Ukuipeelesha kwa Bukapepa—kwa Bunonshi ku Fintu Fyonse

INTE SHA KWA YEHOVA balishiba ukuti “ukuipeelesha kwa bukapepa kwa bunonshi ku fintu fyonse” kabili kwalicindama ku kupepa kwa cine. (1 Timote 4:8, NW) Ukwabula kwene, ubutotelo buba icibelesho fye. “Ukuipeelesha kwa Bukapepa” muli fyo kwali ishina lyalinga ku kukonkana kwa mabungano yabo aya citungu ayatendeke mu June wapwile.

Mu August, yatatu aya ayo mabungano yacitilwe mu Poland mu kuba no kulolesha ku numa kwabamo ubuseko. Balongene pa numa ya kwishibikwa ku bulashi kwapeelwe ku Nte sha kwa Yehova mu May. (Ku fyebo fimbi ukulosha ku mabungano ya mu Poland, mona Awake! wa December 22, 1989.) Lekeni pano tupituluke muli programu we bungano nga fintu lyacitilwe mu Poland.

Piątek w Poznaniu (Pali Cisano mu Poznan)

Ukupinda umukate no buntungwa, aba kuilishanya 50,000 bacitile icimfulumfulu mu Poznan mu June 1956. Ici cafuminemo imfwa shacila pali 50 no kutendeka kwa kamfulumende ya ba Pole. Mu kupusana kwamonekesha, imyaka 33 pa numa, mu mibele yaishibikilwe ku kupaka kwa mukate wa ku mupashi no buntungwa bwa Bwina Kristu, Abena Kristu ba mutende bakumene kulya ku kuumfwa ku malyashi pa “Ukubombela Lesa Uufwayo Ukuipeelesha Kwapaatulwa,” umutwe wa pali Cisano. Impendwa ya pa mulu iya 40,442 balongene kulya pa Mulungu.

Pa numa ya lyashi lya kusengela ilya kwa ceyamani we bungano no kwipusha mu kuba na bantu “Batungululo Bumi Mu Kuba No Kuipeelesha kwa Bukapepa,” ukufunda kubomba kwalipeelwe mu lyashi “Ukusengauke Milomo ya Bubifi.” Fintu caba icayanguka ku lyashi lya fye ukwalukila mu lwambo lucena! Kabili ulwambo lucena kuti lwatungulula ku bukwakwa bwa kulenge mfwa. Lelo pa ntanshi ya kulanda pa bantu bambi, Abena Kristu bakosoka, pa kuba aba mukoosha mu kubakilila umutende no kwikatana, mano mano baipusha abene ukuti: ‘Bushe Yesu nga alisosele ici? Bushe cilekabilwa ukusoswa? Bushe cikabe ca kukuulilila? Cinshi cili umulandu wandi uwa kusosela cene?’

Icali icaibela mu mabungano ya mu Poland cali ni nshita yabikilwe pa mbali cila bushiku ukuumfwa amalipoti ukupeelwa ku Nte ishafumine mu fyalo fimbi. Ifyakukumanya fyashimikwe na makombe ukwimininako inko 24 ishalekanalekana kwaebekeshe icine ca kuti pano pali ulupwa lwa pa kati ka nko ulwaikatana mu cine cine pe samba lya kwishibikwa ne cishinka ca kuti “Yehova Apampamina pa Kuipeelesha kwa Kwapaatulwa.” Apantu Lesa aba uwawaminwa ukupokelelo kuipeelesha kwa musango yo, ababomfi bakwe bafwile ukuba abashaakanikana mu citemwishi no kupepa. Ica kumwenako ca kwa Yesu cilangilila ukuti te kuti kubeko ukuipeelesha kwa bukapepa ukwa mutima citika.

Ukuipeelesha kwa bukapepa kubimbamo icili conse cintu tucita. Muli fyo, ukulanshanya kwa mbali shitatu kwasokele Abena Kristu “Ukusengauka Ukupumbuka” mu mbali sha fya kulya no kunwa, imifwalile ne misakwile, ne fya kusekesha. Ubuliili no kukolwakolwa fyaba misango ya bufunushi iyo iititikisha amano ya ku mupashi, ukulenga impika sha butuntulu bwa bumi, ukuletako imyendele yabipa, no kutungulula ku masanso. Imisango yacishamo iya mifwalile—iishalinga, iyapusanako, iyeni, nelyo fye iya kutulumusha—ifwile ukusengaukwa. Ubusanku, ukufwala kwa lyonse ukwacishamo, nelyo ifya kufwala fyapapatila tafyalinga. Umulandu tauli ni nampo nga umusango uli ni fashoni, lelo ni nampo nga uli uwalinga ku mutumikishi wa kwa Lesa. Kabili ifya kusekesha ifyo ifisanshamo ubupondoshi, ulukakala, imiti ikola, ukupupa, nelyo bucisenene bwa kwampana kwa bwamba takuli kwa Bwina Kristu.—Abena Filipi 1:27.

