Abapangashiwa ku Mulimo wa buMishonari Muli ba 1990

ICIPUTULWA ca nshita caibela ciletendeka ku mulimo wa bumishonari. Mu kuba ne minshi ya mashuko ya mu nshita ukwisuka mu ncende ishingi ishipya, bonse Inte sha busumino isha kwa Yehova bali aba mupampamina ukutinamina nangu fye mibombele ikalamba.

E fyo caali mu kuba no kwenekela kwaswatuka ukuti abasambi 24 abe kalasi lyalenga 89 ilya Watchtower Bible School of Gilead basangilwe kuli programu wabo uwa kupwishe sukulu pa September 9, 1990. Ibumba lyacila pali 5,000 abeni balaalikwe ne filundwa fya lupwa lwa Bethel balilongene ku kupwishe sukulu lya aba bamishonari bapya, abo kale kale bapokelele ukupeelwa kwabo ukwa mulimo ku fyalo ikumi. Ukutendekela pa Ŋanda ya Kulonganinamo iya Inte sha kwa Yehova mu Jersey City, New Jersey, programu yonse yalyumfwike na kuli abo abalongene pa Bethel ya Brooklyn, Watchtower Farms, na Watchtower Educational Center pa Patterson, New York.

Mu kwangufyanya pa 10:00 a.m., Theodore Jaracz, icilundwa ce Bumba Litungulula ilya Nte sha kwa Yehova kabili ceyamani wa ubo bushiku, aitile ku lwimbo lwa kwiswila. Ukukonka pali ici, ipepo lyalipeelwe na Arthur Worsley uwa lupwa lwa Bethel ya Brooklyn. Ceyamani lyene aloseshe ku Imilimo 10:33, apo mushika wa ciRoma Korneli asosele kuli Petro ukuti: “Ifwe bonse e mo tuli pa menso ya kwa Lesa ku kuumfwa fyonse ifyo mwaebwa kuli [Yehova, NW].” Calishibikwe ukuti ifya kuponako fya lyashi lya kale ifyalecitika mu kasuba ka kwa Petro fyali no kwisula inshila ku mbila nsuma ukubilishiwa ku bantu ba nko shonse.

Philip D. Wilcox, ukufuma ku Watchtower Farms, apeele ilya kubalilapo ilya malyashi cinelubali aya kucincimusha. Ukushimpwa pa Abena Filipi 4:7, abuulile nga umutwe wakwe “Lekeni Umutende wa kwa Lesa Umwafwilishe mu Kupeelwa Kwenu Ukwa Mulimo.” Asosele ukuti: “Yehova Lesa aba e Ntulo ya mutende onse uwa cine. Aipakisha umutende mwi tontonkanyo lyonse, nelyo ilyakumanina, kabili takumanya ukusakamikwa ukuli konse ukwa kubombomana, ukwikatwa, nelyo ukukanashikatala kwa muntontonkanya. Mu kukonkapo, kwalibako umutalalila no mutende ifyashinguluka ukubapo kwabengeshima ukwa kwa Yehova pa cipuna cakwe, nga fintu calangililwa no mukolamfula wa smaragidi ya katapakatapa uwamonwa na Yohane mu cimonwa. (Ukusokolola 4:2, 3) Umutende wakwe ulatanununwa ukuya ku nse ukucila pa mwine kuli abo bonse abakasuminisha wene ukubafwilisha. Bushe ukausuminisha?” Munyina Wilcox alondolwele ukwaafwa kubili ukwakatama, ipepo no kuitemenwa ukulolela pali Yehova. (Mika 7:7; Abena Filipi 4:6) Takwaba icili conse ico Yehova asuminisha icingatulenga ukukanshika kwatwalilila, e fyo amwene.

Lloyd Barry, icilundwa ce Bumba Litungulula, akonkelepo pa mutwe waleti “Twalilileni Ukumwentula.” Atendeke mu kuba ne nsoselo ya kuti, “Ukuseka kwaba muti usuma.” Aibukishe iyo numbwilo pa kuti ku numa mu 1955 wali mutwe pa nkupo ya yafumine iya kubalilapo magazini ya Loleni! ukumoneka mu lulimi lwa ciJapanese. Lelo musango nshi uwa kuseka? Te kwa kuibililika, ukwabulwa mano “ukuseka kwa bawelewele.” (Lukala Milandu 7:6) Ukucila, kuseka kwabamo insansa, ukwa kukokoloka ukwa bamishonari na bambi abankulako ku bwite bwa kwa Davidi lyonse ‘ukusamwa muli Yehova.’ (Ilumbo 32:11) Munyina Barry amwene ukuti te mulandu no kwesha kwabipisha, Yobo aali no kutwalilila ukumwentula, pa kuti alishibe ukuti alesungilila bumpomfu kuli Lesa. Bamishonari abashangila te mulandu ne fyakukumanya fya kwesha ukupala ifya kwa Yobo bakapokelela ipaalo likalamba ku mpela. (Yobo 29:24; 42:12) Kalanda asondwelele ukuti: “Isungeni abapamfiwa, twalilileni ukumwentula, kabili na imwe mukalobolola ukumwentula kwa ciyayaya ukwa kusuminisha kwa kwa Yehova.”

