ISAMBILILO 23

Mukanonkelamo Icine Cine nga Mwaibikilishako no Kubatishiwa!

Ifimoneka Ulwapulintwa

Yesu atile Abena Kristu bafwile fye ukubatishiwa. (Belengeni Mateo 28:19, 20.) Bushe ulubatisho cinshi? Kabili finshi umuntu afwile ukucita pa kuti abatishiwe?

1. Bushe ulubatisho cinshi?

Ishiwi lya ciGriki ilyo bapilibula ukuti “ukubatisha” lipilibula “ukutumpika” mu menshi. Ilyo Yesu balemubatisha, balimwibishe mu Mumana wa Yordani, kabili “afumine . . . mu menshi.” (Marko 1:9, 10) Nga filya fine cali kuli Yesu, Abena Kristu ba cine nabo balabatumpika nelyo ukubebisha mu menshi ilyo balebatishiwa.

2. Bushe umuntu nga abatishiwa ninshi alanga cinshi?

Umuntu nga abatishiwa ninshi alanga ukuti ali-ipeela kuli Yehova Lesa. Bushe umuntu aipeela shani? Ilyo ashilabatishiwa, alapepa kuli Yehova ninshi ali fye eka no kumweba ukuti alefwaya ukulamubombela ubumi bwakwe bonse. Alaya ukuti akulapepa fye Yehova eka, kabili ukucita ukufwaya kwa kwa Lesa e cikaba icacindama sana mu bumi bwakwe. Alasalapo ‘ukuikaana umwine no kulakonka’ ifyo Yesu alesambilisha ne fyo alecita. (Mateo 16:24) Umuntu nga aipeela abatishiwa no kubatishiwa, bucibusa bwakwe na Yehova na ba bwananyina bulakoselako.

3. Finshi umuntu afwile ukucita ilyo ashilabatishiwa?

Ilyo mushilabatishiwa calicindama ukusambilila pali Yehova no kumutetekela sana. (Belengeni AbaHebere 11:6.) Ilyo mulesambilila ifingi pali Yehova no kumutetekela, mukalamutemenwako. Ukwabula no kutwishika, mukalafwaya ukwebako abantu pali ena no kulaikala ukulingana na mafunde yakwe. (2 Timote 4:2; 1 Yohane 5:3) Nga ca kuti mwatendeka ukulaikala “ukulingana ne fyo Yehova afwaya . . . pa kuti lyonse mulecita ifya kumusekesha,” nalimo mukafwaya ukuipeela kuli Lesa no kubatishiwa.—Abena Kolose 1:9, 10.a

SAMBILILENI NA FIMBI

Moneni ifyo mwingasambilila ku lubatisho lwa kwa Yesu, e lyo ne fyo umuntu engacita pa kuti aipekanye ukubatishiwa.

4. Kuti twasambililako ku lubatisho lwa kwa Yesu

Belengeni Mateo 3:13-17 pa kuti musambilile na fimbi pa lubatisho lwa kwa Yesu. Lyena lanshanyeni aya mepusho:

Bushe Yesu ali akanya ilyo alebatishiwa?
Bushe bamubatishe shani? Bushe bamusanshile fye amenshi?

Ilyo Yesu abatishiwe, atendeke ukubomba umulimo uwacindama uo Lesa amupeele. Belengeni Luka 3:21-23 na Yohane 6:38, lyena lanshanyeni ici cipusho:

Ilyo Yesu abatishiwe, mulimo nshi acindamike sana?

5. Ukubatishiwa cintu ico mwingakumanisha ukucita

Pa kubala, nalimo kuti mwalamona kwati te kuti mukumanishe ukuipeela no kubatishiwa. Lelo nga mwatwalilila ukusambilila pali Yehova no kumwishiba bwino, mukamona ukutila kuti mwakumanisha ukuipeela kuli ena no kubatishiwa. Pa kuti mumone abantu bamo abacitile ifi twalandapo, tambeni VIDIO.

VIDIO: Ifyo Mwingacita pa Kuti Mube Cibusa wa kwa Yehova (1:11)

Belengeni Yohane 17:3 na Yakobo 1:5, lyena lanshanyeni ici cipusho:

Finshi fingafwa umuntu ukufikapo ukubatishiwa?