Programu wa pali Cisano icungulo atendeke ne lyashi lyaleti “‘Umusha wa Cishinka’ ne Bumba Lyakwe Ilitungulula.” Uwacetekela bucishinka bwa fibumbwa fyakwe ifya busumino, Yehova alapeela ubulashi. E ficita no Mwana wakwe. Ukufuma pa kati ka bakonshi bakwe abasubwa, “umusha wa cishinka kabili uwashilimuka,” alisalapo abanono ku kubomba nge bumba litungulula ilimoneka. (Mateo 24:45) Mu mwanda wa myaka uwa kubalilapo, ili bumba lyasanshiwemo abatumwa na bakalamba bambi abafulilako mu Yerusalemu.

Mu nshita sha muno nshiku Ibumba Litungulula lyaishibikilwa mu kupalamisha na babomfi baliko bakalemba ba fyebo (editorial staff) aba Watch Tower Society ne bumba lya liko ilya bangalishi. Lelo Ibumba Litungulula lyalipusako ukufuma ku cibombelo ca mwi funde, nga fintu kalanda asonteleko ukuti: “Apantu ukubako kwa cibombelo kwaba mu cine cine kwa mwi funde, mu kuba ne fishinte fyaimikwa ifya mpanga, kuti fyasalanganishiwa kuli Kaisare, Ubuteko.” Te ifyo kwi Bumba Litungulula, ilishaba cikwatwa ca mwi funde lelo ifilundwa ifyo “ifisontwa ukupitila mu mupashi wa mushilo pe samba lya butungulushi bwa kwa Yehova na Kristu.” Muli fyo, Ibumba Litungulula litwalilila ukubomba no kupokelela ukwafwilisha kwakumanina ukwa Nte sha kwa Yehova mu kusalala kwa calo.

Amabungano ya mu Poland yasangilweko ne filundwa 5 ifya baume 12 abe Bumba Litungulula ililipo. Umo uwa bene apeele ilyashi likalamba, “Umulandu Wa Kusambilila Inkama Yashila iya Kuipeelesha kwa Bukapepa.” Mulya calimwenwe ukuti inkama ya kuipeelesha kwa bukapepa tayaba na kabili ni nkama, apantu “yaishibikilwe muli Yesu.” Kalanda alanshenye imbali mutanda isha iyi nkama yashila iyalumbulwa pali 1 Timote 3:16, no kulondolola ukuti: “Ukutesekesha kwesu ukwa nkama yashila iya kuipeelesha kwa bukapepa kulingile ukututungulula lyonse ku kukonka mu makasa ya kwa Yesu mu kupalamisha.”

Ukukonkana kubili kwacilengele ukumfwika ukuti ukuipeelesha kwa bukapepa kulafwaikwa ku bacaice na bakalamba bonse. Abafyashi balishingamwa ku kupeela abana babo ubupyani bwa ku mupashi pa kubasambilisha ukulundulula ukwishiba kwalinga ukwa calungama ne calubana. Isambililo lyabamo ubupilibulo ilya lupwa, ukusanshako ukulanshanya kwa cine cine ukwa mpika sha ku bwaice, cebo. Pa kuba lyonse abaibukila ku fishibilo fya masanso, abafyashi bafwile ukucingilila abana ukufuma ku kubishanya kwabipa, nangu fye ni mu cilonganino.

Pa lubali lumbi, nga ca kuti abacaice bali no kwikalila ku bumi bwa kulambula, bafwile ukulolesha kuli Kristu, ‘uwabashiilile ica kumwenako ku kukonka mu makasa yakwe mu kupalamisha.’ (1 Petro 2:21) Mu kulingisha, baipushiwe ukuti: “Nga ca kuti mwakushiwa mu cine, mwalishiba cintu mwasumina, lelo bushe mwalishiba umulandu?” Bakoseleshiwe ukucite icine ukuba icabo pa kuishinina abene ukuti Baibolo Cebo ca kwa Lesa no kuti Inte sha kwa Yehova mu cituntulu e bakwata icine.

