Ukulolesha Bushilya bwa “Mutende no Mutelelwe” Ifyapangwa no Muntu
Icine cili ca kuti, abantunse te kuti babale balete umutende wa cine cine, ubelelela. Mulandu nshi te ifyo? Pa mulandu wa kuti abantunse te bakatoba ba mutende aba cine cine, nangu ca kuti balakana ukupeelwa kwa mulandu wa lyashi lya kale ilya kantaikwako umulopa. Katoba wa mutende uwa cine cine wa maka ukucila umuntu. Te umbi ukucila pali Satana Ciwa, uwalondololwa muli Baibolo nga “icilufya bonse abaikala mu calo conse.”—Ukusokolola 12:9.
BAIBOLO isosa ukuti: “Pano isonde ponse palaala mu maka ya Mubifi [Satana].” (1 Yohane 5:19) E ico, ukunonka umutende wa cine cine no mutelelwe ubelelela kufwile ukubimbamo ukufumya Satana pa mulola capamo ne micitile ya calo intu akuula iyo mu kukanatwishika alama. (Linganyeniko Esaya 48:22; Abena Roma 16:20.) Abantunse te kuti bacite ici.
Ni shani, lyene, fintu umutende no mutelelwe fingafikwapo? Ku maka ya Umo uyo uuli uwakosesha umupwilapo ukucila Satana. Lesa Wa maka yonse alimika inshita yapimwa ku mibombele ya kwa Satana pa kati ka mutundu wa muntu. Lintu iyo nshita yapimwa yafika, “uboni ubwa kupumikisha” bukemina icalo icalaala mu maka ya kwa Satana. (1 Abena Tesalonika 5:3-7) Ubushininkisho bonse buletungulula ku nsondwelelo ya kuti ici cikacitika nomba line.
Umutende no Mutelelwe Nomba!
Ni shani pa lwa nomba, nangula ni fyo? Icipimo ca mutende wa cine no mutelelwe kuti cacitikako nelyo fye ni lelo. Shani? Te mu nshila intu intungulushi sha butotelo abengi baeseshamo, ukupitila mu kuibimba mu mapolitiki ya ici calo, lelo, ukucila, ukupitila mu kukonka ukukambisha kwa kwa Lesa no kufunda.
Bushe inshila ya musango yo mu cituntulu ilaletako umutende? Ee, ilaleta. Ku ca kumwenako, Inte sha kwa Yehova balyesha no kusango kuti mu cituntulu kuti cacitikako ukuipakisha umutende wine wine ukusanshako ne cipimo cimo ica mutelelwe. Ukukonka amakambisho ya kwa Lesa nga fintu yasokololwa muli Baibolo kwalibalenga ukwisa capamo ngo kuteyanya kwa pa kati ka nko mu mutende wa cine, te mulandu no mushobo wabo, uluko, nelyo ululimi.—Ilumbo 133:1.
Mu cumfwila kwi funde lya bulesa, mu mampalanya ‘balifule mpanga shabo shibe ifya kuliminako umushili kabili tasambilila ubulwi.’ (Esaya 2:2-4) Bayumfwa abacingililwa mu kutemwa kwa kwa Lesa kabili balicetekela ukuti bamunyinabo aba ku mupashi balabasakamana. (Abena Roma 8:28, 35-39; Abena Filipi 4:7) Nga ca kuti uletwishika nampo nga ici ca cine, tulekulaalika ukubatandalila muli imo iya Ŋanda shabo isha Bufumu no kuimwena.
Umutende no Mutelelwe mu Kusaalala kwa Calo
Ici, nangu cibe fyo, te kufikilishiwa kwa kupelako ukwa bulayo bwa Baibolo ubwa mutende wa cine no mutelelwe. Ca kutali fye! Cili fye kumwena libela ukwa fintu ici calo cingaba nga ca kuti uuli onse akonkele amafunde ya kwa Lesa. Mu kwangufyanya uko kumwena libela kukafikilishiwa.
Umutumwa Paulo atile: “Ilyo balesosa [abo abashibombela Lesa], abati, Mutende no mutelelwe, [ukutontonkanya ukuti mu kupelako nabaleta umutende no mutelelwe mu nshila yabo], e lyo uboni ubwa kupumikisha bwabemina.” (1 Abena Tesalonika 5:3) Lesa akapima ukuti Satana nalufya umutundu wa muntu pa butali bwalinga. Cikaba lyene ni nshita ya kumufumya pa mulola, capamo ne micitile ya calo iyabola iyo yaba mu maka yakwe. Lyene cikaba ni nshita ku kufikilishiwa kwa busesemo bwa kwa Daniele ubwa kuti: “Mu nshiku sha shamfumu ishi Lesa wa mu mulu akemyo bufumu ubushakonaulwe umuyayaya, no bufumu bwa buko tabwakashiilwe ku bantu bambi; bukashonaula no kupesha aya mabufumu yonse, kabili bukeminina umuyayaya.”—Daniele 2:44.
Bushe ici cikaba ni ncitilo ya lufyengo pa lubali lwa kwa Lesa? Napacepa. Uboni bwa kupumikisha bukesa fye pali abo abawaminwa bwene ukulingana no bupingushi bwa kwa Lesa, ifipimo fya kwa Lesa. Bushe ulecetekela Kabumba ukupingulapo mu bulungi muli uyu mulandu? Mu kushininkisha kuti twasha umulandu ukwabula ubusanso mu minwe yakwe! Kabili cinshi cikaba ica kufumamo ca mulimo wakwe uwa bupingushi? Ipinda lisosa ukuti: “Pantu abatambalala bakekala mu calo, na ba mpomfu bakashalamo; lelo ababifi bakaputulwa mu calo, na bafutika bakafumpulwamo.” (Amapinda 2:21, 22) Bushe uuli onse akaloosha pa mfwa ya babifi?
Mu kuba na bakatoba ba mutende ukufumishiwapo, umutende wine wine no mutelelwe fikaba e cipendwilo ca mutundu wa muntu mu kusaalala kwe sonde pe samba lya kuteka kunonsha ukwa Bufumu bwa kwa Lesa. “Tafyakacite bubi, kabili tafyakonaule, mu lupili lwandi lwa mushilo monse; pantu icalo cikesulamo ukwishiba Yehova, ifyo amenshi yafimba pali bemba.” (Esaya 11:9) Bushe ulesumina ubu bulayo bwa Baibolo? Bushe uli uwacetekela ukuti ifi fintu fikacitika mu kwangufyanya? Nga ca kuti uletwishika, tulekukoselesha ukubebeta umulandu mu kulundako. Mu cishinka, inshila ya kwa Lesa e nshila fye yeka intu umuntu engafika pa buyo bwafulukwa pa nshita ntali ubwa mutende wa cine cine no mutelelwe wine wine.
[Ifikope pe bula 8]
Abantu ba kwa Yehova balaipakisha umutende wa cine ne cipimo cisuma ica mutelelwe ilelo