Mapepo ya Bani Ayasukwa?

YEHOVA ni Lesa uwasuka amapepo. Na kuba, Icebo cakwe, Baibolo, cimwita ‘Komfwa we pepo.’ (Ilumbo 65:2) Aliba uwaitemenwa ukwasuka amapepo. Lelo mapepo ya bani mu cishinka asuka?

Lesa asuka amapepo ya bantu umo umo ababa aba kutemuna kuli wene. Balikwata imibele ya kucindikisha iya kwa kemba wa malumbo uwatile: “Ifyo insebula ifuluke mpito sha menshi, e fyo umutima wandi ufuluka imwe, mwe Lesa. Umutima wandi waikatwe cilaka ca kwa Lesa, Lesa wa mweo.” (Ilumbo 42:1, 2) Nalyo line, bushininkisho nshi bwabako ku kushinina ukuti Yehova alasuka amapepo ya bakapepa bakwe aba cine?

Ubushinino bwa Kuti Lesa Alasuka Amapepo

Baibolo yabamo icalembwa icasaalala ukushinina ukuti Yehova alasuka amapepo ya babomfi bakwe aba busumino. Ku ca kumwenako, lintu Imfumu Yehoshafati iya Yuda apepeele ukulubuka, Lesa alyaswike ipepo lyakwe no kumupeelo kucimfya pa kulenga abalwani bakwe ukupumana. (2 Imilandu 20:1-26) Lintu Imfumu Hisekia mu nshila yapalako alolenkene no mulalo wa fita uwa kutiinya, mu kuicefya apepele kuli Lesa ku kwaafwa. Hisekia amwene ukupususha kwa kwa Yehova lintu malaika aipeye abena Ashuri 185,000 mu nshita ya bushiku imo.—Esaya 37:14-20, 36-38.

Mulandu nshi Lesa ayasukile yalya amapepo? Mu milandu yonse ibili, ishamfumu bapaapete ukuti ukulufya ubulwi kwali no kubelebesha bubi bubi pe shina lya kwa Yehova. (2 Imilandu 20:6-9; Esaya 37:17-20) Baali abayangwako pa lwa kushimikwa kwakwe ukusuma. “Ubuyo bwa kupelako ubwe pepo,” e fisosa The International Standard Bible Encyclopedia, te busuma fye bwa ulepaapaata lelo ukucindikwa kwe shina lya kwa Lesa.” Muli ifyo, ababomfi ba busumino aba kwa Yehova kuti baba abashinikisha ukuti akabaafwa “pa mulandu we shina lyakwe.” Icalembwa icishinina ukuti amapepo ya musango yo yalyasukwa cipeela abantu ba kwa Lesa ukucetekela kwa kuti alomfwa amapepo yabo.—Ilumbo 91:14, 15; 106:8; Amapinda 18:10.

Nelyo fye nga ca kuti imibele ibimbilemo ishina lya kwa Yehova, nangu cibe fyo, Lesa alapingulapo nampo nga kwasuka amapepo yamo nelyo ukukanaasuka. Kuti pambi akwata imilandu ya cine cine iya kukanaasukila amapepo yamo. Nga ca kuti tuleyumfwa ukuti amapepo yesu tayaleasukwa, cili cisuma ukulanguluka umulandu ici pambi cingabela ifyo.

Umulandu Amapepo Yamo Yashasukilwa

“Kabili apo mufusho kupepa ine nshumfwa,” e fyo Yehova limo aebele abena Israele. Ukusonta ku mulandu, atwalilile ukuti: “Iminwe yenu yaisulamo imilopa.” (Esaya 1:15, 16) Ni shani umo engasuula amalango ya kwa Yehova kabili nalyo line ukukwate senge na wene? Ipinda lya Baibolo lipeela icasuko calengama, ukusoso kuti: “Uufumyo kutwi ku kuumfwa amalango, ne pepo lyakwe line ca muselu kuli Yehova.”—Amapinda 28:9.

Baibolo ipeela umulandu na umbi untu amapepo yashumfwika, lintu isosa ukuti: “Mulalomba kabili tamupokelela, pa kuti mulomba bubi bubi ukuti mupoosaike mu mangalo yenu.” (Yakobo 4:3) Iyo, Yehova takasuke amapepo ku kwikusha ukufwaisha kwalubana. Tufwile na kabili ukwibukisha ukuti Lesa tapoka amakambisho ukufuma ku bantunse, ukulandila muli iyo nshila. Wene e Umo uupingula fintu akasuka amapepo yesu.

Ayashininkishiwa ukwasukwa mapepo ayo ayaya kuli Lesa ukufuma mu mutima wasanguluka, mu kuba no mulandu usuma, kabili mu nshila yakwe iyasontwa—ukupitila muli Yesu Kristu. (Yohane 14:6, 14) Lelo nelyo ni abo bantu amapepo yabo yakumanya ififwaikwa fya musango uyu inshita shimo baliyumfwa ukuti tabaleumfwikwa. Mulandu nshi Lesa te kuti asukile ilyo line amapepo yamo aya babomfi bakwe?