Mu fyalo ifingi uku kulanshanya kwapwilile mu kuba no kukakula kwa citabo icipya ica mabula 320 Questions Young People Ask—Answers That Work. (Twapapata moneni umukululo uli muno, “‘Ubupe Ukufuma Kuli Yehova’ ku Bacaice.”) Cilesubilwo kuti abacaice mu Poland na mu fyalo fimbi ifya ku Eastern Europe kasuba kamo na bo bakaba na maka ya kubelenga cene mu lulimi lwabo lwine.

Sobota w Katowicach (Pa Cibelushi mu Katowice)

Katowice cifulo ca pa kati ica fya maindasitri pa kati ka ncende sha malasha isha ku kapinda ka kulyo aka Poland. Imigoti ya malasha iya mu Silesia yalilenga ifya bunonshi ukulumbuka muli ilya ncende. Lelo ilyashi likalamba ilya kulanshanya pa kati ka bantu 65,710 mu Slaski Stadium August wapwile lyali kunonka kwa musango wakulisha.

“Ukuipeelesha kwa Bukapepa Kupilibulo Bunonshi Bukalamba,” umutwe wa pa Cibelushi, waishile ku kulondololwa kuli kalanda wa kubalilapo pa kukumana kwa mu cungulo. (1 Timote 6:6) Ukwebekesha bucine bwa mashiwi ya kwa kalanda kwali kwipusha kwa bantu umo umo abakumanya ubunonshi bukalamba mu bumi bwabo bwine pa kukonkelela ukuipeelesha kwa bukapepa.

Mu kati ka programu wa mu lucelo, ukumwenamo kwa kukonkelela ukuipeelesha kwa bukapepa kwalyebekeshiwe mu kukonkana kwa malyashi. “Pa Kubelenga Lyonse [Icebo ca kwa Lesa] Mu Kuba No Kwiluka,” ukufwayafwaya mu bupilibulo bwa cintu tulebelenga, kabili mu kubamo ipepo ukulanguluka ifyo twingabomfya cintu tusambilila, ifwe nga Abena Kristu twaliba na maka ya kukonkelela ukuipeelesha kwa bukapepa “Pa Kuleka Lyonse Ulubuuto Lwesu Ukubalika.” (Yoshua 1:8) Calimwenwe ukuti nga ca kuti umo umo uwa Nte sha kwa Yehova aali no kupoosa amaminiti 15 cila bushiku mu kulanda kwa mu lyashi, amaawala yalundwapo 327 amamilioni kuti yapooswa mu mibombele ya kushimikila Ubufumu cila mwaka.

Ukuipeelesha kwa bukapepa na kabili kulakonkelelwa “Pa Kucincintile Tunko.” Ifintu ukupala ifya kulya, ifya kunwa, ubwamba, nelyo indalama, nangula tafyabipa mu fine fyeka, kuti fyabe fyabipa pe samba lya mibele ishalinga. Inshila ya kuicingilila yaba kusengauka ukuisansalika kwa umo ukushakabilwa ku fikwatwa fya ku mubili, ukutambe fikope fya bwamba, imiti ikola, na bucakolwa, pamo pene no kufimbilikisha kwa kuko ukwa musamwe, pamo nge nyimbo, ifyangalo, ne milandu ya kwangalila capamo. Ipepo lyabe lyacindama. Abena Kristu bafwile ukusambilila ukupata icabipa. Ici calibe calinga, apantu kalanda wakonkelepo asonteleko ukuti balingile “Ukwikalilila Te ku Kufwaya kwa Muntu lelo ku Kufwaya kwa kwa Lesa.”

Abantu abafulilako balepingulapo ukucite ico cine fye. Ici calimonekeshe lintu Inte ishipya 2,663 apabuuta balumbulwile umupampamina wabo ku “Kukonkelela Ukuipeelesha kwa Bukapepa pamo nga Bena Kristu Baipeela, Ababatishiwa.” (Pa mabungano yonse yatatu mu Poland, abaleya ku lubatisho bali ubwingi bonse 6,093.) Pa kusungilila ubuseko mu mulimo wa kwa Yehova, abo abali mupepi no kubatishiwa balikoseleshiwe ukwetetula pa milandu iingi iya kubelapo aba buseko: Bucibusa na Yehova, bumunyina bwabo ubwa mu kusalala kwa calo, ne subilo lya bumi mu Paradise.

