Bushe Ukamwenamo Ukufuma Mu Nkumbu Sha Pa Fye?

“UKUCILILAKO nasambilile ifishinte fya kwa Lesa muli Baibolo, e kucepelako nayumfwile uwawaminwa ukusenamina kwakwe ne paalo,” e fyasosele Frank. Ubuseko bwakwe muli Baibolo bwalicincimushiwe lintu aali mu cifungo pa milandu ya miti ikola. Abelengele kope wa citabo ca Icine Icitungulula ku Bumi bwa Ciyayaya,a ayumfwile uwashininkisha ukuti cintu casosele cali e cine, kabili, pa numa ya kulekelwako ukufuma mu cifungo, akumenye Inte sha kwa Yehova ku kusambilila ifyafulilako pa lwa Baibolo.

Mulandu nshi ukusambilila Baibolo kwamulengele ukuyumfwo uushawaminwa? Pa mulandu wa kuti umusango wakwe uwa bumi uwa ku numa walitobele ifishinte ifingi ifya kwa Lesa. Ukubomfya bubi bubi imiti ikola, ukubomfya bubi bubi ifya kunwa fikola, ne misango imbi iyalekanalekana iya kubotelesha yamuletele mu musango waboteleshiwa nga nshi ica kuti pa kashita kamo kapokola asosele kuli wene ukuti: “Napapata bushe kuti wanjeba adresi ya ku ŋanda wikala? Ndefwaya fye ukwishiba ukwakutuma icitumbi cobe!”

Icamulengele pa numa ukuyumfwa uwacilapo ukukanawaminwa, nangu ni fyo, cali ca kuti te mulandu no kwesha na maka, acisangile icakosa nga nshi ukucimfya iyi misango yashika iishasanguluka. Ukwikata kwa kubotelesha ukwa fya kunwa fikola, ku ca kumwenako, kwali mupepi no kumucimfya. “Nalifililwe icabipisha libili libili kabili nali uwapopomenwa nga nshi,” e fintu asosele. “Napene fye no kuipaya, ukuyumfwa uwa fye.”

Bambi pambi tabakwata ifyapita ifya musango yo nga fintu Frank akwete. Lelo kuti, nangu ni fyo, bakwata ukuyumfwa ukukanalinga. Ici kuti pambi caba pa mulandu wa kuti baimikile ifipimo fyasumbuka ifyabulo kupelulula ilintu baleesha ukwikalila ku cintu bayumfwa ukuti e fyo Lesa afwaya. Lintu bafilwa, bayumfwa aba mulandu. “Ukuyumfwa ba mulandu kuti caba icakukumanya cabipa,” e filondolola Dr. Claire Weekes mu citabo cakwe Self-Help for Your Nerves ukuti, “ukucilisha kuli abo abesha ukuimikile ifipimo fyasumbuka.” Cinshi Umwina Kristu engacita nga ca kuti ayambukilwa no kuyumfwa kwa musango yo ukwa kukanawaminwa?

Tesekesha Inkumbu Sha Pa Fye

“Icintu cimo icangafwile apakalamba,” e fisosa Frank, “cali kutesekesha cintu Baibolo isosa pa AbaHebere 4:15, 16.” Umutumwa Paulo palya atucinkulako ulwa kwa Yesu ukuti aba kaafwa usakamana ‘uwingatulangulukilako ku mabunake yesu’ kabili uwacilenga ukucitikako kuli ifwe ukuti ‘tumone inkumbu sha pa fye no kusango kusenamina ku kutwaafwa pa nshita ya kukabila kwesu.’

