Ifipusho Ukufuma ku Babelenga

◼ Mulandu nshi Yesu aimikile Icibukisho mu kuba fye na batumwa kabili te mu kuba na basambi bambi abo bali no kutwalwa mu cipingo cipya?

Ici cipusho cilemoneka ukushimpwa pe tontonkanyo lyalubana ilya kuti Yesu alongene na batumwa bakwe cilya cungulo bushiku ku kwimika Ica Kulya ca Cungulo ica kwa Shikulu ne cilonganino ca Bwina Kristu ica basubwa abaali kale kale mu cipingo cipya. Ukucila, pa Nisani 14, 33 C.E., icilonganino ca Bwina Kristu cali cicili tacilapangwa, kabili Yesu aishile capamo na batumwa bakwe ku ca kulya ca Kucilila ica ciYuda ica pa mwaka.

Kwena, Yesu alikwete abasambi bambi ukucila pali balya 12 abaishibikwa nga batumwa. Umwaka umo pa ntanshi ya mfwa yakwe, atumine abasambi 70 pa lwendo lwa kushimikila. Pa numa ya kubuushiwa kwakwe, “amoneke ku bacile myanda isano bonse pamo.” Kabili kwaliko abasambi “nalimo umwanda umo na makumi yabili” abalongene pa bushiku bwa Pentekoste. (1 Abena Korinti 15:6; Imilimo 1:15, 16, 23; Luka 10:1-24) Lelo natulanguluke ibumba lyali na Yesu lintu aimike ukusefya kwa pa mwaka ukwaishibikwa nga Ica Kulya ca Cungulo ica kwa Shikulu.

Luka 22:7, 8 apeela imfundo ya nshita, ukusoso kuti: “Awe kwaishile ubushiku bwa mukate uushatutumuka, ubo lyali no kwipaiwamo ica kucilila. Kabili atumine Petro na Yohane, ati, Kabiyeni, mutupekanishishe ica kucilila, ukuti tulye.” Ubulondoloshi bwalembwa bwatwalilila ukuti: “Mwebe no mwine ŋanda, amuti, Kasambilisha atila kuli iwe, Ili kwi iŋanda ya beni, umo tuleliila ica kucilila na basambi bandi?” E co cilya cungulo bushiku Yesu aali na balya 12 ku mutebeto wa ciYuda. Abebele ukuti: “Ukufuluka nafuluke cibi ukulya na imwe ica kucilila ici, apo nshilacula.”—Luka 22:11, 15.

Ukufuma ku kutendeka kwa ciko mu Egupti, ica Kucilila cali kusefya kwa lupwa. Mu kwimika ica Kucilila, Lesa aebele Mose ukuti impaanga yali no kwipaiwa ku cinshingwa-ŋanda cimo cimo. Nga ca kuti ulupwa lwali ulwacepesha ku kulya impaanga yonse, ulupwa lwa bwina mupalamano kuti lwalaalikwa ku kwakana ica kulya. Muli ifyo, cilimo ukupelulula ukuti ku ca Kucilila ca 33 C.E., abengi aba mu basambi ba kwa Yesu nga lyonse baali no kulongana ne ndupwa shabo kuli ici ica kulya.

Lelo Yesu ‘afulwike cibi’ ukwakana icali no kuba ica Kucilila capokelelwa ica kulekelesha, kabili inshita ya bushiku iya kulekelesha pa ntanshi ya mfwa yakwe, mu kuba na bakonshi bakwe abapalamisha abaendele nankwe mu kati ka butumikishi bwakwe bukalamba. Pa mpela ya ca kulya ca Kucilila, Yesu abebele ulwa kusefya ukupya uko kwali no kucitwa na bonse aba bakonshi bakwe mu nshita ya ku ntanshi. Umwangashi wa kulya kusefya kwa Bwina Kristu ukwali kucili ku ntanshi wali no kwimininako umulopa wa “cipingo cipya” ico cali no kupyana icipingo ce Funde.—Luka 22:20.

Pa cungulo bushiku ca Nisani 14, 33 C.E, nangu cibe fyo, icipingo cipya tacali mu kubomba, pantu ilambo lya kucilenga ukubomba—Yesu—lyali talilapeelwa. Icipingo ce Funde cali cicili mu kubomba. Cali tacilapampamikwa pa cimuti. Mu kulundapo, tacali na kumonekesha ukufikila pa bushiku bwa Pentekoste ilyo icipingo ca kale mu kuba na Israele wa cifyalilwa capyanikwepo ku cipingo cipya mu kuba na Israele wa ku mupashi.—Abena Galatia 6:16; Abena Kolose 2:14.

E ico, nangu batumwa 11 nelyo abasambi abali bonse bambi tabali mu cipingo cipya cilya cungulo bushiku. Kabili Yesu talelangisha ukukaana abasambi bambi aba ciYuda ku kubaleka ukulongana ne ndupwa shabo ku kusefya ica Kucilila.