Bushe Uleibukisha?

Bushe waliipakisha ukubelenga ishafumine isha nomba isha Ulupungu lwa kwa Kalinda? Cisuma, mona nga ca kuti wingaasuka amepusho yakonkapo:

◻ Apo bamalaika babule cumfwila bapooselwe ku Tartari, cinshi ici capilibula kuli bene? (2 Petro 2:4)

Tabakwatamo na kabili icifulo mu kuteyanya kwa mushilo ukwa kwa Yehova kabili baliputulwako ku kubuutusha kwa bulesa. Nangu cibe fyo, bacili balabomba pe samba lya butungulushi bwa kwa Satana kabili batwalilila ukusungilila ukwampana kwapalamisha na bantunse, ukutukuta ukulama abaume, abanakashi, nelyo fye abana. (Ukusokolola 12:12, 17)—4/15, ibula 14.

◻ Mulandu nshi cabele cakabilwa “ukupate cabipa” mu menso ya kwa Yehova? (Ilumbo 97:10, NW)

Abo abapata icabipa tabakafwaye nshila sha kuyobekamo muli cene. Pa lubali lumbi, abantu abashacipata kuti pambi batalukako lwa ku mubili ilyo lwa ku muntontonkanya balefwaya ukuti bengakanamo mu fintu fyabipa.—4/15, ibula 21.

◻ Mu cilangililo ca kwa Yesu ica matalanti, lisambililo nshi ilyakatama lyapeelwa kuli bonse abatunga ukuba abakonshi ba kwa Yesu? (Mateo 25:14-30)

Balingile ukubomba ku kwingilishako ifyuma fya kwa Shikulu wabo wa ku mulu pa kukwato kwakanamo kwakumanina mu mulimo wa kushimikila. Lyeka fye e lintu bengaba abaebekeshiwa ukukwata ukutasha kwa kwa Yesu no kulambulwa. Muli fyo basengauka ukupooswa mu mfifi ku nse no bonaushi bwa kupelako.—5/1, ibula 9.

◻ Cinshi cintu Yesu apilibwile lintu aebele abasambi bakwe ukupepa ukuti: “Mwitutwala mu kweshiwa”? (Mateo 6:13)

Aya mashiwi tayafwile kulondololwo kupilibulo kuti Yehova alatwesha ku kucito lubembu. Mu cifulo ca ico, ifwe, na kuba, kuti twaipusha Yehova ukukanatusuminisha ukunakilako lintu twaeshiwa nelyo kutitikishiwa ku kukanamumfwila. Kuti twapapata Shifwe ukutungulula amatampulo yesu pa kuti ubwesho nelyo bumo tabutucilile ubwatapata ica kuti twafilwa ukushishimisha. (1 Abena Korinti 10:13)—5/15, ibula 19.

◻ Bushe calilinga ku Mwina Kristu ukupokelela ukutungwa inshindano ukwa lubali lunono ulwa mulopa, pamo nge sha kucingilila isha globulin nelyo albumin?

Ukwankula kwi funde lya kwa Lesa, Abena Kristu tabasumina ukukuushishamo kwa mulopa ukwa mbali shikalamba isha mulopa—plasma (ulubali lwa fiseekwa fyatikama), insandesande shakashika, insandesande shabuuta, nelyo insandesande shicilikila. Bamo aba Nte sha kwa Yehova, nangu cibe fyo, baliyumfwa mu kusakamanishisha ukuba na maka ya kupokelela inshindano ya lubali lunono lumo ulwa protein ya plasma. Ku ca kusekesha, yamo aya aya ma protein mu cifyalilwa yalapita ukufuma mu mushipa wa mulopa wa mwanakashi uuli pa bukulu ukuya mu nshila yapaatuka iya mulopa mu kashimu kakwe.—6/1, amabula 30, 31.

◻ Mifwaile nshi yabombelwe ku kusamba kwa kwa Yesu inkasa sha basambi bakwe pa Kucilila kwalekelesheko ukwa mwi funde?

Yesu alesambilisha abasambi bakwe isambililo lya kuicefya. Takuli nangu umo uulingile ukufwaya icifulo ca ntanshi, ukutontonkanya ukuti alicindama. Ukucila, bonse balingile ukukonka ica kumwenako ca kwa Yesu no kuba abaitemenwa ukubombela umo no munankwe ukwabula akapaatulula, te mulandu no kukanasekesha nelyo ukuba pa nshi uyo mulimo pambi wingaba. (Yohane 13:12-17)—6/15, ibula 9.

◻ Ni mu mano nshi abaYuda mu Berea ‘balefwayafwaya’ mu Malembo? (Imilimo 17:11)

Te mu kuti abena Berea batwishike Paulo no bukombe ubo abaletele, lelo balisapike pa kushininkisho kuti Yesu aali Mesia. Ukuti abengi aba muli bene balitetekele cilango kuti inkuntu yabo yali iya cine cine. (Imilimo 17:12)—6/15, ibula 18.

◻ Cinshi cali “ibuku lya Fya bulwi fya kwa Yehova?” (Impendwa 21:14)

Ili lyali lyashi lya kale ilyashintililwapo ilya fya bulwi bwa kwa Lesa mu kwimininako abantu bakwe. Nakalimo lyatendeke no kucimfya kwa kwa Abrahamu pa ba kwingilila baipangasha ne fyanso mu Calo ca Bulayo pamo nge fyo calembwa mu Ukutendeka icipandwa 14. Impelelekesho yakatama iye buku ikaba “kulwa kwa bushiku bukalamba bwa kwa Lesa wa maka yonse” pa Armagedone. (Ukusokolola 16:14, 16)—7/1, amabula 20, 22.

◻ Ni shani fintu Icebo ca kwa Lesa, Baibolo, citwafwilisha ukushishimisha ukukalipwa?

Baibolo ilatwebo mulandu Yehova asuminishisha ukukalipwa, na kabili ilatwebekesha ukuti mu kwangufyanya ukukalipwa kukapwa. (Abena Roma 5:12; Ukusokolola 21:1-5)—7/15, ibula 4, 5.

◻ Ni shani fintu abantu ba kwa Lesa ilelo “[bengalanga, NW] nga mu cilola ubukata bwa kwa [Yehova, NW]”? (2 Abena Korinti 3:18)

Ubukata bwa kwa Lesa busanikila ku “mbila nsuma ya bukata bwa kwa Kristu, uuli cipasho ca kwa Lesa.” Inte sha kwa Yehova balangisha ubu bukata pa kulanda pa lwa bukata bwa kwa Yehova no bukata bwa Bufumu bwakwe ku Mwana wakwe. (2 Abena Korinti 4:4-6)—7/15, amabula 15, 16.

◻ Ni lilali umuntu alingile ukubatishiwa?

Ulubatisho lutampulo lwa kubuula lintu umo acito kuipeela kwakumanina, ukwabulo kushako, kabili ukwabule fipangano kuli Yehova ukupitila muli Kristu Yesu ku kucito kufwaya kwa kwa Lesa.—8/1, ibula 14.