Bushe kuti wafwaya ulufungulo lwa kucimfya ukuyumfwa kwa kukanawaminwa? Ni ulu: Ibukisha ukuti Yehova Lesa na Yesu Kristu balishiba ukuti twalinaka pa mulandu wa kukanapwililika kwapyanwa. Balomfwikisha ukuti te kuti tufikepo mu kupwililika pa fipimo fyalungama. (Ilumbo 51:5; Abena Roma 3:23; 5:12, 18; Yakobo 3:2) E ico kanshi tabenekela ifyafula ukufuma kuli ifwe ukucila pa fintu twingapeela. Balolesha pa fisuma fyesu, te pa mabunake yesu. Kemba wa malumbo aipwishe ukuti: “Amampuulu nga mwayamwensekesha, mwe Yehova, mwe Shikulu, ni ani uwingeminina?” (Ilumbo 130:3) Kuti watesekesha ukuti takuli uwa ifwe uwingeminina. Ukupitila mwi lambo lya cilubula ilya kwa Yesu Kristu, nangu cibe fyo, Yehova mu luse kuti atupeela ukwiminina kusuma te mulandu no kukanapwililika kwesu. (1 Yohane 2:2; 4:9, 10) Kuti twapokelela “ukulekelelwa kwa mampuulu”—na muli fyo ukwafwiwa ku kucimfya ukuyumfwa ukuli konse ukwa kukanawaminwa—“umwabelo bucindami [bwa nkumbu sha pa fye, NW].”—Abena Efese 1:7.

Lolesha pali ci muli iyi nshila. Abantu abatemwa imilimo ya kulenga baya ku fipimo fyalepa ku kubwesha ifyalengwa fyaonaika icabipisha nelyo imilimo imbi iya kulenga. Lintu, ku ca kumwenako, mu National Gallery iya mu London, England, umuntu umo mu kuba ne mfuti aonawile icilubi ca Leonardo da Vinci ica mutengo wa £20 milioni (mupepi na $32 milioni aya U.S.) takwali nangu umo uwatubulwile ukuti apo icalengwa nomba naconaulwa, cilingile ukupooswa. Ukubomba kwa kulenga cipya cipya ukwa mulimo walamuka uwakokola imyaka 487 kwalitendeke mu kwangufyanya. Mulandu nshi? Pa mulandu wa kuti cali icaumo mutengo mu menso ya batemwa ukulenga.

Bushe tauli uwacindama ukucila pa ca kulenga ca coko ne mfita? Mu menso aya kwa Lesa mu cituntulu waliba uwacindama—te mulandu no konaulwa pambi wingaba ku lubembu lwapyanwa. (Ilumbo 72:12-14; Mateo 20:28) Yehova Lesa, Kabumba wa kutendekelako uwalamuka uwa lupwa lwa mutundu wa muntu, akacita icifwaikwa ku kubwesha cipya cipya ifilundwa fyapwililika ifya ulo lupwa abali abaitemenwa ku kwankulako ku kusakamana kwakwe kwabamo ukutemwa.—Linganyeniko Imilimo 3:21; Abena Roma 8:20-22.

Ankula ku Nkumbu Sha Pa Fye

Konka ica kumwenako ca mutumwa Paulo. Atesekeshe apakalamba inkumbu sha kwa Lesa mu kumulekelela mu luse ifilubo fyakwe ifyapita pamo pene no kwafwilisha kwatwalilila mu kushomboka kwakwe ku kucimfya ubunake bwabwekeshiwabweshiwapo. (Abena Roma 7:15-25; 1 Abena Korinti 15:9, 10) Paulo alilungike inshila yakwe iya bumi no ‘kututaulo mubili wakwe no kuuteko busha’ na o ku kwikalilila pa nshila yasuminishiwa na Lesa. (1 Abena Korinti 9:27) Talekele umubili wakwe, mu kuba no lubembu lwa uko ulwa buntunse no kukongama kwa nkuntu, ukumutungulula ngo musha.

Pokelela inkumbu sha pa fye isha kwa Lesa, kabili leka shikutungulule ku kulapila. (Abena Roma 2:4; 2 Abena Korinti 6:1) Nga ca kuti ifilubo fya ku numa filekucusha, fishibe kabili lyene cetekela mu kwebekesha kwa kwa Yehova ukwa kuti nakweleela. (Esaya 1:16-18; Imilimo 2:38) Nga ca kuti ubunake bwatwalilila bulekupama, twalilila ukubulwisha. Mu mukoosha pepela ukwaafwa kwa kwa Yehova ku kubucimfya ilintu pa nshita imo ine uleipoosa pa luse lwakwe. (Ilumbo 55:22) Ukushimpa pa cakukumanya cakwe cine, Frank apanda amano ukuti: “Ilintu umuntu umo pa kashita kamo afilwa mu kulwisha kwakwe imisango imo iyabipa, talingile ukuimona ngo kufilwa kwa mupwilapo, ukufilwa kwa kupelako, ukucila, ngo kubwelele numa ukwa pa kashita akepi.” Nga ca kuti bambi balundapo ku mpika shobe pa kufwaya ifyafulisha ukufuma kuli iwe ukucila pa fyo wingapeela, ibukisho kuti caba ni Lesa e o uleesha ukusekesha, te bantu.—Abena Galatia 1:10.