Yehova alishiba inshita yawamisha ku kwasuka amapepo. Nangula kalume alomba incinga, wishi pambi te kuti amushitile imo ukufikila umwana aba umukulu icalinga ukucofa ukwabula ubusanso. Icapalako kuti caba ica cine na mapepo yamo aya abo abatemwa Lesa. Ukwishiba icawamisha kuli bene, apeela icilekabilwa pa nshita yalingisha.

Nalyo line, ababomfi ba kwa Yehova tabapokelela fyonse fintu pambi bengapepela. Pa kuba abashapwililika, kuti pambi bafwaya ifintu fimo ifishingabawamina. Shibo wa ku mulu uwakwata ukutemwa te kuti abapeele icili conse ica kucena, pantu aba Kapeela wa “ca kupeela conse icisuma ne ca bupe conse icafikapo.” (Yakobo 1:17) Mu kupalako, Lesa te kuti pambi atupeele icintu cimo icishili icakabilwa ukufuma ku mimwene yakwe. (Linganyeniko 2 Abena Korinti 12:7-10.) Asuka amapepo mu kumfwana no kufwaya kwakwe ne mifwaile ya bantu bakwe.—1 Yohane 5:14, 15.

Yesu ‘Alyumfwilwe’

Yesu Kristu aali mwaume we pepo. (Mateo 6:9-13; Yohane 17:1-26) Akwete ukucetekela kwafula ukwa kuti Wishi wa ku mulu aali no kumumfwa no kwasuka amapepo yakwe. Yesu limo asosele ati: “Tata, . . . naliishibo kuti muŋumfwe nshita shonse.” (Yohane 11:41, 42) Lelo bushe Yesu talengelwe insoni pa mpela pene iya mulimo wakwe uwa pe sonde? Bushe lyene talilile ukuti: “Lesa wandi, Lesa wandi, cinshi ico mwandekelesesha?”—Mateo 27:46.

Lintu Yesu asosele ayo mashiwi, mu kumonekesha alefikilisha ubusesemo ukulosha ku mfwa yakwe. (Ilumbo 22:1) Mu mano yapelela, Yesu kuti na kabili apilibwile ukuti Yehova ali nafumyapo ukucingilila kwakwe no kuleka Umwana wakwe ukufwa imfwa ya kukalifya kabili iya kulenge nsoni pa kwesha bumpomfu bwakwe ukufika ku mpela. Ukubebeta ifya kuponako pali bulya bushiku bwa kulekelesha ubwa bumi bwa kwa Yesu ubwa pe sonde kulangisha ukuti Lesa alyumfwile amapepo yakwe.

Pa bushiku bwa kwikatwa kwakwe, Yesu alipepele mwi bala lya Getsemane. Imiku itatu apaapeete ukuti: “Tata, nga cabe cingacitwa, lekeni ulukombo ulu lupitepo pali ine.” (Mateo 26:39, 42, 44) Yesu taali uwashimunuka ukupeela ubumi bwakwe nge cilubula ku bantunse basumina. Iyo, lelo mu kumonekesha aali uwayangwako mu kushika pa lwa kucitikako kwa kuseebanya Wishi watemwikwa pa kufwa pa cimuti ca kucushiwilwapo pamo ngo wa miponto watiipwa. Bushe Yehova alyumfwile ipepo lya kwa Yesu?

Imyaka pa numa umutumwa Paulo alembele ukuti: “Wene mu nshiku sha mubili wakwe wa buntunse, pa kuniniko kulomba no kupaapaata pamo no kukuuta kwa kalanda ne filamba ku wali na maka ya kumutuula ku mfwa; kabili aumfwilwe pa mulandu wa kutiina Lesa.” (AbaHebere 5:7; Luka 22:42, 44) Ee, pa bushiku bwa kushikitika ukutangilila imfwa yakwe, Yesu ‘alyumfwilwe.’ Lelo shani?

Yehova atumine malaika ‘uwamoneke kuli [Yesu] no kumukosha.’ (Luka 22:43) Ukukoshiwa muli iyo nshila, Yesu aali na maka ya kulolenkana ne mfwa pa cimuti ca kucushiwilwapo. Mu kumonekesha, Yehova lyene amwebekeshe ukuti imfwa yakwe pa cimuti tayali no kuleta umuseebanya pe shina lya bulesa lelo mu kupelako yali no kuba e cintu cine ica kushisha lyene. Mu cine cine, imfwa ya kwa Yesu pa cimuti ca kucushiwilwapo yaiswile inshila ku baYuda, abo ukwabula yene baali abatiipwa pe samba lye Funde, ukupusushiwa ukufuma ku kusenukilwa ku mfwa.—Abena Galatia 3:11-13.

