Bushe Ulatesekesha Ukuteyanya kwa kwa Yehova Ukwa pe Sonde?

LOLESHA pali daimonde iyaputulwa bwino, iyapeshima, kabili cinshi wamona? Icibekobeko icili mu cine cine icintu cayemba. Nomba bebeta iyo daimonde muli maikroskopo, kabili cinshi wamona? Mu kupalishako muli ukukwebauka, imilale, ne fintu fimbi ifyaisalilwamo, nelyo ukukongama kumbi.

Bushe kuti waonaula nelyo ukupoosa daimonde pa mulandu fye wa fintu ilemoneka muli maikroskopo? Kwena iyo! Talukako kuli maikroskopo, kabili kuti nalyo line watesekesha ukuyemba no kubengeshima kushili kwa lyonse ukulenga yene ukuba iyapulamo pa kati ka mabwe yambi.

Ukupala daimonde, ukuteyanya kwa kwa Yehova ukwa pe sonde kwalipulamo mu nshile shingi. Takuli kumbi ukuteyanya pe sonde ukuipakisha ukwampana kwe senge na Kabumba. Muli kalata ku Bena Kristu basubwa aba mu mwanda wa myaka uwa kubalilapo, abateesele isubilo lya ku mulu, umutumwa Petro aloseshe kuli uku kwampana kwaibela. Asosele ukuti: “Imwe muli lupwa ulwasalwa, bushimapepo bwa bufumu, uluko lwa mushilo, abantu abo aikwatila.” (1 Petro 2:9) Ilelo ibumba likalamba ilya “mpanga shimbi,” mu kuba ne subilo lya bumi bwa muyayaya pe sonde, baliilunda ku bashalapo ba ulo “uluko lwa mushilo” mu kupepa Lesa. (Yohane 10:16) Capamo aya mabumba yabili yapanga ukuteyanya uko kwapulamo ukupala ilibwe lyayemba kabili ilyabengeshima ilishili lya lyonse.

Sengauka Ukumona Bambi ne Linso lya Kulengulula

Lelo tufwile ukwishiba ukuti uku kuteyanya kwa mu kusaalala kwa calo kwapangwa na bantunse bashapwililika. E co, cinshi cingacitika nga twamwene kwene ukupitila muli maikroskopo ya mampalanya? Ee, kuti twasangamo ukukongama kwa lubembu na mabunake ya pa lwabo mu muntu umo umo ababa ulubali lwa kuko.—Abena Roma 3:23.

Umutumwa Paulo asumiine ukuti alikwete amabunake ya musango uyo. Asosele ukuti: “Ilyo nafwayo kucite cisuma, icabipa e cabapo kuli ine.” (Abena Roma 7:21) Umwina Kristu onse alakumanya ukulwishanya kumo kwine. Bonse balapange mpuso. Mu kulundapo, inshita imo abengi balacula pa mulandu wa mpuso sha muntu umbi. Bushe tulingile ukufuupulwa nelyo ukulufya ukuicetekela lintu amabunake no kukanapwililika kwa Bena Kristu banensu kwasokoloka? Bushe ico cilingile ukushibantula ukutesekesha kwesu ukwa kuteyanya kwa kwa Yehova? Kwena iyo! Ukucila, tulingile ukutalukako kuli maikroskopo, nge fyo cili, no kutaluka ukutonta pa kukanapwililika kwa muntu umo umo.

Amalembo yalitantika imibele yafulilako iyo ingeshibisha abo umupashi wa mushilo ulebombela. Imo iya yene “kutemwa, ukusekelela, umutende, [ukushishimisha, NW], icongwe, ubusuma, icishinka, ukunakilila, ukuteko mutima.” (Abena Galatia 5:22, 23) Mu kupusanako, ukuteyanya kwa butotelo, ukwa bupolitiki, no kwa makwebo ukwa ici calo ilingi line kulangisha ico Baibolo iloshako pamo nge milimo ya bumubili: “ulupato, ifikansa, akalumwa, icipyu, akafindwe, akapaatulula, bucaibela, akaso, ukukolwakolwa, iciwowo, ne fyalingana ne fi.” (Abena Galatia 5:20, 21) E ico, ukupala daimonde wabengeshima pa kati ka mabwe ayanangwa, abantu ba kwa Yehova balipulamo mu kati ka calo cabola lwa ku mupashi.—Mateo 5:14, 16.

“Mulundikane mu Mucetekanya umo Wine”

Ulubali lwapulamo lumo ulwa daimonde lwaba mipangilwe yapikulwa mu kupalamisha, iyashininkana mu kukosa iya atomu. Mu kupalako, ukuteyanya kwa pe sonde ukwa kwa Yehova kwishibisha buumo bushingalinganishiwako mu fifundisho na muli bumunyina. Abo ababa ulubali lwa uko kuteyanya babomfya ukukonkomesha ukusangwa muli Baibolo pali 1 Abena Korinti 1:10, ukulondololo kuti: “Lelo, mwe bamunyinane, ndemupaapaatila mwi shina lya kwa Shikulwifwe Yesu Kristu, musose bonse akanwa kamo kene, peba na malekano pali imwe; lelo mulundikane mu mucetekenya umo wine na mu kulinga kumo kwine.”

