Ukutemwa kwa Kuli Yehova Kulacincimusha Ukupepa kwa Cine
“Uku e kutemwa Lesa, ukuti tunakile amafunde yakwe.”—1 YOHANE 5:3.
1, 2. Ni mu kuba na nkuntu nshi tulingile ukubombela Yehova?
IBUMBA lya batandashi 80 ukufuma ku Japan lyaletandalila Iŋanda ya Kulonganinamo iya Nte sha kwa Yehova mu California, U.S.A. Ulubansa lwayemba, ukusanshako ibala lyaisulamo ama blue jay (umusango wa fyuni), inkunda, na basoosa, fyabalengele ukuyumfwa abapalamisha ukucila napo kuli Kabumba wabo Mukalamba, Yehova Lesa. Uwalebatandasha mu kwangufyanya amwensekeshe ukuti uuli onse mwi bumba alebomba inshita yonse pamo nga painiya. E co, pa numa, ibumba lyaipushiwe icipusho ico caipushiwa ilingi line ukuti: “Mulandu nshi mwabela bapainiya abafulishe fyo mu Japan?” Pa kashita kanono kwaliko umutalalila. Lyene umukashana umo ayaswike mu kuitemenwa ukuti: “Pantu twalitemwa Yehova.”
2 Ukutemwa kwa kuli Yehova—fintu uku kutusesha ukuba abapimpa mu mulimo wakwe! Ca cine, te onse engacita bupainiya. Mu cine cine, icinabwingi ca bakasabankanya besu aba Bufumu abacila amamilioni yane tababa na maka ya kupokelela ili shuko. Lelo abengi abo imibele yabo isuminisha balalitinamina. Ifwe bonse kuti “[twatetekela] Yehova no kucite cisuma,” ukulanga ukutemwa kwesu pa kukwatamo lubali mu mulimo wa kupanga abasambi. (Ilumbo 37:3, 4) Kabili bonse bakapepa baipeela aba kwa Yehova kuti bayakana mu kulundulula umupashi wa bupainiya, ukupeela ukwafwilisha kwabamo kutemwa kuli abo abalecita bupainiya.—Mateo 24:14; 28:19.
3. Kupusana nshi kuli no kumonwa pa kati ka batunga ukuba Abena Kristu ne Nte sha kwa Yehova?
3 Mu kupusana na bengi abatunga ukuba Abena Kristu, abo mu kulinga bamona ubutotelo nga icalundwako fye ku bumi bwabo, Inte sha kwa Yehova balangisha ukutemwa kwabilima ukwa kuli Lesa uko kubakunta ukutwalilila ‘ukufwaye ntanshi ubufumu no bulungami bwakwe.’ Ici cafwaya ilambo, lelo fintu ilyo ilambo lyaba ilyawaminwa cene! (Mateo 6:33; 16:24) Lyaba mu kumfwana ne funde lya kubalilapo ilikalamba, ilyalondolwelwe mu kutendekelako na Mose no kubwekeshiwapo na Yesu Kristu ilya ukuti: “[Yehova, NW] Lesa wesu [Yehova, NW] umo; kabili uletemwa Yehova Lesa obe ku mutima obe onse, na ku mweo obe onse, na ku mano yobe yonse, na ku maka yobe yonse.”—Marko 12:29, 30; Amalango 6:4, 5.
4, 5. Ni bani bali no kumonwa nga ba busumino, kabili ni shani fintu ubusumino bwingalangwa?
4 Umo uwa bakabomba ba pa cishinte cikalamba ica calo conse ica Nte sha kwa Yehova alandilepo mu nshita ya nomba line kuli F. W. Franz, presidenti wa Watch Tower Society uwa myaka ya bukulu 98 uwapoosa imyaka ukucila pali 70 mu mulimo wa nshita yonse ukuti: “Waliba ica kumwenako cishaiwamina ica busumino, Munyina Franz.” Kabili Munyina Franz ayaswike ukuti: “Ee! Ufwile ukuba uwa busumino.” Ico cisupawila umulandu onse. Mu lubali ululi lonse ulwa mibombele ya Bufumu umo tulebomba, kuti twaba aba busumino.—1 Abena Korinti 4:2; Abena Galatia 3:9.
5 Ca cine, abengi kuti batemwa ukucita ifyafulisha mu mulimo wa kwa Yehova, lelo ifishingamo fya mu Malembo nelyo impika sha butuntulu bwa bumi pambi kuti fyabacilikila mu nshila imo. Abo abashaba na maka ya kucita bupainiya, nangu cibe fyo, tabalingile ukumonwa nga aba busumino bwacepako. Bamo balitwalilila aba cishinka pe samba lya mibele ya kwesha apakalamba kabili ilingi line pa myaka iingi nga nshi. Ee, baliba aba busumino! Balilangisha ukutemwa kwa kuli Yehova no kubomba mu mukoosha mu kwafwilisha kwa mutima onse ukwa kutantika kwakwe ukwa teokratiki. Balibuula ubuseko bwaswatuka mu mibombele ya bapainiya kabili balipeela ukukoselesha ku baleenekelwa ukuba bapainiya, ilingi line abana babo bene, ukubomba ukulola ku kucita bupainiya nga incito mu bumi iyacila pali shonse shimbi.—Linganyeniko Amalango 30:19, 20.
