Ubutumikishi Bobe?

YEHOVA alilangisha bukapekape bwakwe pa kupayanya isonde mu kupwililika ku kuipakisha kwesu ubumi. Muli bukapekape alekele uku kupayanya ukutwalilila nelyo fye ni pa numa Adamu na Efa bapondweke. Icacila na po, alilumbulula ukutemwa kwakwe ukwapulishamo mu kutuma Umwana wakwe ku kupususha abantunse basumina ukufuma ku kayofi ka lubembu.—Mateo 5:45; Yohane 3:16.

Ni shani fintu twingankulako ku kutemwa kwa musango uyo? Yesu asosele ukuti tufwile ukutemwa Yehova Lesa wesu no mutima wesu onse, umweo, umuntontonkanya, na maka. Ici citubulula ukuti twalilye misha kuli wene iya kupepa kwesu na bucishinka no kuti tulingile ukwikala ubumi bwesu mu kumfwana no kufwaya kwakwe.—Marko 12:30; 1 Petro 4:2.

Lelo cinshi cabimbwamo mu kucita ukufwaya kwa kwa Lesa? Bushe kwalibako umulimo untu twingapeela kuli wene—ubutumikishi buntu tulingile ukwakanamo?

Ukukabila kwa Batumikishi

Amacalici yalifulunganya abantu ukukuma ku fya kupepa no kubombela Lesa. Nalyo line, Baibolo ilangisha ukuti kwabako fye ubutotelo bumo ubwa cine, “Shikulu umo, ukutetekela kumo, ulubatisho lumo, Lesa umo Shibo wa bonse.” Yesu asosele ukuti: “Bakapepa bene bene bakapepela Tata mu mupashi na mu cine.” E ico balifundwa ukuti: “Musose bonse akanwa kamo kene, peba na malekano pali imwe.”—Abena Efese 4:3-6; Yohane 4:23; 1 Abena Korinti 1:10.

Icimfulumfulu ukukuma ku buli ubutotelo bwa cine catendeke mu Edene lintu Satana asonsombele insambu sha bumulopwe bwa kwa Yehova pa kutwishika inshila ya kwa Lesa iya kutekelamo. (Ukutendeka 3:1-6, 13) Satana nomba atungilila uku ukukaanya kuli Lesa mu kuba ne fisambilisho fya cimbepa ifyaananishiwa na batumikishi ba bucenjeshi aba butotelo abo “baifungushanya kwati ni bakapyunga wa bulungami.” E co Baibolo isosa ukuti: “Mwe batemwikwa, mwitetekela mupashi onse . . . ico bakasesema wa bufi abengi nabafumina pano isonde.”—2 Abena Korinti 11:14, 15; 1 Yohane 4:1.

Mu nsansa, Lesa alibula intampulo ku kupwisha ifi fikansa fya kuteka. Pa kuba natuma Umwana wakwe ku kulubula umutundu wa muntu, nomba alicita Yesu ukuba Imfumu ya Bufumu bwa kwa Lesa ubwa mu mulu, mu kuba no bulashi ku konaula Satana na bakasesema bakwe, nelyo abatumikishi. Ici cikebekesha ukuti ukufwaya kwa kwa Lesa kwacitwa pano isonde, kwi paalo libelelela ilya bantu bacumfwila.—Daniele 7:13, 14; AbaHebere 2:9.

Satana alifimbilikisha ici cine. (2 Abena Korinti 4:4) Muli fyo, kuli ukukabila kuli ifwe ukubomba nga batumikishi ba kwa Lesa, ukusansalika ubufi bwa kwa Satana no kubelako icine ubunte. Yehova tatupatikisha ukwingila muli uyu mulimo. Afwaya ifwe, ukupala Yesu, ukuipeela fwe bene mu kuitemenwa ukufuma mu kutesekesha kwesu kuli wene na ku fintu atucitila.—Ilumbo 110:3; AbaHebere 12:1-3.

Ubutumikishi bwa Bwina Kristu

Yesu “alaendauka mu mishi ikalamba ne mishi inono, aleshimika no kubile mbila nsuma ya bufumu bwa kwa Lesa.” (Luka 8:1) Na kabili akanshishe abasambi bakwe ku kuba abatumikishi ukupala wene kabili abatumine ku kushimikila. (Mateo 10:1-14, 27) Pa numa, abapeele umulimo wa kutwalilila ubutumikishi ukufika ku mpela sha pano isonde. (Mateo 28:19, 20; Imilimo 1:8.

Uyu mulimo washintilila pa Bena Kristu ba cine, kabili umupashi wa kwa Lesa ulabakunta ukushimikila. Nge fyo cacitike pa Pentekoste 33 C.E., bonse abapokelele mbila nsuma balabuula icishingamo ku kucita ukubilisha kwa pa cintubwingi ukwa citetekelo cabo.—Imilimo 2:1-4, 16-21; Abena Roma 10:9, 13-15.