Kalanda wakonkelepo aali ni Richard E. Abrahamson, uwasobwele umutwe “Lekeni Ukupelulula Kwenu Kwishibwe ku Bantu Bonse,” ukushimpwa pa Abena Filipi 4:5. Ukulingana ne ciGreek ca kutendekelako, ishiwi “ukupelulula” kuti lyalangilila itontonkanyo lya “ukunakila.” Bamishonari bamo balikwata impika pa mulandu fye wa kusobolapo kwa pa lwabo. Umo alipapushiwe mu nshila mishonari munankwe aputwile akapimfya ka cisi pe tebulo. Pa numa ya myaka 22 iya mulimo wa bumishonari, uwapapushiwe amwene ukuti impika ishingi shitendeka pa milandu ishili iyacindama ukucila pa fintu umo engaputula cisi. Kalanda apandile amano ukuti: “Sambilileni ukuteuluka, ukupala icimuti mu cikuuku ca mwela. Kwalibako ubunonshi ubwingi ku kuba abanakila, pamo nga ukuba na maka ya kushipikisha ukwesha no kukakatila ku kupeelwa kwa umo ukwa mulimo mu kuba no mutende wa muntontonkanya.”

Milton G. Henschel, uwe Bumba Litungulula, alanshenye pa mutwe “Umwinshi Ukalamba Uutungulula ku Mibombele Nawisuka.” Munyina Henschel aishibishe ukuti Yesu atemenwe abantu, abekatilwe nkumbu, no kubasambilisha ifintu ifingi. Ukufuma ku Efese umutumwa Paulo alembele Abena Korinti ukuti: “Kuli ine nakwisukilo mwinshi ukalamba kabili uwa kubombeshamo, na balecincintila bengi.” (1 Abena Korinti 16:8, 9) Te mulandu no ku kukaanya, Paulo asambilishe mwi sukulu lya kwa Turani pa myaka ibili, ica kuti ubukombe bwa Bufumu bwalishibikwe ukupulinkana icitungu ca Asia. (Imilimo 19:9, 10) Umwinshi waisuka watungulwile ku kutunguluka mu kushimikila kwakwe. Icilonganino ca ku Efese caali cicili cilebomba pa mpela ya mwanda wa myaka uwa kubalilapo.—Ukusokolola 2:1-7.

Jack D. Redford, kafundisha wa Gileadi, alandile pa mutwe “Twalilileni Ukuyesha Cintu Mwaba.” (2 Abena Korinti 13:5) Bamishonari ba Gileadi balisula amabala yapya no kukosha ifilonganino ifyapangwa kale kale, ukushipikisha ifingi no kukaanya ukubeleleka Ciwa abika pa ntanshi ku kubapumbula ukufuma mu nshila. Kabili abapya batwalilila ukuilunda ku mibombele. Mu kuba ne fyakukumanya fibili ifyamonekesha, kafundisha alangilile ifyo caba icakatama ku kwesha icitetekelo ca umo. Mishonari umo alufishe amashuko yakwe pa numa mu kubamo imiiya asuulile ukufunda kwa kusoka pa lwa nshila yalubana. Mu kupusanako, na umbi atwalilile mu kupeelwa kwakwe ukwa mulimo mu kuba no buseko, nangu cingati mu myeshi yakwe iya kutendekelako itatu kulya, alyondele nga nshi ku bulwele ubo bwafuminemo na kabili ukulufya kwakwe ukwa mushishi no kuleka ukuumfwa. Acili kulya pa numa ya myaka 42 kabili, ukupitila mu masambililo ya Baibolo, alyafwa abantu 156 ku lubatisho. Munyina Redford asondwelele ukuti: “Kaanyeni Ciwa, kabili akafulumuka kuli imwe. Te kwesha ukubelelekwa kuli wene. Twalilileni ukuishininkisha cintu imwe mwe bene mwaba. Yehova akamusakamana.”

