Ubushiku bwa kwa Lesa Ubwa Cilandushi

NGA fintu twacimona mu cipande cifumineko, kwalibako imilandu iingi iyo cabela icalubana kuli ifwe ukufwaya icilandushi. Calilubana pantu mu kupelako, tacipikulula icili conse. Caliba icalubana pantu cilakosha ubulwani mu cifulo ca kukuulilila bucibusa. Kabili caliba icalubana pantu calibipa kuli umo uulesungilila amatontonkanyo ya cilandushi.

Umulandu wacilapo kucindama, nangu cibe fyo, uo icilandushi ca buntunse cabipila umonwa mu mashiwi ya kwa Mose kuli Israele aya kuti: “Wa nkumbu Yehova Lesa wenu.” (Amalango 4:31) Apantu Lesa wa nkumbu, tulingile ukuba aba nkumbu ukupala wene. Yesu aebele abakonshi bakwe ukuti: “Mube aba nkumbu, ifyo Shinwe abo wa nkumbu.”—Luka 6:36.

Nangu ni fyo, Baibolo na kabili ilondolola Yehova nga “Lesa wa cilandushi.” (Ilumbo 94:1) Kasesema Esaya alanda pa lwa “mwaka wa luse lwa kwa Yehova” na kabili “ubushiku bwa cilandushi ca kwa Lesa wesu.” (Esaya 61:2) Ni shani fintu Lesa engaba ponse pabili uwa nkumbu kabili uwa cilandushi? Kabili nga ca kuti tuli no kupashanya inkumbu sha kwa Lesa, mulandu nshi tushingamupashanishisha mu kubuula icilandushi?

Pa kwasuka icipusho ca kubalilapo, Lesa wa nkumbu pantu alitemwa umutundu wa muntu, kabili alalekelela apakalamba ukufika pantu engapesha pa kupeela abantunse ishuko lya mu nshita ku kuwamya inshila shabo. Abengi, ukupala umutumwa Paulo, balishukila ishi nkumbu. Lelo Lesa na kabili wa cilandushi—mu mano ya kufwaya ubulungi—pantu inkumbu sha musango uyo kuti shatwalilila fye pa ciputulwa cimo ica nshita. Lintu bamo balangisha ukuti tabakatale abalula inshila shabo, Lesa akaputunkanya ubupingushi mu citwa ubushiku bwakwe ubwa cilandushi.

Mu kwasuka ku cipusho ca cibili, iyo, tatwakwato mulandu usuma uwa kubela aba cilandushi pa mulandu wa kuti Lesa alaletako icilandushi. Yehova aliba uwapwililika mu bulungi. Abantunse tababa ifyo. Lesa alamona mu mbali shonse isha mulandu kabili lyonse alacita ukupingulapo kwalungama. Te kuti tushintililwepo ukucita cimo cine. Uyo e mulandu Paulo afundile ukuti: “Mwiba abalandula, mwe batemwikwa, lelo peeleni ubukali bwa kwa Lesa apa kupita; pantu calembwa, aciti, Icilandushi candi, ine nkabweseshapo: e fyo [Yehova, NW] asosa.” (Abena Roma 12:19) Pa mulandu wesu wine, tufwile ukusha icilandushi mu maboko ya kwa Yehova.

Mulandu Nshi Ubushiku bwa Cilandushi?

Nangu ni fyo, Baibolo mu fifulo ifingi ishibisha ukukabila kwa kulubulula mu kuba ne ncitatubi shabulo kulapila. Ku ca kumwenako, umutumwa Paulo asobele ukuti Lesa, ukupitila muli Yesu, akacita “icilandushi ku bakaano kwishiba Lesa, na ku bashinakila mbila nsuma ya kwa Shikulwifwe Yesu.” (2 Abena Tesalonika 1:8) Twalikwata imilandu isuma iya kusendela ayo mashiwi mu kukatama. Mulandu nshi?

Ku cintu cimo, pa kuti icinabwingi ilelo batwalilila ukusaalula bumulopwe bwa kwa Kabumba, basuula amafunde yakwe ayalungama. Nampo nga batunga ukusumina muli Lesa nelyo iyo, imyendele yabo mu kulengama ilangilila ukuti tabayumfwa ukuba abengalubulula pa ntanshi ya kwa Lesa. Amashiwi ya kwa kemba wa malumbo yalabomba ku ba musango uyo bonse: “Ni pa cinshi umubifi apontelela Lesa, mu mutima wakwe ukutila, tamwakacilandule?” (Ilumbo 10:13) Mu kushininkisha, Yehova takasuminishe kuli pe na pe umwine ukupumiwa muli iyi nshila. Nangu cingati aba ni Lesa wa kutemwa, na kabili aba ni Lesa wa bulungi. Akomfwila ukukuuta kwa abo mu cine cine bayangwako ku lwa bulungi: “Imeni, mwe Yehova, sumbuleni ukuboko kwenu; mwe Lesa, mwilaba abalanda.”—Ilumbo 10:12.

