Bakabilisha ba Bufumu Bacita Lipoti

Icine ca Baibolo Cacimfya pa Fishilano

ICISHILANO ca butotelo kuti caba icalimbe mishila mu kushika nga nshi. Amamilioni bayumfwa ukuti caliba icalubana ukwalula ubutotelo bwa umo. Sauli, uwabele umutumwa Paulo, mu kumonekesha ayumfwile mu nshila yapalako, apantu asosele ukuti: “Nali uwapimpilo kucishamo ifya cishilano fya fikolwe fyandi [ukucila abengi aba mushinku wandi wine].” Lelo pa kulangwa icine, alyalwike ukufuma ku buYuda no kuba Umwina Kristu. (Abena Galatia 1:13-16) Abengi ilelo balisa mu kumwensekesho kuti icine ca Baibolo cafuma ku ntulo yasumbukisha ukucila pa cishilano. Moneni ifyo icine ca Baibolo cacimfishe mu Italy.

Umwanakashi umo alondolola ukuti: “Nkashi nandi na ine twakulile mu lupwa lukalamba mu kuba ne fishilano fya ciKatolika ifyakokwesha, kabili twabele baKatolika baipeelesha. Mu kupita kwa nshita, nalyupilwe. Lyene nalufishe umulume wandi, kabili naikele nga mukamfwilwa imyaka iingi na bana bandi. Umwana wa nkashi nandi umwanakashi asambilishe katikishimu, kabili atwalilile ukwipusha shimapepo ifipusho fya Baibolo, lelo tapokelele ifyasuko fya kwikusha.

“Ilintu naletandalila itauni lya ku mwesu, nakwete ukukumana kwa kubalilapo ne Nte sha kwa Yehova kabili napokelele isambililo lya Baibolo. Abanandi bonse aba ciKatolika aba kale balimpumishe pa kusambilila Baibolo. Nshafupwilwe, nangu cibe fyo. Pa muku wa kubalilapo, naikwatile Baibolo, kabili takwali nangu umo uwali no kumpokolola. Nkashi nandi na o abuulile ukwiminina kwakwe kuli Yehova, kabili mu kucepako ukucila pa myaka ibili, ifwe bonse babili twalibatishiwe.

“Nalililile lintu pa kubalilapo naputwikeko ukufuma kwi calici pa kuti natiinine ukusha ifishilano ifyalimbile mishila muli ine pa myaka 76. Lelo nomba naliba uwa nsansa ukwenda mu nshila sha kwa Yehova no kucita ukufika apo ningapeesha ukwaafwa bambi ukufuma mu mfifi ya ku mupashi!”—Linganyeniko 1 Petro 2:9.

Uubeya Alungamika Ukutontonkanya Kwalubana

Uubeya mu Japan alitemenwe ukulanda pa lwa fiwa na ba UFO ilintu alebeya umushishi wa baleisa mu kubeya. Nangu cibe fyo, pa numa lintu atendeke ukusambilila Baibolo, amwensekeshe fintu ici cibelesho cali ica busanso. E co mu cifulo ca ico alaalike abaleisa mu kubeya ukuilunda kuli wene mwi sambililo lyakwe ilya Baibolo. Acitile ubunte ku baleisa mu kubeya abacaice pa lwa bubumbo. Cila mulungu aodele amaBaibolo na makope ya citabo Kuti Waikala Kuli Pe na pe muli Paradise Pe Sonde ukufuma kuli Nte uwalesambilila na wene pa kuti engayashalika ku baleisa mu kubeya.

Nangu cingati aali talaba Nte, alishalike ukucila pa maseti 30 aya maBaibolo ne fitabo fya Kuti Waikala kuli Pe na pe mu kati ka mwaka wa kubalilapo uwa kusambilila kwakwe. Ukucila pa bantu 25 balitendeke ukusambilila Baibolo pamo nge cakufumamo ca bunte bwakwe ubwa mu lyashi. Pa nshita shimo ubwingi bwa kufika kwi kumi baali no kwakanamo mwi sambililo lya Baibolo lyakwe ilye bumba. Nomba cinelubali muli abo acitileko bunte lintu alebabeya balikwata ukutontonkanya kwabo ukulungikwa kabili bali ni Nte shabatishiwa isha kwa Yehova!