Ukunakila kwa Bena Kristu kwalishileko mu kulanshanya kwa lyashi “Ukulangisha Imilimo ya Kuipeelesha kwa Bukapepa—Nga Baume Pe Samba lya Bumutwe bwa kwa Kristu.” Abaume ababelesha ukuipeelesha kwa bukapepa bakasakamana imilimo ya lupwa mu kubamo ukutemwa, mu nshila yapala iya kwa Kristu. “Nga Banakashi Ukulangisha Ukunakila Kwalinga,” bankashi shesu aba Bwina Kristu bakaba aba kwafwilisha, te ba kusonga umutwe wa lupwa mu cilubo nelyo ukuleka ukukuntikilwa ukubapumbwila mu kucito kupingulapo kushili kwa mano. “Nga Bana Abomfwila Abafyashi,” abanono bakasambilila icumfwila, pa kulandapo pa kulongana, no kwakana mu butumikishi bwa Bwina Kristu.

We kufunda kwawamisha! Ee, ifyo ubutotelo bwa bufi mu kubamo ubulanda bwalifilwa ukupeela ubutungulushi bwa musango yo ubwalinga! Pali ici, bwaliwaminwa ukusenukwa mu kukosa, ukwaleisa mu lyashi “Ukusansalika ‘Umuntu wa Bupulumushi.’” Uyu ‘muntu’ wa mu nkama alishibikwe ngo “wabamo abengi, bashibutotelo bonse aba kwa Kristendomu wa busangu.” Abalumbuka ku kupakasa kwabo ukwa babomfi ba kwa Lesa, bashibutotelo nomba balilundwako na “basangu ba muno nshiku, abo kale baitungile ukube Nte [lelo abo] ababwelelamo ku malushi ya fisambilisho fya Kristendomu kabili balibombela capamo na bacakolwa ba ku mupashi aba Babiloni Mukalamba mu kuba no kusansa ibumba lya babomfi ba busumino ilya musha wa cishinka kabili uwashilimuka ilya kwa Yehova.” Ukuwelesha kwalangilile ukusuminisha ilintu kalanda abilishe ukuti: “Tukatwalilila ukusansalika Babiloni Mukalamba no ‘muntu wa iko uwa bupulumushi.’”

Ici cifwaya ukushipa, ukucilisha pa nshita lintu, ukulingana na M. G. Henschel, icilundwa ce Bumba Litungulula, abantu abengi “bafutatila Lesa ne Cebo cakwe, Baibolo.” Nangula “umucinshi kuli Baibolo ilelo walibotelela nga nshi,” Baibolo yaliminina iyawamisha mu nshita yonse. Kalanda apaashishe ukuti “takwaba citabo icaletwako ku bantunse beka icingelukwa mu kushike fyo kabili no kukonkesha kwalungama.” Abilishe ukuti “Inte sha kwa Yehova basuminisha Icebo ca kwa Lesa ukubelesha amaka mu bumi bwabo [kabili] ukufumamo bumunyina bwa pa kati ka nko ubwa Bwina Kristu bwa cine cine ubwaba bushinino bwa maka ubwa kuti Baibolo Cebo capuutwamo kuli Lesa.” Ubushiku bwafikile pa kalume mu kuba no kubilisha kwa citabo cipya The Bible—God’s Word or Man’s?, icakakwilwe mu ndimi ishingi.

Niedziela w Warszawie (Pa Mulungu mu Warsaw)

Abatandashi ba Warsaw mu cinkumbawile baya ku kumona icifulo capulamo icishingalabwa ica Warsaw Ghetto yalumbuka, uko abaNazi baputawile imitwe ya myanda ya makana iya baYuda abaebelwe ukulofiwa mu kati ka Nkondo ya Calo iya II. Icingafikwako fye mu maminiti ayanono nga muli na motoka, nangu cibe fyo, X-Lecia Stadium yaiswilemo, na bantu 60,366 abaishile pa August 13, ku kumfwa amantontonkanyo pa lwa “Kaaneni Ukubulwa Bukapepa no Kwikalila mu Kuipeelesha kwa Bukapepa,” umutwe wa pa Mulungu.—Tito 2:12.

