Kalata Ukufuma Kwi Bumba Litungulula

Ku Bena Kristu Banensu:

Apo tuli bakapepa ba kwa Yehova, twalitemwa Icebo cakwe Baibo. Twalishininkisha ukuti mu Baibo mwaba ilyashi lya kale ilya cine, ifyebo ifingatwafwa mu mikalile, e lyo ne filanga ukuti Yehova alitemwa abantunse. (Amalumbo 119:105; Luka 1:3; 1 Yohane 4:19) Tulafwaisha ukusambilisha abantu icine icaba mu Cebo ca kwa Lesa. E ico natupekanya cino citabo icileti, “Ifyo Wingasambilila ku Malyashi ya mu Baibo.” Lekeni tumwebeko fimo pali cino citabo.

Abo balembela cino citabo maka maka, bana. Lelo kuti twacibomfya na pa kwafwa abakalamba abafwaya ukusambilila na fimbi pa fya mu Baibo. Na kabili apo Baibo citabo ca bantu bonse, tatuletwishika ukuti nga tulebelenga amasambililo yali muli cino citabo tukanonkelamo pantu yakatwafwa ukuba ne nsansa icine cine.

Amalyashi ya mu Baibo ayali muli cino citabo, yatendekele pa nshita ilyo Lesa abumbile abantunse. Aya amalyashi bayalemba mu nshila iya-anguka ukumfwa, kabili balyesha ukuyalemba ukulingana ne fyo yalekonkana ukucitika.

Cino citabo cisuma sana, ifikope ifilimo na mashiwi babomfya bayalemba mu nshila ya kuti amalyashi ya mu Baibo yaleumfwika bwino sana ica kuti no ulebelenga aleishiba ifyo abantu balelandapo baleumfwa.

Cino citabo calatwafwa ukwishiba ifyo Baibo yabela citabo icilanda pa bantu abaleumfwila Yehova e lyo na bashalemumfwila. Calalenga tusambilileko ku fyo abantu abalembwamo bacitile. (Abena Roma 15:4; 1 Abena Korinti 10:6) Muli cino citabo muli ifipande 14. Pa ntendekelo ya cila cipande pali ifyebo ifilelanda pa masambililo yamo ayali muli ico cipande.

Nga muli bafyashi, kuti mwabelengela pamo no mwana wenu isambililo no kulanshanya nankwe ifikope. Lyena kuti mwabelengela pamo amalembo umufumine isambililo. Afweni umwana wenu ukwikatanya ifyo alebelenga mu Baibo ne fili mwi sambililo ilili mu citabo. Nalimo ifi fine e fyo mwingalacita na lintu mulesambilisha umukalamba ifya mu Baibo.

Natucetekela ukuti cino citabo cikafwa abaice na bakalamba ukusambilila ifyaba mu Cebo ca kwa Lesa no kulacita ifyo bakalasambilila. Ici cikalenga bakalepepa Lesa no kuba mu lupwa lwakwe ulo atemwa.