6, 7. Ni shani fintu ica kuloshako calondololwa pali 1 Samwele 30:16-25 cibomba ilelo?
6 Ukwikatana kwabamo ukutemwa ukwa ncitilo ukwa bantu ba kwa Lesa bonse ilelo kuti pambi kwalangililwa ku bulondoloshi bwalembwa pali 1 Samwele 30:16-25. Mu bulwi bwa kulwisha abena Amaleke, “Davidi abomine ukufuma ku lumonyangala no kufika ku cungulo” no kusenda ica kutapa icikalamba. Ilyo babwelele ku nkambi, abaume ba bulwi bamo aba kwa Davidi baipwishe ukuti takuli icili conse ica kutapa icili no kupeelwa kuli abo bashafikile nabo mu kalume ka bulwi. Lelo Davidi ayaswike ukuti: “Ni ani uwingomfwa imwe ku mulandu uyu? pantu, Ifyo cabe cakaniko ca watentemukila ku kulwa, e fyo cibe ne cakaniko ca waikala pa fipe; baleakana pamo.”
7 Icishinte cimo cine cilabomba ne lelo. Bapainiya balaba ku ntanshi ya bulwi bwesu ubwa ku mupashi. Lelo bonse bambi mu cilonganino bapeela ukwafwilisha kwa mutima onse, ukwa cishinka. Kabili ica kufumamo cikalamba ica mibombele yabo iyakumbinkana mu kati ka 1991 nacilangililwa bwino muli charti yakonkapo.
Lipoti Wapulamo
8. (a) Cinshi cintu lipoti wa mu kusaalala kwa calo alesokolola ukulosha ku bwingi bonse ubwa bakasabankanya na maawala bapoosele mu mulimo wa kwa Yehova? (b) Fishinka nshi ifya buseko fintu ulemona ku fyalo ifilemoneka ifipya muli lipoti?
8 Ee, amabula yatangilileko yane aya uyu magazini yalelanga ifyo ukubombesha kwaikatana ukwa bakapepa bapimpa aba kwa Yehova bonse kwasangwilako kuli lipoti wa kucincimusha uwa mu kusaalala kwa calo mu kati ka 1991. Icipimo ca pa mulu icawamisha ica bakasabankanya ba Bufumu 4,278,820 nacilembwa—ukwingilishiwako kwa 6.5 peresenti. Aba bapeeleshe amaawala 951,870,021 (mupepi na bilioni umo!) ku mulimo. Kabili mona ukubombesha kwa bufumacumi kwabikilweko na bamunyinefwe mu fyalo umo kale mwali ukukaanya lelo nomba ifilemoneka muli lipoti wa mu kusaalala kwa calo—Bulgaria, Cameroon, Czechoslovakia, Ethiopia, Mozambique, Nicaragua, Rwanda na U.S.S.R.
9, 10. (a) Ni shani fintu bapainiya bayankulako ku kusonsomba kwa nshita shayafya? (b) Kukoselesha nshi kulepayanishiwa ukwa kwingila mu mulimo wa bupainiya?
9 Mu myaka ya nomba line umupashi wa bupainiya walyanana ukupulinkana icalo conse. Nangu fye ni mu fyalo umo ubuntungwa bwa kupepa e lintu fye bwapeelwe mu nshita ya nomba line, ifipimo fya bapainiya filekula. Imibele ya fya bunonshi iyayafya tailecilikila ishi Nte sha mupampamina ukufuma ku kupeelesha conse ico bakwete ku kupepa Yehova. (Linganyeniko 2 Abena Korinti 11:23, 27.) Pali avareji wa cila mweshi, 14 peresenti uwa bakasabankanya bonse aba Bufumu balacita bupainiya. Impendwa ya cipimo ca pa mulu iya bapainiya ni 780,202, icili ni 18 peresenti wawamisha uwa bakasabankanya bonse.