Ukwikalila mu kuipeelesha kwa bukapepa mu kumonekesha kufumyapo ukulangisha umupashi wa ku calo uwa bucaibela. Icilangililo ca cine cine “Inashisheni Mwe Bene kuli Yehova,” capeelwe mu kukaba kabili mu musango wa cine cine uwa bena Poland, ukwebekesha ukwaluka kwakabilwa uko Abena Kristu bafwile ukucita pa kupokelela ukusuminisha kwa kwa Lesa.

Icilundwa ce Bumba Litungulula caambwile 1 Abena Korinti 8:6, apasosa ukuti: “Kuli ifwe kwaba Lesa umo fye, Shifwe.” Alangile ukuti icifundisho ca pa kati ica buKristu tacaba ni Bulesa Butatu, nga fintu abengi batunga, lelo ukwebelwa kwa kwa Yehova ku Bufumu bwakwe pe samba lya kwa Kristu. “Icisambilisho ca Bulesa Butatu caba kupumbuka ukufuma ku cine, no kucisangukila,” e fintu alondolwele. Muli fyo, abantu abeta Maria nga nyina wa kwa Lesa nelyo uwa Kupaapaatilako pa kati ka kwa Lesa no muntu “tabekatilila ku kwishiba kwalungikwa.” (Abena Roma 1:28) Mu kulinganako, “ukupepa Lesa mu kulinga cipilibula ukukaana icifundisho ca Bulesa Butatu.” Ukuwelesha kwakumene no kukakulwa kwa broshuwa ya mabula 32, Czy wierzyć w Trójcę? (Should You Believe in the Trinity?) We cibombelo cishaiwamina ku kusansalika ubufi bwa ici cifundisho cisaalula Lesa!

Ipusukilo talyabalile alisa ku finakabupalu fya Warsaw Ghetto. Lelo icilayo ca kwa Lesa, nga fintu calondolwelwe mu lyashi lya Baibolo, ca kuti “Ipusukilo [Lili] Mupepi ku Bantu ba Kuipeelesha kwa Bukapepa!” (2 Petro 2:9) Ici cabe fyo nangula Abena Kristu baba finakabupalu fya lukakala lwa mbali shibili—umusango wa cila bushiku no ko ukuloshiwa kuli bene mu musango wa kupakaswa. Ukwita ku kuibebeta kwa umo, kalanda aebekeshe ukuti “ipusukilo lya abo fye ababa bantu ba kuipeelesha kwa bukapepa, abo ukuipeelesha kwabo kwaba ukwa cine cine, abo bantu icumfwila caba kulumbulula bucishinka.”

Pa numa ya kucinkulwako kwa kupelako “Ku Mitima Mube Ababilima,” ibungano lyasondwelelwe mu kuba ne lyashi lya kukumbamo pa mutwe “Ukukanshiwa Kwesu Kwatwalilila Mu Kuba No Kuipeelesha kwa Bukapepa kwa Bunonshi.” Ababungene lyene baiswile ifitabo fipya ifya nyimbo ishipya isha ciPolish, e lyo fyapulintilwe fye pali mashini ya kupulinta imilingu fye iinono mu kubangililako, kabili mu kwikatana bapeele “Ipepo lya Kutasha” mu musango wa lwimbo 45.

Ipepo lya kwisalila ilyasakamanisha lyalikonkelepo, kabili ukuwelesha kwa kubamo icibulukutu kwalitendeke pa Warsaw, Poznan, na Katowice. Mu Warsaw ukutoota kwa maka ukwa makumi ya makana kwakonkele pali kumo no kunankwe pa maminiti yamo 11. Takwali nangu umo uwafwaile ukuya, no kusekelela kukalamba, ukwalumbulwilwe nga nshi ukwa kusamwa ukwa ili bumba lya Nte, ilyo abengi aba bene ukucila pa myanda ya makana balesangwa kwi bungano lyabo ilya kubalilapo ilya nshiku shitatu, kwali kulumbulula kwa kutambwa pa kutasha kwabo kuli Yehova na ku kuteyanya kwakwe. Cali kwati kwankulako kwi Ilumbo 47:1, 2 apatila: “Mwe bantu na bantu bonse, ombeni amakuku, welesheni kuli Lesa mwi shiwi lya kwaula; pantu Yehova Wapulamo wa kutiinya, ni Mfumu nkulu pano isonde ponse.” Ilintu ica kucitika cawamisha nga nshi mu lyashi lya muno nshiku ilya Nte sha kwa Yehova calepalamina ku kwisalika, abo bamunyinifwe bacincila bapekenye ulwendo lwa kubwelela ku mayanda, imitima yabo ukusempaukamo ne nsansa no mupampamina wa kuya mu mutande wa kucitilo bunte ku Bufumu bwawama mu kuba ne ca kumwenako caumo mutengo ica kwa Yesu ica kuipeelesha kwa bukapepa.