Abantu abengi, nangu ni fyo, te kuti baimone abene beka nga batumikishi. Peter, umo uwa Nte sha kwa Yehova, asosa ukuti: “Abantu mu Germany ilingi line bacilanguluka ukuba pe samba lya mucinshi wabo ukulanda pa lwa butotelo. ‘Ico ca bashibutotelo ukucita,’ e fyo basosa.” Ukulingana na Tony, mishonari pa makumi ya myaka, abantu mu England balisoso kuti: “Ico mulesosa cisuma, kabili ndetontonkanya ukuti Inte sha kwa Yehova bantu abasuma. Lelo ukuya ku mwinshi no mwinshi ku kushimikila—te kuti fye ncicite.” Ben asambilile Baibolo pa kashita kamo no mwaume umwina Nigeria uwamwebele ukuti: “Te kuti njilangishe ne mwine ukushimikila pa cintubwingi ukufuma ku ŋanda ne ŋanda; lelo kuti napeela indalama ku cilonganino cenu ku kwaafwa abo abaitemenwa ukucite co.” Ee, abantu abengi balibulisha icitetekelo no kushininwa ukukabila ku butumikishi bwa Bwina Kristu.

Nangu ni fyo, ukushimikila kwa cintubwingi cishingamo ca bonse mu cilonganino ca Bwina Kristu, te mulandu no mushinku nampo nga mwaume atemwa mwanakashi. Te bwa baeluda beka fye na babomfi batumikila, ‘ababuula ubutungulushi,’ lelo na kabili bwa Bena Kristu mu cinkumbawile. Bonse balikonkomeshiwa ukuti: “Tutuulile ilambo lya malumbo kuli Lesa, e kutila, icisabo ca milomo iitootele shina lyakwe. . . . Beni aba cumfwila ku balemutungulula.”—AbaHebere 13:15, 17.

Ukulanda kuli cintobentobe mwi Lyashi lyakwe ilya pa Lupili, Yesu asosele ukuti: “Te onse uutila kuli ine, Shikulu, Shikulu, akengila mu bufumu bwa mu mulu iyo; kano uucite cifwaya Tata wa mu mulu.” Pa kashita kambi alangile ukuti ukucita ukufwaya kwa kwa Lesa kusanshamo ukushimikila ku bashasumina. Abasambi bakwe balemucincisha ukuleka ukushimikila ku bena Samaria bamo pa kuti engayalyako, lelo atile: “Ica kulya candi kucito kufwaya kwa wantumine, no kupwisho mulimo wakwe.”—Mateo 7:21; Yohane 4:27-38.

Bushe Bulingile Ukuba Umulimo Obe?

Abantu ilingi line basobolapo ukusupila ifya kulya fya ku mubili ne cuma. Lelo mu kubangilila mu Lyashi lyakwe ilya pa Lupili, Yesu apandile amano bakakutika bakwe ku lwa kusakamikwa mu kusupila ifintu fya musango uyo. “Lelo,” e fyo asosele, “ilonganikileni ifyuma mu mulu . . . Lelo mubale mufwaye ubufumu bwa kwa Lesa no bulungami bwakwe.”—Mateo 6:20, 33.

Ukufwaya intanshi Ubufumu cipilibula ukukanaleka amabuseko yambi ukufimbilikisha ubutumikishi bwesu. Nangu cibe ifyo, ukucite ci tacipilibula ukufumyako conse cimbi. Ku ca kumwenako, Baibolo itukoselesha ukukanalekelesha ukukakililwako kwine kwine ukwa lupwa. Abantunse bonse balikwata uku kukakililwako. Ukulekelesha kwene kubomba mu nshila yapusana ne citetekelo ca Bwina Kristu. (1 Timote 5:8) Nangu ni fyo, tulingile ukucita apapela amaka yesu mu butumikishi ilintu tulebomba ifishingamo fimbi mu nshila ya mulinganya.

Yesu asosele ukuti: “Ne mbila nsuma iyi ya bufumu ikabilwa . . . ku kubo bunte ku nko shonse; e lyo impela ikesa.” (Mateo 24:14) Amashiwi yashingulukako aya ubo busesemo yafikilishiwa mu kasuba kesu. Ukutula 1914 imbila nsuma ili ya kuti Ubufumu bwalipeelwa amaka ku kubomba mu kusenamina kwa bumulopwe bwa kwa Yehova no kulwisha Satana ne calo cakwe. (Ukusokolola 11:15-18) Tulingile ukutontonkanya mu kukosa pa lwa mapange ya ici. Impela ikesa, kabili tufwile ukubomba umulimo wa kushimikila pa ntanshi ya iyo nshita. Ubumi buli mu busanso; kuti twaafwa ku kupususha abwingi abwa bwene.

