Endeni nga Babombela Pamo mu Cine

Ifishinka Fikalamba Ukufuma Muli Yohane wa Cibili no wa Citatu

UKWISHIBA kwa cine e cishibilo ca bakapepa ba kwa Yehova. (Yohane 8:31, 32; 17:17) Ukwenda mu cine ca bulesa kwaliba ukwakatama kwi pusukilo. Kabili ababomfi ba kwa Lesa bafwile ukuba ababombela pamo mu cine.

Amakalata yapuutwamo aya mutumwa Yohane iya cibili ne ya citatu yasosa pa lwa ‘kwenda mu cine.’ (2 Yohane 4; 3 Yohane 3, 4) Yohane wa citatu na kabili akoselesha ukubombela pamo nga “babombela pamo [mu, NW] Cine.” (3 Yohane 5-8) Mu kupalako, amakalata yonse yabili yalembelwe mu Efese mupepi na 98 C.E. Lelo fintu yasosa kuti fyanonsha abantu ba kwa Yehova ilelo.

Yohane wa Cibili Akomaila pa Cine

Yohane wa cibili intanshi akomaile pa cine no kutemwa no kusoka ku lwa kwa “mukanyakristu.” (2 YohaneIfikomo 1-7) Kalata yalungatikwe kuli ‘nakulubantu uwasalwa,’ nakalimo umuntu umo. Lelo nga ca kuti yatuminwe ku cilonganino, “abana” bakwe bali Bena Kristu bafyalwa ku mupashi “abasalwa” na Lesa ku bumi bwa mu mulu. (Abena Roma 8:16, 17; Abena Filipi 3:12-14) Yohane alisekelele pa kuti bamo “baleenda mu Cine” na muli ifyo ukucincintila ubusangu. Nalyo line, balekabila ukupempwila kuli “mukanyakristu,” uukaana ukuti Yesu alishile mu mubili. Inte sha kwa Yehova ilelo bomfwila ukusoka kwa musango uyo ku busangu.

Yohane mu kukonkapo apeele ukufunda pa fya kubomba na basangu kabili lyene asondwelele no kubafwaila umutende ukwa pa lwakwe no kuposha. (Ifikomo 8-13) Ku kucucutika kwa musango uyo pamo ngo kushimikila, wene na bambi baleteleko ifisabo fyafuminemo kwaluka kwa abo atumineko kalata yakwe. Kupitila fye mu ‘kucenjela’ abene lwa ku mupashi e mo ‘bengapokelela icilambu icituntulu,’ mu kushininkisha ukusanshako “icilongwe” ca mu mulu icabakilwa abasubwa ba busumino. (2 Timote 4:7, 8) Nga ca kuti uuli onse ‘uushikala mwi sambilisho lya kwa Kristu’ aishile kuli bene, tabafwile ‘kumupokelela ku mwabo nangu kumuposha’ pa kuti bengasengauka ukuba abakumako ku ‘milimo yakwe ya bubifi.’ Pa numa ya kulumbulule subilo lya kuti ali no kulanda na bo abasumina banankwe pa kanwa nkati, Yohane aisalile mu kuba no kuposha.

Yohane wa Citatu Akomaila pa Kubombela Pamo

Yohane wa citatu alungatikwe kuli Gai kabili ica ntanshi alandile pa fintu alecitila basumina banankwe. (3 YohaneIfikomo 1-8) Gai ‘aleenda mu cine’ pa kulambatila ku fisambilisho fyonse fya Bwina Kristu. Na kabili “[alecita] ica cishinka” mu kwafwilisha bamunyina abatandashi. Yohane alembele ukuti: “Tufwile ukusekelela ababe fyo, ku kuleka tube ababombela pamo ne Cine.” Inte sha kwa Yehova batambulula icileela capalako ilelo kuli bakangalila benda.

Pa numa ya kucilanya imibele ya kwa Diotrefe ku ya kwa Demetri, Yohane asondwelele kalata yakwe. (Ifikomo 9-14) Diotrefe ufwaisha ubukata talangile mucinshi kuli Yohane kabili aeseshe fye no kufumya mu cilonganino abo balepokelela bamunyina mu cileela. Demetri umo aloshiweko nge ca kumwenako cawama, nangu ni fyo. Yohane asubile ukumona Gai mu kwangufyanya kabili asondwelele mu kuba no kuposha no kufwaila Gai ukuipakisho mutende.

[Akabokoshi ne Cikope pe bula 30]

Mu kuba ne Pepala, Umulembelo, na Inki: Yohane afwaishe ukutandalila ‘nakulubantu uwasalwa’ na “bana” bakwe mu cifulo ca kulembe fintu ifingi kuli bene “pe pepala na inki.” Ukucilo kutwalililo kulemba kuli Gai “kuli inki no mulembelo,” umutumwa asubile ukumumona na kabili mu kwangufyanya. (2 Yohane 1, 12; 3 Yohane 1, 13, 14) Ishiwi lya ciGreek ilyapilibulwa “umulembelo” (kaʹla·mos) lilosha ku lupingu nelyo itete kabili kuti lyapilibulwa “itete lya kulembelako.” Pa kati ka baGreek na bena Roma, umulembelo we tete wali uwasompa no kupanduka nge filembelo fya masako ifya nshita ya pa numa. Ishiwi lya ciGreek meʹlan, ilyapilibulwa “inki,” musango wa pa kati uwa shiwi lya kulondolola ilya caume meʹlas ukupilibula “ukufiita.” Muli ba inki bakokwesha, umusango wali kufiita kwa mufito—atemwa imibele ya nkalafita shifuma ku koca kwa mafuta nelyo inkuni, nelyo ilibwe lya mufito wa krustali ukufuma ku misalu nelyo inama. Ilingi line, ba inki balesungwa nge fyauma ifyalepa nelyo imikate, iyalebikwako umutonshi kuli kalemba no kubikwa ku cifuti cakwe nelyo itete lyakwe. Ipepala lya isho nshiku lyali ilyayanguka ilyapangilwe mu fiputulwa ukufuma ku tupimfya twafumishiwe ku cimenwa ca macinda. Abena Kristu ba mu kubangilila babomfeshe pepala lya musango yo ku makalata, ifimfungwa, na mabuku ya kale ayalembelwe ku minwe.