Ifipusho Ukufuma ku Babelenga

◼ Bushe tulingile ukusondwelela ukufuma pali Mateo 7:13, 14 na Luka 13:24 ukuti nelyo fye ni mu kubuuka, abantunse abengi bakakaana ukupepa kwa cine?

Iyo, ifi fikomo tafyafwilisha iyo nsondwelelo. Ukucila, fyaampana ukucilisha ku kunonka ubumi mu Bufumu bwa mu mulu.

Amashiwi ya kwa Yesu pali Mateo 7:13, 14 yali lubali lwa Lyashi lya pa Lupili. Atile: “Ingileni pa mpongolo ya kamfyemfye: pa kuti impongolo yasalala, kabili inshila yapabuka iitwala ku boni, kabili bengi abengilako. Lelo inshila iitwala ku mweo ya kamfyemfye kabili yalifyenenkana, kabili banono abaisanga.”

Ifingi ifyo Yesu asosele pali aka kashita fyaampene ukucilisha ku Bufumu bwa ku mulu. Ku ca kumwenako, atendeke na mashiwi ya kuti: “Aba nsansa ni abo abali abaibukila ku kukabila kwabo kwa ku mupashi, pantu ubufumu bwa mu mulu bwabo.” Asosele ukuti abasanguluka mu mutima baali no “kumona Lesa” kabili ukuti “ubufumu bwa mu myulu” bwa abo “abapakaswa pa mulandu wa bulungami.” (Mateo 5:3, 8, 10, NW) Pa numa mu lyashi limo line, Yesu alandile ulwa nshila yasalala iitwala ku boni ne nshila ya kamfyemfye iitwala ku bumi. Lubali lumo, alundileko kuti: “Te onse uutila kuli ine, Shikulu, Shikulu, akengila mu bufumu bwa mu mulu iyo, kano uucite cifwaya Tata wa mu mulu.”—Mateo 7:13, 14, 21.

Ubupilibulo bwa kwa Luka 13:24 buli ubwapalako, nga fintu calangwa ku mashiwi yashingulukako. Yesu apeele ifilangililo fibili pa lwa “bufumu bwa kwa Lesa.” Pa numa, aipushiwe ukuti: “Mukwai, abapusuka bushe banono?” Yesu ayaswike ukuti: “Pilikiteni ukwingila pa mwinshi wa kamfyemfye; ico, ndemweba, nati, abengi bakafwayo kwingila, lelo bakafilwa.” “Abengi” cilosha ku bantu abapapete ukwingila pa numa umwinshi ube nawisalwa no kukomwako. Aba baali “bakacita wa fibi” abashali abalinga ukuba pamo na “Abrahamu, na Isaki, na Yakobo, na bakasesema bonse, mu bufumu bwa kwa Lesa.” “Abengi” batontonkenye ukuti baali no kuba aba ntanshi “mu bufumu bwa kwa Lesa,” lelo mu cine cine baali no kuba aba kulekelesha, mu kushininkisha ukupilibula ukuti tabali no kubamo nangu fye panono.—Luka 13:18-30.

Amashiwi yashingulukako yalango kuti Yesu alebomba no kwingila mu Bufumu bwa mu mulu ubwa kwa Lesa. Intungulushi sha ciYuda ku numa kulya baipakishe pa nshita ntali icifulo ce shuko, mu kuba ne nshila ya kufikila ku Cebo ca kwa Lesa. Bayumfwile ukuti baali abakankaala lwa ku mupashi kabili baali abalungami mu menso ya kwa Lesa, mu kucilana na bantuuntu fye, bantu basuulile. (Yohane 9:24-34) Nalyo line, Yesu asosele ukuti abasangushi na bacilende abapokelele ubukombe bwakwe no kulapila kuti bakwata ukusuminisha kwa kwa Lesa.—Linganyeniko Mateo 21:23-32; Luka 16:14-31.

Abantuuntu fye ababele abasambi ba kwa Yesu baali mu mutande wa kupokelelwa nga bana aba ku mupashi lintu ubwite bwa ku mulu bwaiswike pa Pentekoste 33 C.E. (AbaHebere 10:19, 20) Nangu cingati bacinkupiti abengi balyumfwile Yesu, abo abamupokelele na pa numa ukunonka isubilo lya ku mulu baali abanono. Lelo umukuni unono uwa bantunse abafyalwa ku mupashi abapokelela cilya cilambu kuti walinganishiwa kuli Yakobo ukukuwama pe tebulo mu mulu pamo na Yehova (Abrahamu Wacilapo bukulu) no Mwana wakwe (uwacitilwako icikope kuli Isaki). Ico mu cishinka cali icawamina ukupilikita na maka, lelo abengi abaumfwile Yesu tabacitile fyo.

Mu kukonkapo, kuti twamona ukufuma ku mashiwi yashingulukako mu milandu yonse ibili ukuti ukulandapo kwa kwa Yesu (pa lwa banono ukuba pa nshila ya kamfyemfye iitwala ku bumi no kupusuka) kwaampene maka maka ku kukwata ukusuminisha kwa kwa Lesa pali ilya nshita lintu Wene aletambike subilo lya bumi bwa ku mulu. Banono mu kwampanako abaumfwile ubukombe bwa cine no kusambilila icali icafwaikwa e bayankwileko no kushininkishiwa aba busumino.—Mateo 22:14; 24:13; Yohane 6:60-66.

Cili ca kusekesha ukuti nelyo fye ni lelo, lintu Baibolo yonse e ko yaba kabili kwalibako ukufikilishiwa kwapaka ukwa masesemo ya bulesa pa lwa nshiku sha kulekelesha, banono mu kulinganishiwako bankula ku bukombe bwa Bwina Kristu no kushipikisha mu kubombela Yehova. Ici cumfwana ne cilangililo ca kwa Yesu pa lwa mushili wapusanapusana. Asosele ukuti bamo baali no kuumfwe “cebo ca bufumu,” lelo Satana aali no kusompola icatandilwe. Bambi baali no kupokelela icebo mu kuba no buseko lelo mu kupita kwa nshita baali no kufilwa pa mulandu wa bucushi nelyo ukupakasa. Nalyo line bambi baali no kushininkisha ababulo busumino pa mulandu wa “kusakamana kwa pano isonde no longolo lwa fyuma.”—Mateo 13:18-23.

Kuti twaba abashininkisha ukuti cikabe capusanako nga nshi lintu amamilioni na mamilioni babuushiwa mu kati ka Bushiku bwa Bupingushi. Lyene Satana takabe umuntungwa ku kusompola imbuto sha cine ishatandwa mu mitima yabo. Tabakakwate ukubomba no kupakasa nelyo ukusakamika kwa micitile ibifi iilipo. Bakasambilishiwa mu mibele yalungama, ukushingulukwa no mulimo wa kusungusha uwa kwa Lesa, ukusanshako ukubuuka kwa bafwa no kundapwa kwa nko. Ca cine, bamo tabakankuleko nelyo fye ni lilya line. (Linganyeniko Yohane 11:45-53.) Lelo kuliko umulandu usuma uwa kutontonkanya ukuti icinabwingi bakeluke cebo, bakankulako, no kupusuka.