Tinamina Ubutumikishi Bwakumanina

Abengi aba Nte sha kwa Yehova balapelesha amaawala ikumi no kucilapo umweshi umo na umo ku kwakana imbila nsuma na bambi. Amakana balapoosa amaawala yabili nelyo ukucilapo ubushiku bumo mu kushimikila pamo nga bapainiya ba kwafwilisha, kabili bambi balabomba mu kutwalilila nga bapainiya ba nshita yonse na baibela. Balatesekesha ipamfya lya uyu mulimo kabili bafwaya ukukwata ukwakanamo kwakulilako ukwingacitika ku kukwata wene ukucitwa pa ntanshi impela ya ici calo cabulwa insansa tailaisa.

Bushe kale kale uli Inte ya kwa Yehova iyacincila? Lyene tinamina ukwakanamo kwakulilako mu mulimo. Wamyako ukulamuka kobe mu kushimikila no kusambilisha, ukwesha ukupwishishisha ifyafulilako mu butumikishi. Nga ca kuti waliba mu cifulo ca kuba painiya, cite fyo. Nga ca kuti imibele yobe mu kushininkisha te kuti ikusuminishe, lyene koselesha abengaba na maka ukutinamina uyu mulimo.

Nga ca kuti tauli Inte ya kwa Yehova iyaipeela, wisoso kuti ubutumikishi te bobe. Umwaume na umbi uwe shina lya Peter, injiniya wa fya kulungisha, akenye mu kukosa ukwakana kwa mukashi wakwe ukwa mbila nsuma na bambi. “Ni shani ningasuminisha umukashi wandi ukushimikila ukufuma ku ŋanda ne ŋanda?” e fyo aleipusha. Pa numa ya myaka iya kumwensekesha ukushininwa kwashangila ukwa mukashi wakwe ukulosha ku cine ca Cebo ca kwa Lesa, apingwilepo ukusambilila Baibolo na o wine. Nomba, ukupala umukashi wakwe, aba mutumikishi waipeela, uwabatishiwa uwa mbila nsuma.

E ico wiicilikila we mwine weka ukufuma kwi shuko lya kubombela Yehova. Tulekukoselesha ukusambilila Baibolo no kubishanya na Bena Kristu ba cine pa kulongana kwabo. Ici cikakwafwa ukumumunga ubumi bobe mu kumfwana no bulungami bwa kwa Lesa no kukuulilila icitetekelo cashangila mu mifwaile yakwe. Nga wacita ukulunduluka muli ici, na iwe wine ukafikapo ukuba umutumikishi wa kwa Lesa. Ukaba lyene uwashuka ku kwakana muli uku kubomba kwe kambisho lya kwa Yesu ilya kuti: “E ico kabiyeni, kalengeni aba nko shonse ukuba abasambi . . . mulebasambilisha ukubaka fyonse ifyo namwebele.”—Mateo 28:19, 20.

Ee, kwalibako ubutumikishi ubo pambi wingakanamo, kabili buli ubwacilapo ukupamfya ukucila kale lyonse kuli iwe ukucite fyo.

[Akabokoshi pe bula 25]

Nasi wakwata ulupwa lwa kusakamana asosa ukuti: “Nyenda ukucila pe awala limo cila bushiku ukuya ku cipatala uko momba, e co natontonkenye ukuti te kuti ncite bupainiya bwa kwafwilisha. Lelo natantike mu kusakamanisha imibombele yandi ku kwakana mu mulimo wa mwi bala mu kubangilila cila lucelo pa ntanshi ya kuya ku ncito, mu kati ka fiputulwa fya nshita ya kupemwina, ne nshiku sha kutusha. Kuti waelenganya ubuseko bwandi lintu, ukufika pa mpela ya mweshi, nali nimpoosa amaawala 117 mu kushimikila! Nashalike bamaga- zini 263, ukulembesha kwa bamagazini 22 kabili nali na maka ya kutendeka amasambililo ya Baibolo 3.”

[Akabokoshi pe bula 27]

Michael akwata abana banono cinelubali, kabili akwata incito ya kushingamwa mu koleji ya ku Nigeria. Na kabili ni eluda mu cilonganino ca Bwina Kristu. Alakanako imimwene ya makana ya Nte:

“Ndamona ubutumikishi ngo mulimo wandi kabili lyonse ndebukisha ukuti Paulo asosele ukuti: ‘Ine nalilimbile, Apolo alitapilile, lelo ni Lesa e wameseshe.’ Umukashi wandi na ine ‘tulalimba’ mu kati ka kulanshanya ukwipi ukufuma ku ŋanda ne ŋanda ukwa mbila nsuma. ‘Tulatapilila’ pa kubwelela kuli abo abalanga ubuseko ku kubasambilisha ukufuma muli Baibolo, nga fintu Yesu asosele. Amasambililo ya Baibolo aya pa ŋanda aya cila mulungu yalyafwa abafulilako nga nshi—mu milandu imo indupwa shonse—ukwisa ku kwishiba icine.”