Mu kukonkapo, kafundisha na umbi, Ulysses V. Glass, alandile pa mutwe “Ku Bafundikana Kwaba Amano.” (Amapinda 11:2) Abomfeshe inkoloko ya pa kuboko mu kuba na batiri ya maka ya mulimo wa kasuba ku kulangilila ukuti ulubuuto lwa Cebo ca kwa Lesa kuti lwatusungilila “ababikwamo mulilo.” “Lelo,” asonteleko kuti, “ukwishiba kweka takupeela amano. Ubufuuke na bo bwine bulakabilwa kuli Lesa.” (Mika 6:8) Ubufuuke bukatutungulula ku kutiina Lesa, kabili “akatiina ka kuli Yehova e ca kubalilapo ca mano.” (Amapinda 9:10) Ca cine, tufwile ukulanguluka icintu cimo pa lwa fwe bene; ukuisenuka kuti kwaba kwakonaula. Yehova alipeela amaka yaibela kuli bamo, nga fintu acitile mu kati ka kukuula ihema, lelo bucishinka mu bufuuke bulingile ukubombelwapo. “Mu kati ka ico ciputulwa ca nshita,” Munyina Glass aebele ikalasi ukuti, “mwapeele ubushinino bwa kushintililwapo no mucinshi. Langisheni ubu bucishinka bumo bwine mu kupeelwa kwenu ukwa mulimo, kabili Lesa akamupaala.”

Albert D. Schroeder, uwe Bumba Litungulula, apeele ilyashi likalamba ilyakwete umutwe “Abapangashiwa Bwino ku Mulimo wa buMishonari Muli ba 1990.” Atendeke ukuti: “Ba 1990 kale kale nabakwata intendekelo yaluma. Inko ishingi isha ku Kabanga ka Europe shalitenshiwa. Imyeshi yafulilako iyapitapo Icibumba ca Berlin caliswilwe. The New York Times yakwete umutwe ukalamba uwaleti: ‘August 1990, Umweshi Uyo Watenkenye Icalo.’ E co, imwe mwe balepwisha isukulu muleikala mu nshita ya kutenkanishiwa. Bushe imyeshi yenu isano iya kusambilila yalimupekanishisha kuli ico? Ukwabulo kutwishika ee!” Lyene alumbulwile shimo isha mbali sha kwaafwa isha New World Translation of the Holy Scriptures—With References kabili fintu ukusambilila yene kwalenga Icebo ca kwa Lesa ukuba ica mweo. Icibombelo na cimbi ica maka icapangasha ababomfi ba kwa Lesa caba ni “All Scripture Is Inspired of God and Beneficial,” nomba mu kulembwa kwa iko ukwapitulukwamo ukwa 1990. Ulupapulo lwa nomba line Mankind’s Search for God na lo lwine lulingile ukuba ca kwaafwa ca maka kuli bamishonari. Munyina Schroeder asondwelele ukuti: “E co lyene, bamunyina, tasheni Yehova ku kusambilila kwa kusungusha, ukwaumo mutengo uko mwakwata—kumo uko ukwakosa kabili ukushingatelentenshiwa. Twalilileni ukuba ne paalo lya kwa Yehova kabili kwateni ukucetekela kwakumanina muli wene ne Ntungulushi yesu iya kusungusha, Yesu Kristu. Amashiwi ayo twakwata mu Malembo mu cine cine yaba ayapuutwamo kabili yakamulangilila no kumutungulula mu mulimo wa bumishonari.”

Ukuposha ukufuma ku fyalo 11 kwalibelengelwe. Abasambi bapokelele amadiploma yabo, kabili umo uwa bene abelengele kalata ya kuyumfwa kwa kufuma ku mutima kwi Bumba Litungulula no lupwa lwa Bethel.

Iciputulwa ca cungulo casondwelele ne sambililo lya Ulupungu lwa kwa Kalinda ilyaipifiwa, ukutungululwa na munyina David L. Walker, icilundwa ca Komiti ya Watchtower Farms. Lyene abasambi babomfeshe umutwe wa kucincisha “Amaka ye Pepo mu Kushimikila” mu kulangilila ifyakukumanya fya mwi bala. Icilonganino ca cikaya capeele icilangililo ca kucincimusha Abalubulwa ku Kusumbula Ukupepa kwa Cine, ukushimpwa pa kubwela kwa kwa Esra ku Yerusalemu ku kusumbula ukupepa kwa cine. Munyina Frederick W. Franz, presidenti we Sukulu lya Gileadi, asondwelele mu kuba ne pepo lya kukunta.

[Icikope pe bula 24]

Ikalasi Lyalenga 89 ilya Bapwishishe Sukulu lya Watchtower Bible School of Gilead

Mu mutande pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo. (1) Ahr, K.; Johnston, L.; Ng Ying Kin, V.; Sukkau, A.; Rodriguez, A.; Myklebust, N. (2) Ahr, H.; Verbeek, P.; Verbeek, K.; DeBolt, S.; DeBolt, S. (3) Sukkau, W.; Ayala, L.; Ayala, S.; Jenson, R.; Ng Ying Kin, J.; Myklebust, T. (4) Rodriguez, C.; Ferlisi, G.; Ferlisi, L.; Tank, J.; Jenson, K.; Tank, J.; Johnston, P.