Ubutuntulu Bwa Bumi ne Nsansa—Bushe Kuti Fyaba Fyobe?
ILYO lyonse kwaba abaume na banakashi abashapwililika, balifuluka ubutuntulu bwa bumi ne nsansa. Nangu cingati ifi mu kushininkisha e fibili ifya mu fyacindamisha fya kufwaisha kwa buntunse, fyashininkisha ukufyumfyuntuka.
Abantu balitontonkanya apakalamba, pali uku kusapika, kabili balipeela ukufunda ukwingi. E fyamwene Dr. Dennis Jaffe ukuti: “Ilelo, ubutuntulu bwa bumi bwatwalilila no kuposha ilingi line kwaba mu mibele yobe we mwine.” Abraham Lincoln inshita imo alandilepo ukuti: “Abantu balaba aba nsansa ukulingana na fintu bapingulapo ukuba.” Bushe ulesuminisha? Ni mu kuswatuka kwaba shani ufwaya ukuba uwa nsansa? Bukulu bwaba shani ukunonka shene kushintilila pa kukwata ubutuntulu busuma ubwa bumi?
Abantu balilolesha ukuli konse ku nsansa, ukukonka ifimoneka ukuba ukupikulula kwa kusupila ukwabule mpela. Balibebeta amano ya buntunse, imitontonkanishishe ya muntu, no kwelenganya kwa cifyalilwa. Mu kusapika kwabo insansa, bamo balipansa muli sayansi, ukulamuka kwa kusambilila, ne nyimbo. Nalyo line kuliko ukutwishika kunono ukuti ulubali lukalamba ulwa nsansa sha cine lwayampana ku kukwata ubutuntulu busuma ubwa bumi. “Nga ca kuti walikwata ubutuntulu bobe ubwa bumi, wakwata fye mupepi ne cili conse,” e fyasosele uwa makwebo uwa pa televisioni uwalumbuka.
Ukusupila iyi nshila, abantu abengi balipansa ukwelenganya kwalekanalekana ukwa butuntulu bwa bumi, konse kubili ukwapokelelwa no kushapokelelwa. Mupepi na laibrari yonse iya cintubwingi ilanga ukucitikako kwabule mpela ukwa mafunde ya miliile ne misango ya kundapa. “Ifitabo ifingi fyalilembwa pa lwa butuntulu bwa bumi, ukutampila mu nshita sha pa kale,” e fyalandilepo uwaishibisha ifya mutima uwalumbuka Dr. Paul Dudley White. “Cimo pa fyawamisha cali ni Regiment of Helthe icalembelwe mupepi ne myaka umwanda umo iyapitapo.”
Te mulandu ne ci conse, ukusapika ubutuntulu bwa bumi ne nsansa kwaliba ukwa kulenge nsoni ku cinabwingi ca bantunse. Bushe ici cilakupapusha, ukulanguluka pantu ukutumpuluka kwesu mu kutunganishiwa kufikile? Mu kulengama, sayansi tayafumyapo ukulwala, ukukota, ne mfwa.
Lelo bushe kuti cakupapusha mu kulundapo ukwishiba ukuti tatwakakwate inshila iya kupiminamo insansa no bulondoloshi busuma ubwa cintu shaba? Mu lyashi lyalelanguluka “Ukubelebesha pa Nsansa,” Pierre Teilhard de Chardin asondwelele ukuti: “Pa myanda ya myaka uyu waba e mutwe wa fitabo fyafulilako, ukufwailisha, ukwesha kwa muntu umo umo no kwe bumba, kumo pa numa ya kunankwe; kabili, ica bulanda ukushimika, kwabako ukufilwa kukalamba ukwa kufika pa kusuminishanya. Ku bengi aba ifwe, mu kupelako, insondwelelo ibomba fye iingaletwako ukufuma ku kulanshanya konse ili ya kuti cili icabulwamo amano ukutwalilila ukusapika.”
Bushe ifyo e fintu uyumfwa pa lwa nsansa? Ipushe ifipusho fya pa lobe lelo ifya bufumacumi. Bushe mu cituntulu uli uwa nsansa nomba? Nelyo bushe insansa sha cine cine kuti shasangwa fye mu mulu mweka? Bushe kwalibako icilolelo cashininkishiwa ica kuti kuti twakwata ubutuntulu bwa bumi ne nsansa, no kukwata fye ifi pano pene pe sonde?