kufika ku Damaseke, ulubuuto ulwabeeka sana lwalimusanike kabili aliwile panshi. Aumfwile ishiwi lilemweba ati: ‘Sauli, cinshi ulencushisha?’ Sauli ayaswike ati: ‘Nimwe bani?’ Ishiwi lyatile: ‘Nine Yesu. Kabiye mu Damaseke, nkakweba ifya kucita.’ Apo pene fye Sauli alipofwile, kabili bamwikete fye pa kuboko no kumutwala mu musumba.

Mu Damaseke mwali Umwina Kristu uwali ne cishinka ishina lyakwe ni Anania. Yesu aebele Anania mu cimonwa ati: ‘Kabiye pa ng’anda ya kwa Yuda, iyaba mu musebo uwitwa Uwaololoka, kabili ufwayepo Sauli.’ Anania atile: ‘Mwe Shikulu, nalyumfwa ifingi pali uyu muntu! Alebika abasambi benu mu cifungo!’ Lelo Yesu amwebele ati: ‘Kabiye. Ninsala Sauli ukuti alebila imbila nsuma ku bantu mu fyalo ifingi.’

E ico Anania asangile Sauli no kumweba ati: ‘Sauli munyinane, Yesu nantuma ukwisa kwisula amenso pa kuti utendeke ukumona.’ Apo pene Sauli alitampile ukumona na kabili. Alisambilile pali Yesu kabili aishileba umusambi wakwe. Apo nomba Sauli alibatishiwe no kuba Umwina Kristu, atendeke ukubila imbila nsuma mu masunagoge pamo na Bena Kristu bambi. AbaYuda balipapile ilyo bamwene Sauli alesambilisha abantu pali Yesu! Balelanda abati: ‘Bushe uyu te walebika abasambi ba kwa Yesu mu fifungo?’

Pa myaka itatu, Sauli aleshimikila abantu abaleikala mu Damaseke. AbaYuda balipatile Sauli kabili balefwaya no kumwipaya. Nomba ilyo aba bwananyina baishibe ifyo abaYuda balefwaya ukucita, balyafwile Sauli ukufyuka. Bamubikile mu museke kabili bamupushishe pa cipunda icali mu cibumba ca musumba.

Ilyo Sauli aile ku Yerusalemu, alefwaya ukuba pamo na ba bwananyina. Nomba balemutiina. Lyena Barnaba umusambi uwali ne cikuuku atwele Sauli ku batumwa kabili abebele ukuti Sauli alileka ukucita ifyo alecita kale. Sauli atendeke ukubila imbila nsuma pamo na ba mu cilonganino ca mu Yerusalemu kabili ali uwacincila. Mu kupita kwa nshita batendeke ukumwita ati Paulo.