Cenjeleni na Basangu!

Ifishinka Fikalamba Ukufuma Muli Kalata ya kwa Yuda

ABABOMFI ba kwa Yehova bafwile ‘ukupato bubifi’ no ‘kulambatila ku busuma.’ (Abena Roma 12:9) Kalemba wa Baibolo Yuda ayafwilishe bambi ukucite ci muli kalata yakwe iyatuminwe ukufuma ku Palestine nakalimo mupepi na 65 C.E.

Yuda aitile umwine “umusha wa kwa Yesu Kristu, kabili munyina wa kwa Yakobo.” Uyu Yakobo aali mu kushininkisha munyina citika waishibikwa bwino uwa kwa Yesu Kristu. (Marko 6:3; Imilimo 15:13-21; Abena Galatia 1:19) Yuda umwine aali muli fyo munyina-citika wa kwa Yesu. Nangu cibe fyo, kuti pambi acitontonkenye ukube cishalinga ukulumbula uku kwampana kwa ku mubili, apo Kristu lilya aali muntu wakatamikwa uwa ku mupashi mu mulu. Kalata ya kwa Yuda yali iya kulungatika nga nshi mu kupeelo kufunda ukwingaafwa ifwe ‘ukulambatila ku busuma’ no kucenjela na basangu.

“Mulwile Icitetekelo”

Nangula Yuda afwaile ukulemba pa lwe pusukilo lintu Abena Kristu bakwata mu cinkumbawile, acisangile ukube cakabilwa ukucincisha bakabelenga bakwe “[ukulwila] icitetekelo.” (Ifikomo 1-4) Mulandu nshi? Pantu abantu bashipepa bali nabasokelela mu cilonganino na kabili ‘balesangula ukusenamina kwa kwa Lesa ukubo [bwelelo, NW] ku mibele ya bucilende.’ Mu kuluba batontonkenye fyo kuti batoba mafunde ya kwa Lesa kabili nalyo line ukwikala pa kati ka bantu bakwe. Shi twikatala atunakila ku kupelulula kwa musango yo ukwa bubifi lelo lyonse tusupile ubulungami, aba kutotela pa kuti ukupitila mu mulopa wa kwa Yesu Lesa mu nkumbu atusambile membu shesu.—1 Abena Korinti 6:9-11; 1 Yohane 1:7.

Ukusoka Kwaimikwa pa Ntanshi Yesu

Cabe cakabilwa ukupempwila ku mibele imo, imyendele, na bantu. (Ifikomo 5-16) Pa mulandu wa kuti abena Israele bamo abapusushiwe ukufuma mu Egupti babulilwe citetekelo, balyonawilwe. Bamalaika abashile fifulo fyabo ifyalinga “balindilwo kupingulwa kwa Bushiku bukalamba mu fikakilo fya pe mwi samba lya mfifi [ya ku mupashi].” Bucisenene bwabipisha bwaletele “ukucula ku mulilo wa muyayaya” pali Sodomu na Gomora. E ico, lekeni lyonse tutemune Lesa no kukanasha “umwa kuyila ku mweo.”—Ilumbo 16:11.

Ukukanapala malaika mukalamba Mikaele, uushali nakuleta nelyo fye ubupingushi pali Ciwa mu numbwilo sha miponto, abantu bashipepa basosele fya miponto pa lwa “bakata,” mu kushininkisha abo abakwete ubukata bumo ukubikwa pali bene na Lesa na Kristu nga baeluda basubwa. Shi twikatala atulango musaalula ku bulashi bwapeelwa na Lesa!

Ifya kumwenako fyabipa ifya kwa Kaini, Balaamu, na Kora fyakonkelwe na bantu bashipepa. Baimishe icintiinya ca ku mupashi icingalinganishiwa ku mabwe ayabelama pe samba lya menshi kabili bali nga makumbi yabulamo amenshi kabili imiti yafwa, iyashulwa iishitwala ica kunonsha icili conse. Abo basangu bali na kabili abaŋwinta, aba kuilishanya kabilli ‘batasha muli bubumbimunda ku kumwenamo ububile.’

Twalilileni Ukucincintila

Yuda mu kukonkapo apeelo kupanda amano pa kucincintila ukusonga kwabipa. (Ifikomo 17-25) Kwali no kuba bakapumya ku “mpela ya nshita,” kabili Abena Kristu ba cine bafwile ukushipikisha bene na mashiwi yabo aya musebanya ilelo. Pa kucincintila ukusonga kwabipa ukwa musango yo, tulingile ukuikuula fwe bene pa “citetekelo [cesu] icashilisha,” ukupepa no mupashi wa mushilo, no kwikalilila mu kutemwa kwa kwa Lesa, ilintu tulelolele nkumbu sha kwa Yesu ukulumbululwa.

Mu kumonekesha mu lubali lwa bakasambilisha ba bufi, abantu bashipepa balengele bamo ukuba no kutwishika. (Linganyeniko 2 Petro 2:1-3.) Kabili cinshi bakatwishika balekabila? Kwena, kwaafwa kwa ku mupashi ku kusompolwa ukufuma mu “mulilo,” ubonaushi bwa muyayaya! (Mateo 18:8, 9) Lelo bakapepa tabakabile ukutiina ubo buyo, pantu Yehova akabacingilila ‘ukuti beipununa’ mu lubembu no bonaushi bulolela abasangu.

[Akabokoshi pe bula 31]

Amabwe Yabelama: Yuda asokele Abena Kristu banankwe pa lwa ‘mabwe yabelama pe samba lya menshi mu mitebeto yabo ya cintemwa.’ (Yuda 12) Ukubepesho kutemwa ku basumina, abasangu ba musango yo bali nga mabwe yatwa pe samba lya menshi ayo yengabunsha ingalaba nelyo kulepula no kwipaya aboowa. Imitebeto ya cintemwa pambi yali mitebeto uko Abena Kristu bali no lubanda lwa fikwatwa fya ku mubili balaalike abasumina banabo abali bapiina. Wishi we Calici Chrysostom (347?-407 C.E.) atile: “Bonse bakumene pa mutebeto wa cinkumbawile: aba fyuma ukulete fyapayanishiwa, na bapiina na abo abashakwete nelyo kamo ukulaalikwa, baliile umutebeto mu cinkumbawile capamo.” Te mulandu no musango wa mitebeto ya cintemwa ya mu kubangilila, ukusoka kwa kwa Yuda kwaafwile aba busumino ukucenjela na basangu ‘amabwe yabelama’ ayo ayaali na maka ya kuletako imfwa ya ku mupashi. Nangu cingati Abena Kristu tabakambishiwe ukukwate mitebeto ya cintemwa, kabili taicitwa ilelo, abantu ba kwa Yehova balafwana umo no munankwe lwa ku mubili mu nshita sha kukabila na kabili balakwato kubishanya kwa kusekesha.