Inshiku shitatu pa numa, Yehova abuushishe Yesu no kumulubula ukufuma ku kupeelwa umulandu ukuli konse ukwa kuponta pa kumusansabika ku cifulo casumbukisha ica mu mulu. (Abena Filipi 2:7-11) Mwandi ni nshila ya kusungusha iya kwasuka ipepo lya kwa Yesu ukukuma ku “lukombo ulu”! Lilye pepo lyalyaswikwe mu nshila ya kwa Yehova. Kabili Yesu akumenye amapaalo ya kusungusha pa mulandu wa kuti alyebele Wishi wa mu mulu ukuti: “Lelo te kufwaya kwandi, kano kwenu, e ko kucitwe.”—Luka 22:42.

Ifyo Yehova Asuka Amapepo Ilelo

Ukupala Yesu, abo bafwaya ukutemuna Yehova ilelo balingile lyonse ukwipusha ukuti ukufwaya kwa kwa Lesa kucitwe. Balekabila ukukwata icitetekelo ukuti Yehova akasuka amapepo yabo mu nshila iyo ikabanonsha nga nshi. Mu cishinka, ‘akacita no kufushako ukucila ifyo balomba atemwa belenganya.’—Abena Efese 3:20.

Umwanakashi wa Bwina Kristu uwacaice uwaleikala na bafyashi bakwe abashasumina akumenye bucine bwa ilyo ilembo. Muli kalata ukufuma ku Watch Tower Society, alipushiwe ukulanguluka mu kubamo ipepo ukucitikako kwa kupokelela ukupeelwa umulimo kwa bumishonari bwaibela. Nangula ukufwaisha kwakwe ukwa ku mutima kwali kwikala pa ŋanda ku kwaafwa abafyashi bakwe ukuba Abena Kristu, aipwishe Lesa mwi pepo ukuti: “Cinshi cili ukufwaya kwenu? Bushe kuli kupokelela ubu bwite te mulandu no kukaanya kwa bafyashi bandi, atemwa kuli kwaafwa abafyashi bandi pa kutwalilila ukwikala na bene?” Lyonse lintu apepele, kampingu yakwe yalemweba ukupokelela ubwite. Apingwilepo ukuti ici cali casuko ukufuma kuli Yehova.

Lesa akoseshe uyu mwanakashi ukukakatila ku kupingulapo kwakwe. Lintu aipushiwe ukuselela ku Awaji Island, ku Japan, abafyashi bakwe balitulumushiwe kabili baliluminishe ukukaanya kwabo. Nangu cibe ifyo, pa kufilwa ukumushinina ukwalula umuntontonkanya wakwe, nyina apingwilepo ukusambilila Baibolo ku kumona fye umulandu umwana wakwe umwanakashi apangile ukupingulapo kwa musango uyo. Imyeshi itatu pa numa abafyashi bakwe balimutandalile. Bashimona fye fintu alesakamanwa bwino ku Nte shimbi isha kwa Yehova, wishi alyebekeshiwe apakalamba kabili aliponeshe ifilamba lintu bonse bashalipo. Mu kwangufyanya wishi na o wine atendeke ukusambilila Baibolo. Mu kupelako abafyashi bonse babili aba uyu mukashana wacaice balibatishiwe no kutendeka ukubombela Yehova mu busumino. Bushe Yehova Lesa tapaalile uyu umwanakashi wa Bwina Kristu mu kupaka kwacishamo?

Amapepo Yabo Yalasukwa

Bushe uleibukisha amashiwi ya mwanakashi uulumbwilwe mu kutendeka kwa cipande cifumineko? Tatalile akwatapo ukuyumfwa kwa kukwata amapepo yakwe ukwasukwa. Nalyo line, pa numa alilwike ukuti Lesa aleyasuka amapepo yakwe. Umwanakashi alisungile icalembwa ca fishinka fya mpikwe ica mapepo yakwe. Bushiku bumo acebele muli notibuku no kumwensekesho kuti Yehova alyumfwile ayengi aya mapepo yakwe, nelyo ni yantu umwine wine ali nalaba! Muli iyo nshila alishibe ukuti Lesa alemusakamana no kwasuka amapepo yakwe mu nshila yabondoka iyo yamunonseshe apakalamba.

Nga ca kuti uleyumfwa ukuti amapepo yobe tayaleasukwa, ipushe: ‘Bushe nalikwata ukwampana kwa pa lwandi na Yehova, ‘Komfwa we pepo’? Nga te ifyo, bushe ndebuula intampulo ku kusambilila pa lwa wene no kuba umo uwa babomfi bakwe baipeela?’ Asuka amapepo ya abo abamutemwa kabili abacita ukufwaya kwakwe. ‘Balapepa mu mukoosha’ kabili balomfwikwa, nge fyo Yesu aumfwilwe. (Abena Roma 12:12) E ico, “pongolweleni . . . ifya mu mitima yenu” kuli Yehova kabili citeni ukufwaya kwakwe. (Ilumbo 62:8) Lyene amapepo yenu yakomfwikwa.

Ilelo, amamilioni ya bantu balepepela icintu cimo icaibela. Ee, kabili amapepo yabo yaleumfwikwa. Natumone umulandu twingabela abashininkisha ukuti amapepo ya musango uyo yakasukwa.