Inte sha kwa Yehova na kabili balicila pa mpatila ya mushobo ne cilumba ca luko. Apantu balikwata “amano ayafuma mu mulu” tabapanga “amalekano yabamo akapaatulula.” (Yakobo 3:17, NW) Tupeelo bukata kuli Yehova ku co apwishishisha muli uku kuloshako mu kuteyanya kwapangwa na bantunse bashapwililika.

Mu kupusanako, magazini ya The Christian Century, ukulanda pa lwa mwaka wa 1990, yalondolwele ukuti “icalo camoneke icayakanikana ukucila kale lyonse ukupitila mu tubungwe twa butotelo kabili ukupitila mu kuyumfwa kwa mushobo no kwa kutemwa buluko ukwaampanishiwa mu kubamo isenge ku fisumino fya butotelo. Ukufuma ku India ukufika ku Europe kabili ukufuma ku Middle East ukufika ku Pacific, ubutotelo bwatobenkene no mushobo na bucishinka bwa kutemwa buluko—ilingi line mu kuba ne fya kufumamo fya bupolitiki ifishingashintililwapo.” Mu kulengama, abo bafwaisha ukubombela Lesa kuti bayalukila fye ku kuteyanya kumo uko kuipakisha umupashi wa kwa Yehova na mapaalo.

‘Nga Daimonde, e fyo Nkacite Mpumi Yobe’

Daimonde e cintu cacilishapo kukosa iciicitikilako mu cifyalilwa icaishibikwa ku muntu. Baibolo ilosha ku mibomfeshe ya daimonde mu kukwesulwilako no kubashilako ifintu fyakosa. (Yeremia 17:1) Mona, na kabili, amashiwi ya kwa Yehova kuli Esekiele: “Lelo nkacite cinso cobe icakosa ku kulungatana ne finso fyabo, ne mpumi yobe iyakosa ku kulungatana ne mpumi shabo; nga daimonde uwa kosa ukucila nakabwe e fyo nkacite mpumi yobe.” (Esekiele 3:8, 9) Yehova apeele Esekiele umupampamina wakosa nga daimonde uwamupeele amaka ya kusesema ku bantu batalama.—Esekiele 2:6.

Mu kupalako ilelo, Yehova alipeela abantu bakwe ukukosa kwapala daimonde mu kulolenkana no kukaanya kukalamba. Inte sha kwa Yehova balishipikisha ifibindo fya mwi funde, ukusansa kwe bungwe, ukwipaiwa ukwabula umulandu wa mwi funde, impumo, ukubikwa mu fifungo mu bupondamishi, ukucululushiwa, nelyo fye ukuputunkanishiwa. Nalyo line, balilangisha icitetekelo cabo ukuba icishingatobeka.

“Ababomfi Bandi Bakasamwa”

Baibolo yasobele inshita lintu abantu bali no kukwate “mimonekele ya bukapepa” lelo “abakaana amaka ya buko.” (2 Timote 3:1, 5) Inyunshipepala icita lipoti ukuti “baProtestanti, baRoma Katolika na baYuda bonse bali abasakamikwa no kubongoloka” mu macalici yabo na masunagoge. Inte sha kwa Yehova, pa lubali lumbi, basambi ba mukoosha aba Baibolo. Mu mpendwa ilekulilako, abacaice na bakalamba, abaume na banakashi, bonse balasangwa ku kulongana kwafulilako ukwa cila mulungu. Kalata ku nyunshipepala yalondolwele pa lwa bene ukuti “ubutotelo bwabo e cintu caumisho mutengo ico bakwata, kabili ukwangwako kwabo fye kwakana bwene na bambi.”

Imibele ya musango uyo ilenga ukuteyanya kwa kwa Yehova ukupulamo ukupala daimonde yaumo mutengo. Kabili ukutasha kuya kuli Umo uukoselesha no kutungulula abantu umo umo abashapwililika ukupitila mu mupashi wakwe uwa mushilo.

Kasesema Esaya asobele ukuti: “E fyo asosa Shikulu Yehova: Moneni, ababomfi bandi bakalya . . . Moneni, ababomfi bandi bakanwa . . . Moneni, ababomfi bandi bakaanga ku kubuuta ku mutima.”—Esaya 65:13, 14.

Ilelo tulemona ukwisushiwa kwa ubu busesemo. Lesa alasakamana abantu bakwe mu nshila ishili ya lyonse! E co, nga ca kuti ulabishanya na bene, wisuminisha ukutontonkanya kwalubana ukukupusula ubuseko bobe. Lolesha pa cikope conse kabili ibukisha: Takwaba ukuteyanya kumbi pe sonde ukuipaikasha ukusakamana kwa kwa Lesa ukwaibela no kucingililwa. Wikabala auleka ukuteesa ishuko lyobe ilya kuba ulubali lwa kuko.