ISAMBILILO 18

Mulelanda Ifingalenga Abantu Basambililako Fimo

1 Abena Korinti 9:19-23

IFILI MULI ILI ISAMBILILO: Mulelenga abalekutika baletontonkanya pa fyo mulelandapo pa kuti pa mpela ye lyashi baleumfwa ukuti nabasambililako fimo.

IFYO MUFWILE UKUCITA:

Muletontonkanya pa fyo abakalakutika baishiba pa fyo muli no kulandapo. Mu cifulo ca kulanda fye ifyo abalekutika baumfwapo kale, basambilisheniko ifyo bashaishiba.

Ilyo mulelanda pa fyo baishiba mwilakokolapo, lelo muleteka umutima ilyo mulebasambilisha ifyo bashaishiba.
Mulefwailapo ifyebo kabili muletontonkanyapo sana. Ilyo mulelanda ifishinka ifikalamba, kuti cawama mwalandako pa fishinka ifyo abalekutika bashaishiba sana nelyo pa filecitika mu calo. Muletontonkanya sana pa fyo ifyebo mulepekanya fyampene ne fishinka mulefwaya ukulandapo.

Ilyo mulepituluka mu fyebo mulepekanya, muleyipusha amepusho pamo nga, cinshi, mulandu nshi, ni lilali, ni kwisa, nani, kabili cali shani, pa kuti muletontonkanya sana pa fyebo mukalanda. Ilyo mulelanda ilyashi, muleipushako amepusho yamo pali aya kabili muleyasuka no kwasuka pa kuti mulesambilisha bwino.
Mulelenga abalekutika bamona ifyo bengasambilila ku lyashi. Mulelondolola ifyo Amalembo yengafwa abalekutika mu fyo bacita cila bushiku. Mulelanda pa fintu ificitika, pa fyo abantu baba na pa fyo bacita ifyo abalekutika bengasambililako.