Paulo Bamutuma ku Roma

Ilyo Paulo aile pa muku walenga butatu mu kubila imbila nsuma mu ncende ishalekanalekana, ailepelela mu Yerusalemu. Paulo balimwikete mu Yerusalemu kabili balimubikile mu cifungo. Yesu aebele Paulo mu cimonwa ubushiku ati: ‘Ukaya ku Roma mu kushimikila.’ Paulo bamufumishe ku Yerusalemu, bamutwala ku Kaisarea uko bamubikile mu cifungo pa myaka ibili. Ilyo balemulubulwisha ku Mulashi Feste, Paulo alandile ati: ‘Ntwaleni ku Roma kuli Kaisare pa kuti e o akayempingula.’ Feste amwebele ati: “Apo ulefwaya ukutwala umulandu kuli Kaisare; ukaya kuli Kaisare.” Paulo balimusendele mu bwato ubwaleya ku Roma, kabili ali pamo na Bena Kristu babili, Luka na Alistaaki.

Ilyo bali pali bemba kwaishile icimwela icikalamba kabili palipitile inshiku ishingi pa kuti cileke. Abantu bonse balemona kwati balafwa. Lelo Paulo abebele ati: ‘Mwe baume, malaika acinjeba mu ciloto ati: “Witiina, Paulo. Ukaya ku Roma kabili bonse abali nobe mu bwato tabafwe.” Shipeni! Tatwafwe.’

Kwali icimwela pa nshiku 14. Awe basukile bamona icishi. Ici cishi balecita ukuti icishi ca Melita. Ilyo ubwato bwashiikile mu mucanga, bwalitobaike, lelo bonse 276 abali mu bwato balipuswike. Bamo balyowele ukufika ku mulundu e lyo bambi baninine pa fyaputwike ku bwato mpaka bafika ku mulundu. Abantu ba mu Melita balisakamene bwino aba bantu, balibakoseeshe no mulilo wa konta.

Pa numa ya myeshi itatu, abashilika basendele Paulo ku Roma mu bwato bumbi. Ilyo afikile, aba bwananyina balile mu kumumona. Lintu abamwene, alitashishe Yehova kabili alikoseleshiwe. Nangu ca kuti Paulo balimwikete, balimusuminishe ukwikala mu ng’anda ya kusonkela e lyo abashilika balemulonda. Alikele mu ng’anda ya kusonkela pa myaka ibili. Abantu nga baya mu kumumona, alebashimikila pa Bufumu bwa kwa Lesa, kabili alebasambilisha na pali Yesu. Paulo alelembela ne filonganino ifyali ku Asia Minor na ku Yudea amakalata. Ukwabula no kutwishika Yehova alilengele Paulo abilisha imbila nsuma mu fyalo ifingi.