Twalilileni Ukwenda mu Lubuuto no Kutemwa

Ifishinka Fikalamba Ukufuma Muli Yohane wa Ntanshi

YEHOVA e Ntulo ya lubuuto no kutemwa. Tufwile ukulolesha kuli Lesa ku lubuuto lwa ku mupashi. (Ilumbo 43:3) Kabili ukutemwa kwaba pa kati ka fisabo fya mupashi wakwe uwa mushilo.—Abena Galatia 5:22, 23.

Ulubuuto, ukutemwa, ne milandu imbi fyalilanshanishiwapo muli kalata ya ntanshi iyapuutwamo iya mutumwa Yohane, mu kupalako iyalembelwe mu Efese mupepi na 98 C.E. Umulandu ukalamba uwa kulembela yene wali kucingilila Abena Kristu ku busangu no kubafwilisha ukutwalilila ukulaenda mu lubuuto. Apo tulolenkana no kusonsomba ku kutemwa kwesu, icitetekelo, na bumpomfu ku cine, ukulanguluka kwa uyu kalata mu kushininkisha kukatunonsha.

‘Endeni mu Lubuuto’

Yohane acilengele ukumfwika ukuti Abena Kristu ba busumino balingile ukwenda mu lubuuto lwa ku mupashi. (1 Yohane1:1–2:29) Atile: “Lesa lubuuto, na muli wene tamwaba mfifi [tamwaba icili conse ica bubifi, ica bucisenene, ica bufi, nelyo icishashila] nakalya.” Pa mulandu wa kuti Abena Kristu basubwa ‘benda mu lubuuto,’ bakwate “senge” na Lesa, Kristu, na umo no munankwe. Na kabili balisangululwa ukufuma ku membu ku mulopa wa kwa Yesu.

Nampo nga tuli Bena Kristu basubwa mu kuba ne subilo lya ku mulu nelyo tulelolesha ku ntanshi ku bumi bwa ciyayaya pe sonde, tukatwalilila ukunonkelamo mwi lambo lya kwa Yesu lyeka fye nga ca kuti twatemwa bamunyinefwe lelo te calo. Tufwile na kabili ukusengauka ukusongwa na basangu, pamo nga “mukanyakristu,” uukaana bonse babili Wishi no Mwana. Kabili twiesha ukulaba ukuti ubumi bwa muyayaya bukapakishiwa na abo beka fye abalambatila ku cine no kubelesho bulungami.

Abana ba kwa Lesa Balangisha Ukutemwa

Yohane mu kukonkapo aishibishe abana ba kwa Lesa. (3:1–4:21) Ku cintu cimo, bacite calungama. Na kabili balomfwile funde lya kwa Yehova Lesa ‘ukuti batetekele mwi shina lya kwa Mwane Yesu Kristu, no kutemwana.’

Umuntu “uwaishiba Lesa” alishiba pa lwa mifwaile ya kwa Yehova na fintu ukutemwa Kwakwe kulumbululwa. Ici cifwile ukwaafwa uyo muntu ukulangisho kutemwa. Mu cine cine, “uushitemwa taishiba Lesa; ico Lesa kutemwa.” Ukutemwa kwa bulesa kwalangishiwe lintu Lesa “[atumine] Mwane icikonsolwelo ca pa membu shesu.” Nga ca kuti Yehova atutemenwe ukufika kuli ico cipimo, tuli abakakililwako ku kutemwa umo no munankwe. Ee, uuli onse uutungo kutemwa Lesa alingile na kabili ukutemwa munyina wa ku mupashi.

Icitetekelo ‘Cicimfya Pano Isonde’

Ukutemwa kusesha abana ba kwa Lesa ku kubaka amafunde yakwe, lelo ukupitila mu citetekelo emo ‘bacimfisha pano isonde.’ (5:1-21) Icitetekelo cesu muli Lesa, Icebo cakwe, no Mwana wakwe cilatwaafwa ‘ukucimfya pano isonde’ pa kukaano kutontonkanya kwa ciko kwalubana ne nshila sha ciko na pa kusunga mafunde ya kwa Yehova. Lesa apeela ‘bakacimfya ba pano isonde’ isubilo lya bumi bwa ciyayaya kabili alomfwa mapepo yabo ayomfwana no kufwaya kwakwe. Pantu uuli onse “uwafyalwa kuli Lesa” tabelesha lubembu, Satana tekatililo muntu wa musango yo. Lelo bonse babili abasubwa na babomfi ba kwa Yehova abakwata masubilo ya pe sonde bafwilo kwibukisho kuti ‘pano isonde ponse palaala mu maka ya ulya mubifi.’

[Akabokoshi ne Cikope pe bula 29]

Ilambo lya cikonsolwelo: Yesu “e cikonsolwelo ca pa membu shesu [isho isha bakonshi bakwe abasubwa]; kabili te ca pa shesu sheka, lelo ne ca pa membu sha ba pano isonde bonse,” abashala aba mutundu wa muntu. (1 Yohane 2:2) Imfwa yakwe yali “kukonsolwela” (ciGreek, hi·la·smosʹ, ukupilibula “inshila ya kutalalikilamo,” “ica kukonsolwelako”) lelo te mu mano ya kutentemba ukuyumfwa kwacenwa pa lubali lwa kwa Lesa. Ukucila, ilambo lya kwa Yesu lyatalalike, nelyo lyaikwishe, ukupinda kwa bulungi bwapwililika ubwa bulesa. Shani? Pa kupayanye cishinte calungama ica bulungi ku kwelele membu, pa kuti Lesa “abe uwalungama umwine kabili kalungamika [wa lubembu lwa cifumanda] wa uletetekela Yesu.” (Abena Roma 3:23-26; 5:12) Pa kupayanya inshila ya kucito kwikushiwa kwakumanina ku membu sha muntu, ilambo lya kwa Yesu lyacilengele ukube ca kukonsolwela, nelyo ica kusenamina, ku muntu ukufwaya no kupokelelo kubweshiwa ku kwampana kwalungama na Yehova. (Abena Efese 1:7; AbaHebere 2:17) Fintu ifwe bonse tulingile ukuba aba kutootela pali ici!