A. Umwanakashi alepepa pa kuipeela kuli Lesa.

B. Umwanakshi umo wine nabamwibisha mu menshi pa kumubatisha kabili aba Inte ya kwa Yehova.

Ukuipeela kweba Yehova ukuti tulefwaisha ukulamubombela umuyayaya
Nga twabatishiwa ninshi twalanga bonse abalemonako ukuti twali-ipeela kuli Lesa

6. Nga twabatishiwa tulaba mu lupwa lwa kwa Yehova

Nga twabatishiwa tulaba mu lupwa ulwaikatana ulwa mwi sonde lyonse. Nangu ca kuti twalipusana inkulilo kabili twikala mu fyalo ifyapusanapusana, twasumina fye ifintu fimo fine kabili bonse twikala ukulingana na mafunde ayalanda pa mibele iyo Abena Kristu balingile ukuba nayo. Belengeni Amalumbo 25:14 na 1 Petro 2:17, lyena lanshanyeni ici cipusho:

Bushe ukubatishiwa kulenga umuntu aba cibusa wa musango nshi uwa kwa Yehova e lyo na bantu bambi abapepa Yehova?

Ifikope: Nkashi uwabatishiwa ali ne nsansa ilyo aletontonkanya pa fyo omfwana bwino na bantu mu cilonganino. 1. Ale-ebako nkashi umbi ifili ku mutima. 2. Aleafwa nkashi umukalamba ukwenda. 3. Alelya ifya kulya pamo ne fibusa aba mishinku iyalekanalekana. 4. Ali na nkashi umbi ilyo alebila imbila nsuma ku mwaume. 5. Alekopwa icikope pa kulongana kwa citungu na bankashi babili abo apusana nabo inkanda.

ABANTU BAMO BATILA: “Nshilaipekanya ukubatishiwa.”

Ifi nga e fyo mumfwa, bushe muletontonkanya ukuti ukubatishiwa cintu icacindama ico mulingile ukucita?

IFYO MUSAMBILILE

Yesu asambilishe ukuti Abena Kristu bafwile ukubatishiwa. Pa kuti umuntu abatishiwe afwile ukucetekela sana Yehova, ukulaikala ukulingana na mafunde yakwe, kabili afwile no kuipeela kuli Yehova.

Ukupitulukamo

Bushe ulubatisho cinshi, kabili mulandu nshi lwacindamina?
Bushe umuntu nga abatishiwa ninshi alanga finshi?
Finshi umuntu alingile ukucita ilyo ashilaipeela no kubatishiwa?

Ubushiku mwapwisha ili isambililo:

Ifyo Mwingacita

Moneni ifili pa mpela ya Cipande 4 apaleti, “Bushe Ninjipekanya Ukutendeka Ukubila Imbila Nsuma Pamo ne Cilonganino?” na paleti “Bushe Ninjipekanya Ukubatishiwa?,” pa kuti mumone ifyo mwingacita pa kuti mukafikepo ukuba kasabankanya no kubatishiwa.

Fimbi:

Your other goal

ISHIBILENIPO NA FIMBI

Sambilileni umo ulubatisho lwalola no mo lushalola.

“Bushe Ulubatisho ni Cinshi?” (Icipande ca pa jw.org)

Pitulukeni mu fingafwa umuntu pa kuti alunduluke no kubatishiwa.

“Ukutemwa Yehova no Kumutasha Kuti Fyalenga Umuntu Abatishiwa” (Ulupungu lwa kwa Kalinda, March 2020)

Belengeni icalengele umwaume umo asalepo ukubatishiwa.

“Balefwaya Njishibile ne Mwine Ifyo Baibolo Isambilisha” (Ulupungu lwa kwa Kalinda, February 1, 2013)

Moneni ifyo mwinganonkelamo nga ca kuti mwaibikilishako no kubatishiwa, e lyo ne fyo mwingaipekanya.

“Bushe Nkabatishiwe?” (Ifipusho Abacaice Bepusha, ne Fyasuko Ifingabafwa, Ibuuku 2, icipandwa 37)

a Nga ca kuti umuntu alibatishiwe uko alepepa kale, afwile ukubatishiwa na kabili. Mulandu nshi? Pantu uko alepepa tabalesambilisha icine ca mu Baibo.—Moneni Imilimo 19:1-5 ne Sambililo 13.