[Akabokoshi pe bula 27]

Ifikakulwa Ifipya Ficincisha ku ‘Ncitilo ya Kuipeelesha kwa Bukapepa’

Icitabo cipya The Bible—God’s Word or Man’s? na broshuwa Should You Believe in the Trinity? fyonse fyabalamwine inumbwilo sha kutasha. Nkashi alemba ukukuma kuli broshuwa wa Trinity ukuti: “Nalipapushiwa, ukucincimushiwa, kabili uwasekela muli yene. Natasha ku nshita, amaka, no mulimo ukalamba ifyabikilwe mu kupulinta ulu lupapulo lwawamisha.”

Nkashi na umbi alembele ukukuma ku citabo ca The Bible—God’s Word or Man’s? ukuti: “Ndefwaya ukumutasha ukufuma pe samba lya mutima wandi kuli ici citabo cipya icawamisha. Ndapapa, bushe mwaishiba fintu waba mulimo wa kulamuka uwa ciko? Lyonse ndashila pe samba lya mashiwi yacindama. Lelo mulampelenganya pantu ishiwi ilili lyonse lyalicindama. E lintu fye mpwile icipandwa 5, lelo ningile ukusosa ati natasha.”

[Akabokoshi pe bula 30]

‘Ubupe Ukufuma Kuli Yehova’ ku Bacaice’

Ulubali lwapulilemo pa mabungano mu United States na mu mpanga shimbi lwali kukuma ku lubali lwa cungulo pali Cisano, lintu imisepela pa kati ka myaka ya bukulu 10 ukufika kuli 19 baipushiwe ukwikala mu lubali lwasungilwe pa mbali. Pa numa ya kukonkana kwa malyashi, umo umo alipeelwe kope wa pa fye uwa citabo cipya Questions Young People Ask—Answers That Work. Mu kusalala kwa calo, amakope yamo 8,840,000 yalikakwilwe mu ndimi 21, kabili imyanda ya makalata ya kutasha yalipokelelwa!

“Pa mabungano ya ku numa, kwalebako amalyashi ayalepeelwa ukulola ku misepela,” e fyalemba umo umukashana wa myaka yacile kumi, “lelo ica kufumamo ica kukwata bonse aba ifwe ukwikala capamo cali icishingasuminwa.” E fyalemba na umbi uwacaice ukuti: “Naileikala mu ciputulwa ca misepela. Nalikoseleshiwe nga nshi kuli ci ica kuti, ukutula lilya, ndalembe fyebo pa kulongana, ukusambilila mu kucililako, no kulandapo. Ndetontonkanya pa lwa lubatisho luno lusuba.”

Ku misepela iingi, icakukumanya cali ca kucitika capulamo. “Lintu kalanda abilishe ukuti tulingile ukwikala mu ciputulwa caibela,” e fibukisha umukashana umo, “Nalishibe ukuti icintu cimo icawamisha cilecitika. Lintu babilishe ukukakulwa kwa citabo, nayumfwile uwasansamuka nga nshi nafwaile ukulila. Nalishibe lyonse ukuti mulasakamana pa lwa ifwe imisepela, lelo ici calishikile mu mutima wandi. Ici citabo e cintu fye twakabile!”

“Calilembwa bwino nga nshi,” e fisosa umusepela we shina lya Leah, “kabili ifikope fya cine cine kabili mu cituntulu fikulenga ukutontonkanya.” Ifyakakwilwe pe bungano ifya citabo fyakwetemo ubukombe ubwipi ukufuma kwi Bumba Litungulula ukuloshiwa “Ku Nte Shonse Shacaice isha kwa Yehova.” “Nalikuntilwe kuli ilya kalata,” e fisosa Andreá. “Kuli ine cumfwika ukupala umuntu umo uyo Yehova asalile ukwikala na wene mu mulu mu cine cine ukulanda kuli ine!”