Mu kulwisha kobe ku kucita icalungama, ibake ku “ncitilo sha bucenjeshi” isha kwa Satana, ishingetwa “amapange yabipa aya kwa Ciwa.” (Abena Efese 6:11, Reference Bible, futunoti; Today’s English Version) Languluka “amapange yabipa” yabili ayo akabomfya ku kwesha ukukupusula ukumwenamo kwa nkumbu sha pa fye.

“Amapange Yabipa” aya kwa Satana

Ciwa abomfya ukuyumfwa uushawaminwa ku kwesha ukukufumya kuli Lesa. Satana e ntulo ya lubembu ulo lwakonawile mu kubalilapo. Nomba kuti pambi aesha ukukoselesha ukuyumfwa ukuti uli uushawaminwa mu menso ya kwa Lesa, nga fintu Bildadi aeseshe ukucita kuli Yobo. (Yobo 25:4-6; Yohane 8:44) We nkondo ubwingi ishalufiwa pa mulandu wa kuti abashilika baingile mu bulwi ababongololwa kale kale! E co, wileka Satana akubongolole. (Abena Efese 6:10-13) Pa kubo waibukila ulwa mapange ya kwa Satana kulingile ukukucincimusha ukulwisha na maka yonse ku kucita icalungama.—2 Abena Korinti 2:11.

Nga ca kuti pa kashita kamo ulalengwo bulanda pa kufilwa ukwa musango umo nelyo uunankwe, shininkisho kuti ‘taufimbilikishiwe ku kucishamo ukusakamana.’ (2 Abena Korinti 2:7) Dr. Claire Weekes alandilepo pa kukongama ukwa bamo ku kuleka ukuyumfwa kwapita ukubafimbilikisha atile: “Ukuleka ukuyumfwa uwa mulandu ukwapita ukukonaula incitilo sha ndakai kuli mikalile ya konaula.”—Moneni Imilimo 3:19.

Nga ca kuti kuti twakumanya ififwaikwa fyonse ifya kwa Lesa mu kupwililila, kuti caba ni nkumbu sha pa fye kuli wene ukutupeela amapaalo alaya. Lelo Yehova Lesa na Yesu Kristu baletulanga inkumbu shabo “isha pa fye.” A Greek-English Lexicon of the New Testament, kuli J. H. Thayer, cilondolola ubupilibulo bwe shiwi lyabomfiwe no mutumwa Paulo ku kulondolola uyu musango wa kwa Lesa ukuti: “Ishiwi [khaʹris] lyakwatamo itontonkanyo lya nkumbu ilishibikwa pali umo pa cintu ashawaminwa.” Takwaba milimo pa lubali lwesu iinganonka ipaalo lya kwa Lesa. Caba, nga fintu Paulo asosa, inkumbu sha pa fye. Nga ca kuti uli umufumacumi mu kucita fyonse ifyo wingacita ku kufikilisha ukukakililwako kobe kuli Lesa, mu kati ka kupelebela kobe, bo wa nsansa ukucite co. Yehova te pusha ifyafula kuli iwe.