Mu kulundapo, abantu basaalule funde baleonaula isonde line apo twaikala. Balakowesha umwela, umushili, na menshi; besusha isonde no lufyengo no bunkalwe. Kabili balatuulika ifyanso fya miti yatumbinkanishiwa, ifya manyukiliya, ne fyanso fimbi ifya kulenge mfwa ku kutiinya ukupusunsuka kwa mutundu wa buntunse. Ukucilima kwa bulesa kuli ukwe pamfya pa kwebekesha inshita ya ku ntanshi iya mutelelwe ku mutundu wa muntu uwa cumfwila. (Ukusokolola 11:18) Uku kucilima eko Esaya alosesheko nga ubushiku bwa cilandushi.

Cinshi Cintu Ubushiku bwa kwa Lesa Ubwa Cilandushi Bukapwishishisha?

Ukulingana na Vine’s Expository Dictionary of Old and New Testament Words, mu Malembo ya ciGreek, ishiwi lya cilandushi, lintu lyabomfiwa mu kulundana na Lesa, mu kukonke shiwi lipilibula “‘ico icifuma mu bulungi,’ te kufuma kwi tontonkanyo lya kucena, nelyo ukufuma fye ku kuyumfwa kwa kukalifiwa, nga fintu caba ilingi line ku cilandushi ca buntunse.” Muli ifyo, icilandushi ca kwa Lesa ukulwisha abalwani bakwe tacakabe ni nshita ya kusuumyo mulopa kwabulo kulamwa, ukupala ukuumana kwatantalila ukwa bantu. “[Yehova, NW] aishibo kupokolola [abantu ba kuipeelesha kwa bukapepa, NW] ku ca kwesha, no kulinda abashalungama ukufika ku bushiku bwa bupingushi,” e fitweba Baibolo.—2 Petro 2:9.

Ababomfi ba kwa Lesa balolesha ku ntanshi ku bushiku bwa kwa Lesa ubwa cilandushi nga inshita lintu imyendele yalungama ikebelwa kabili abalungama ukupokololwa ukufuma ku lumanimani lwa babifi. Ici tacipilibula ukuti baba aba kucena nelyo ababula ukwelela. “Uwasaminwa akayofi ka babiye takalingwe uwa kaele,” e fisoka Baibolo. (Amapinda 17:5) Mu kupusanako, bakusha inkumbu ne cililishi, ukusha ukupingulapo konse pa lwa cilandushi kuli Lesa.

Ca cine, tacaba icayanguka ku bantu umo umo abakalifiwa ukubomba muli iyi nshila. Lelo kuti cacitikako, kabili abengi balicita ifyo. Ku ca kumwenako, Pedro akwete ubwaice bwakwe ubwabule nsansa kabili ilingi line alepumwa kuli munyina wakwe mukalamba. E co akulile uwa lukaakala, lyonse ukuba mu bwafya na bakapokola kabili ukupwishisha pa mukashi wakwe na bana ubukali ubo ayumfwile ukulola kuli munyina. Mu kupelako, akutike kuli umo uwa Nte sha kwa Yehova kabili pa numa atendeke ukusambilila Baibolo. “Mu kuba no kwaafwa kwa kwa Yehova,” e fyo ashimika, “nalyalwike, kabili nomba, mu cifulo ca kulwisha abantu, ndabaafwa pamo nga eluda wa Bwina Kristu.” Mu kuba no kwaafwa kwa Baibolo no mupashi wa mushilo, iminshipendwa bambi mu nshila yapalako balyaluka ukufuma ku kuba aba lupato nelyo aba cilandushi ukuya ku kulanga ukutemwa no kutekanya ukulola kuli bambi.

Cinshi Cintu Ukacita?

Ukusunga mu muntontonkanya ukwisa kwa bushiku bwa cilandushi ubwa kwa Lesa kukatwafwa ukushukila ukutekanya kwa kwa Yehova. Lelo ishuko lya mu nshita ilya kucita ifyo talyaba ilishapelela. Mu kwangufyanya ubo bushiku bukafika. Umutumwa Petro alangile umulandu bushaishila kale kale: “[Yehova, NW] talafyalafya ku kufishe co alaile, filya bamo batungo kulafyalafya; lelo atekanya kuli imwe pa kukanafwaya umuntu onse ukonaika, lelo onse ukulola ku kulapila.”—2 Petro 3:9.

Cili ice pamfya, lyene, ukuipekanishisha nomba ku bushiku bwa kulubulula ubwa kwa Lesa pa kusambilila Amalembo no kubomfya ukufunda kwa yako. Ici cikatwafwa ukukonka amashiwi ya kwa kemba wa malumbo: “Nashako ubukali, no kuleke cipyu; wilalunguluka, calola fye ku kubifya. Pantu incitatubi shikafitwa; lelo abalolela Yehova, bene bakapyaninine [sonde, NW].”—Ilumbo 37:8, 9.

[Icikope pe bula 7]

Pa numa ya bushiku bwa kwa Lesa ubwa cilandushi, ‘abo abalolela Yehova bakapyaninine sonde’