Abengi batashishe ukuti icitabo capeelwe ngo bupe. E fibukisha umufyashi umo: “Nalililile. Bamunyina, basano aba abo bacaice pabula bali bandi, aba mishinku ya 11 ukufika ku 16. Nga nakumanishe ku kusangwilako fye ku fitabo fibili.” E fyalemba umusepela uwe shina lya Mark ukuti: “Natendeke ukupenda ni shinga shali no kupooswapo ukupeela kope ku mwaice umo umo, lelo lyene naishibe ukuti ubutungulushi buli mu kati bwalyumo mutengo. Nga ca kuti icitabo caafwa fye umusepela umo uwapumbulwa ukubwelela pa musebo uutungulula ku bumi nelyo, mu kuwaminako, caafwa ubwingi ubwa ifwe ukwikala pali uyo musebo, caliwaminwa uyo onse umutengo.”

Imisepela iingi yatendeke ukumwenamo ukufuma mu citabo apo pene fye. “Nasangilwe kwi bungano lyesu July 7-9,” e fisosa umusepela umo, “kabili ukufika pali Cimo, July 10, nalipwilwe cene!” Umbi asosele ukuti: “Ifipandwa fibili ifya kulekeleshako mu cituntulu fyalinkoseleshe ukutendeka ukubuula ubumi bwandi ukuba ubwacindama. Limo nalefwaya ukubatishiwa lelo nalyalwile ukutontonkanya kwandi. Nomba apo nalipokelela ulu lupapulo lwa kupapusha, nalishiba ukuti ‘icalo cilepita’ kabili cintu ndekabila kubuule ncitilo nomba.”

“Pa mulandu wa kuti nshita nashaluka,” e fyalembele umukashana umo, “lyonse natontonkenye ukuti abakalamba tabaishiba ifyo tuyumfwa. Tamwishibe ifyo ndi uwa nsansa ukumona ukuti ico cali icalubana. Ukusakamana kwenu ukulola kuli ifwe fwe baice kunenga ukuyumfwa kwati nalicindama.” E fyalembele ibumba lya misepela ukufuma ku Sweden ukuti: “Tuleyumfwa ukuti mulatumfwikisha fwe misepela, na ifwe bene tuleyumfwa abacilapo ukupalamina kuli imwe.”

Umusepela umo wacisupawilile bwino lintu wasosele ukuti: “Munyinane na nkashi yandi na ine twalitemwa icitabo. Tuleyumfwa ukuti caba bupe mu kulungatika ukufuma kuli Yehova.” Cili lipepo lyesu ukuti ubu bupe bukatwalilila ukubomba kwi paalo lya misepela iitiina Lesa.

[Charti pe bula 29]

Ukuipeelesha kwa bukapepa Kuli pa Kwingilishiwako mu Europe!

1979 1984 1989 1979 1984 1989

AUSTRIA 17,847 20,908 25,153 236 257 307

BELGIUM 23,185 28,456 30,622 234 248 429

BRITAIN 113,910 137,008 160,704 605 937 1,344

DENMARK 21,057 23,267 24,645 122 147 249

FINLAND 20,293 23,501 25,679 215 302 329

FRANCE 89,073 110,745 156,751 1,361 1,856 3,201

GERMANY 129,342 140,681 159,819 1,154 1,009 1,694

ITALY 117,163 169,328 240,041 2,515 3,769 6,295

LUXEMBOURG 1,141 1,327 3,131 8 12 61

NETHERLANDS 36,768 42,060 44,185 126 143 271

NORWAY 10,327 11,352 13,829 107 159 294

POLAND — 94,134a 166,518 — 3,140b 6,093

PORTUGAL 35,108 47,843 59,797 862 1,068 1,546

SPAIN 62,201 84,706 115,981 1,278 1,521 2,935

SWEDEN 21,286 25,204 30,943 279 323 410

SWITZERLAND 14,455 17,457 23,867 130 225 349

UBWINGI BONSE 713,156 977,977 1,281,665 9,232 15,116 25,807

[Amafutunoti]

[Icikope pe bula 26]

Ukukakulwa kwa broshuwa wa “Trinity” kwali ni ntulo ya kusekelela mu Warsawr

[Icikope pe bula 31]

Inte shipya ishaipeela mu Katowice balekonkelela ukuipeelesha kwa bukapepa pa kubatishiwa