Bo waibukila, nangu cibe fyo, ulwa “mapange yabipa” yambi aya kwa Satana. Alufya bambi mu kutontonkanya ukuti kuti bashukila inkumbu sha pa fye isha kwa Lesa, kabili balyo mundemwa pa luse lwakwe. Yehova mu kubamo ukutemwa aleleela amabunake yesu, lelo ico tacipibulo kuti tulingile ukuleka ukulwisha ku kucimfya yene. Paulo alondolwele bamo “abanyanyantilo Mwana wa kwa Lesa no . . . kusuulo mupashi wa nkumbu sha pa fye.” (AbaHebere 10:29, NW) Aba balangile ukubulwo mucinshi ku fishinte fyalungama kabili mu misuula ukusuusha amafunde ya kwa Lesa, ukuibika abene pa kukanabweshiwa cipya cipya. Munyina wa kwa Yesu Yuda, uwamwene ubusanso ubwalengelwe na abo batumpikwa kuli Satana, alembele ukuti: “Abantu bamo basokelelamo [mu cilonganino], . . . abashipepo, abasangule [nkumbu sha pa fye isha, NW] kwa Lesa wesu bucilende.”—Yuda 4.

Satana kuti atumpika aba musango yo mu kutontonkanyo kuti kuti baibimbamo mu kucishamo nelyo panono mu ncitilo shabipa kabili lyene ukwipusha Lesa ukweleela ulubembu lwabo. Lelo Yehova takeleele bakatoba ba mafunde yakwe aba ku mufulo aba musango yo. “Alifula inkumbu shabamo ukutemwa” kuli abo abesha ukubombesha ku kumubombela ukucite cisuma ukufika pantu bengapesha te mulandu no kukanapwililika kwabo. “Lelo takabale asesesha pa mbali ukukanda,” lintu inshita yafika.—Ukufuma 34:6, 7, NW.

Kuti Wamwenamo Ukufuma Mu Nkumbu Sha Pa Fye

Calibe ica kusansamusha ukwishiba ukuti Yehova takumona fye mu mibele ishapwililika, iyaonaika. Alishiba cintu wingaba lintu amaka ya kubwesha cipya cipya aye lambo lya cilubula ca kwa Yesu yabomfiwa mu kukumanina. Mu kucetekela pepa kuli Yehova, kanshi, nga fintu kemba wa malumbo Davidi acitile. “Mumbelele uluse, mwe Lesa,” e fyasosele Davidi, “umwabele [nkumbu shenu isha pa fye, NW]; umwabelo bwingi bwa nkumbu shenu, paseni ifya bupulumushi fyandi. Nsambeni bwino ku mampuulu yandi, na ku lubembu lwandi nsangululeniko. Pantu ifya bupulumushi fyandi ine nalifiishiba; no lubembu lwandi luli pali ine pe. Fiseni icinso cenu ku membu shandi, na mampuulu yandi paseni . . . Umutima uwalopota uwafunshika tamwakausuule, mwe Lesa.”—Ilumbo 51:1-3, 9, 17.

Ubupulumushi bobe no kufilwa kuti pambi fyaba pa ntanshi yobe lyonse. Pa nshita shimo pambi kuti wayumfwa ngo mwana monaushi uwalondololwa na Yesu. Lintu umulumendo abwelele ku ŋanda pa numa ya konaula mu kubamo nsoni ifya bupyani bwakwe mu fifulo fya cilendo, alilile kuli wishi ukuti: “Nshawamina ukwitwo mwana wenu kabili iyo”! (Luka 15:21) Uyu mulumendo alikwete imibele yalungama, nangu cibe fyo. Nalyo line takeene inkumbu sha kwa wishi nelyo ukwesha ukushishukila. E co wishi mu kubamo ukutemwa alimupokelele mu cinshingwa-ŋanda. (Luka 15:20-24) Yehova alibo wa nsansa ukucita cimo cine ilelo ku bantu babembu abo mu bufumacumi besha ukucito kufwaya kwakwe.—Ilumbo 103:8-14; Esaya 55:7.

Frank tasuminishe ukuyumfwa kwa kukanawaminwa ukumufimbilikisha. Alyankwileko ku nkumbu sha pa fye isha kwa Lesa, kabili nomba abomba ngo mubomfi utumikila mu cilonganino ca Nte sha kwa Yehova. “Ndaciluka pa mulandu wa buseko nomba,” e fyo asosa, “lintu ntontonkanya cintu Yehova Lesa na Yesu Kristu bacita nomba na cintu bakatucitila!”

[Amafutunoti]