Ifyo Icilonganino ca Bena Kristu Cateyanishiwa

Yehova te Lesa wa cimfulumfulu. (1 Abena Korinti 14:33) Kanshi kuti twaenekela abantu bakwe ukuba abateyanishiwa bwino. Bushe icilonganino ca Bena Kristu cateyanishiwa shani? Finshi bonse mu cilonganino twingacita pa kuti citwalilile ukuba icateyanishiwa?

1. Bushe umutwe wa cilonganino nani?

‘Kristu e mutwe wa cilonganino.’ (Abena Efese 5:23) Nangu ca kuti Yesu ekala ku muulu, e utungulula umulimo abantu ba kwa Yehova babomba mwi sonde lyonse. Yesu alisonta “umusha wa cishinka kabili uwashilimuka,” e kutila ibumba ilinono ilya baeluda ababomba pa myaka iingi. Ili ibumba litwa no kuti Ibumba Litungulula. (Belengeni Mateo 24:45-47.) Nga filya fine abatumwa na bakalamba mu Yerusalemu balecita, Ibumba Litungulula e lyangalila ifilonganino fya Bena Kristu mwi sonde lyonse. (Imilimo 15:2) Lelo aba abaume te ntungulushi sha cilonganino cesu. Kanshi balabelenga Baibo pa kuti beshibe ifyo Yehova afwaya balecita, kabili balaitemenwa ukukonka ubutungulushi bwa kwa Yesu.

2. Mulimo nshi baeluda babomba?

Baeluda Bena Kristu abaume ababomba pa myaka iingi. Babomfya Baibo pa kusambilisha abantu ba kwa Yehova, pa kubafwa, na pa kubakoselesha. Tababalipila pa mulimo babomba. Lelo ‘balaitemenwa ukubomba; tababomba pa kuti fye bumwenemo ubunonshi bwa bufumfuntungu, lelo babomba pa mulandu wa kuti balafwaisha ukubomba.’ (1 Petro 5:1, 2) Ababomfi batumikila baume mu cilonganino abafwilishako baeluda, kabili mu kupita kwa nshita balabasonta ukuba baeluda nga bafika pa fifwaikwa ifya mu Malembo.

Ibumba Litungulula lilasonta baeluda bamo ukuba bakangalila ba muputule. Aba bakangalila ba muputule balatandalila ifilonganino pa kuti bafwe bamunyinabo na bankashi no kubakoselesha. Balasonta bamunyinefwe ukuba ababomfi batumikila nelyo baeluda nga ca kuti bafika pa fifwaikwa ifya mu Malembo.—1 Timote 3:1-10, 12; Tito 1:5-9.

3. Mulimo nshi uo Inte sha kwa Yehova bonse bakwata?

Bonse aba mu cilonganino ‘balalumbanya ishina lya kuti Yehova.’ Balalumbanya ili ishina nga baleasukapo, nga balelanda amalyashi, nelyo nga baleimba pa kulongana. Na kabili balalumbanya ishina lya kuti Yehova ilyo balebila imbila nsuma ukulingana na papela amaka yabo.—Belengeni Amalumbo 148:12, 13.

SAMBILILENI NA FIMBI

4. Yesu ni ntungulushi iyaba ne cikuuku

Kwaliba amashiwi ayo Yesu atweba ayasuma kabili ayatusansamusha. Belengeni Mateo 11:28-30, lyena lanshanyeni aya mepusho:

• Bushe Yesu ni ntungulushi ya musango nshi, kabili bushe abo atungulula bomfwa shani?

VIDIO: Ifyo Baeluda Bacitile Ilyo Kwali Icinkukuma ku Nepal (4:56)

Baibo yalilondolola bwino ifyo baeluda balingile ukubomba umulimo wabo.

Belengeni Esaya 32:2 na 1 Petro 5:1-3, lyena lanshanyeni aya mepusho:

• Bushe mwaumfwa shani ifi mwaishiba ukuti baeluda balasansamusha aba mu cilonganino nga filya Yesu alecita?

• Finshi fimbi baeluda bacita pa kuti balepashanya Yesu?

5. Baeluda balacita ifilenga aba mu cilonganino basambililako

VIDIO: Baeluda Muletungulula! (7:39)

Ifyo Yesu alecita e fyo na batungulula mu cilonganino balingile ukulacita. Belengeni Mateo 23:8-12, lyena lanshanyeni ici cipusho:

• Finshi mwatemwapo sana pa bupusano bwaba pa fyo Baibo ilanda ukuti e fyo baeluda balingile ukulacita, ne fyo mwamona intungulushi sha mapepo shicita?

1. Baeluda balakosha bucibusa bwabo na Yehova, kabili balafwa ne ndupwa shabo ukuba ishakosa mu fya kwa Lesa

2. Baeluda balabika amano kuli bonse aba mu cilonganino

3. Baeluda balabila imbila nsuma lyonse

4. Baeluda ni bakasambilisha. Kabili balawamyako Ing’anda ya Bufumu no kubombako imilimo imbi

6. Tufwile ukulabombela pamo na baeluda

Baibo yalilanda umulandu uukalamba uo tulingile ukulabombela pamo na baeluda. Belengeni AbaHebere 13:17, lyena lanshanyeni aya mepusho:

• Bushe caliba fye bwino ifi Baibo itukoselesha ukulaumfwila no kulanakila abatungulula? Cinshi mwa-asukila ifyo?

Belengeni Luka 16:10, lyena lanshanyeni ici cipusho:

• Cinshi cacindamina ukubombela pamo na baeluda na mu tuntu fye utunono?

IFYO MUSAMBILILE

Yesu e mutwe wa cilonganino. Tulaitemenwa ukubombela pamo na baeluda abakonka ubutungulushi bwa kwa Yesu, pantu balatusansamusha kabili balacita ifilenga twasambililako.

Ukupitulukamo

• Bushe umutwe wa cilonganino nani?

• Bushe baeluda bafwa shani aba mu cilonganino?

• Mulimo nshi ababomfi bwa kwa Yehova bonse bakwata?

ISHIBILENIPO NA FIMBI

Moneni ifilanga ukuti Ibumba Litungulula na baeluda bonse balibika sana amano ku Bena Kristu banabo muno nshiku.

Ifyo Balekoselesha Aba Bwananyina Ilyo Bababindile (4:22)

Moneni umulimo bakangalila ba muputule babomba.

Ifyo Bakangalila ba Muputule Babomba mu Ncende sha mu Mishi (4:51)

Belengeni pa mulimo abanakashi babomba mu cilonganino.

“Bushe Abanakashi Ababa mu Cilonganino ca Nte sha kwa Yehova Balasambilisha?” (Ulupungu lwa kwa Kalinda, September 1, 2012)

Moneni ifyo baeluda babombesha ukukoselesha Abena Kristu banabo.

“Baeluda ‘Babomfi Banensu Abatuletela Insansa’” (Ulupungu lwa kwa Kalinda, January 15, 2013)