10 Pa kumona ubuseko bapainiya bakumanya, bambi nabo balakoseleshiwa ukubuula uyu mulimo. Nga ca kuti taulatendeka ukucita bupainiya, bushe ukutemwa kobe ukwa kuli Yehova kuti kwakukunta ukusosa, nga fintu tubelenga pali Esaya 6:8 ukuti, “Moneni, ine; ntumeni”? Nelyo ukupitila mwi sambililo lyobe ilya Baibolo ilya mukoosha, bushe Icebo ca kwa Lesa kuti cabilimya ukufwaisha kwapimpa mu mutima obe, pa kuti wabuula fye ulutampulo lwalundwako ulwa kwingila mu mulimo wa bupainiya? Nangu fye ni mu nshita sha fya kwesha, icebo ca kwa Yehova calicincimwishe Yeremia, ica kuti tali na kukwinda.—Yeremia 20:9.
Umulimo Wabamo Kutemwa ku Mutundu wa Muntu
11. Ni shani fintu imibombele ya masambililo ya Baibolo aya mu ŋanda yatunguluka?
11 Lumo ulwa mbali shapulamo isha lipoti wa mwaka luli kukula kwa mpendwa ya masambililo ya Baibolo aya mu ŋanda, 3,947,261, ayaletungululwa lyonse umweshi umo umo mu kusaalala kwa calo. Uku kuli kutantika kwabamo kutemwa muli uko Inte sha kwa Yehova bakonkelelo buseko ubo basanga mu mulimo wabo uwa ku ŋanda ne ŋanda. Tulaba aba nsansa ukutungulula amasambililo ya Baibolo ku bantu ba nko shonse ne fikuliko fya mushobo, ukubomba mu kuba no kucincila kumo kwine uko umutumwa Paulo alangile. ‘Ukushimikisha [kwakwe] ku baYuda na ku bena Hela pamo’ ukwabulo kutwishika kwafwaile amaawala ayengi mu kusambilisha icine. (Imilimo 20:20, 21) Cili cimo cine ilelo. Inte sha kwa Yehova baleafwa “abantu bonse ukupusuka no kufika ku kwishibe Cine.”—1 Timote 2:4.
12-14. Malipoti nshi aya buseko ayaleumfwika ukufuma ku Europe?
12 Fintu yali aya kucincimusha amalipoti ya mibombele ya masambililo ya Baibolo ayaingilishiwako mu Europe wa ku Kabanga! Pa makumi ya myaka bamunyinefwe kulya baali no kukumana mu tumabumba utunono, nakalimo mu kuba fye na kope umo uwasapuka, uwakopololwa uwa Ulupungu lwa kwa Kalinda ulwa kale kuli bonse mwi bumba. Lelo nomba ubwingi bwa maBaibolo ne fitabo fya Baibolo filefumfumuka mu kupaka muli ifyo fyalo. Cibukisha umo ulwa Ulwimbo lwa Nyimbo 2:4, King James Version apatila: “Wene [Kristu Yesu] andeta ku ŋanda ya mutebeto [wa ku mupashi], ne lamfya lyakwe pali ine lyali kutemwa.” Pa kukwata amakope ya pa lwabo aya bamagazini, abengi baleba abaipangasha ku ‘kulungiko kusose cebo ca cine.’—2 Timote 2:15.
13 Icilonganino ca bakasabankanya 103 mu St. Petersburg, Russia, nomba line bacitile lipoti amasambililo ya Baibolo aya mu ŋanda ukucila pali 300. Pamo nge fisabo fya uku kubombesha kwa masambililo ya Baibolo, Inte shipya 53 shalibatishiwe mu myeshi fye cinekonsekonse. Ukucila pali citika wa cilonganino baliba mu cine imyeshi cinekonsekonse nelyo ukucepako! Kabili tabakwata baeluda—umubomfi utumikila fye umo ku kusakamana ukulunduluka kwabo ukwa ku mupashi.
14 Kasabankanya wa Bufumu mu Estonia alipushiwe no musambi wa Baibolo nampo nga kuti alaalikako fimo ifya fibusa fyakwe kwi sambililo. Lintu Nte afikile pa ŋanda umulungu wakonkelepo, asangile abantu ukucila pali 50 nabalongana! Kwena, ukutantika kwaibela kwalekabilwa ku kusakamana kwatwalilila ukwa ubo buseko bonse.
15. Cinshi cili no kusoswa pa lwa basangilwe ku Cibukisho na babatishiwe?
15 Abengi abo balesambilila basonda mu kubalilapo ukubishanya kwa Bwina Kristu pa kusangwa ku Cibukisho ca mfwa ya kwa Yesu. Uyu mwaka wapwile, abasangilweko balicilile pali 10,000,000 pa muku wa kubalilapo, 10,650,158 ukulongana mu kusaalala kwa calo mu filonganino 66,207 kuli aka kashita ka buseko. Mu fyalo fyafulisha ifya Latin-America, ifya Africa, ne fya Europe wa ku Kabanga, kwaliko impendwa imiku itatu nelyo ine ukulingana ne mpendwa ya bakasabankanya ba Bufumu. Nomba tufwile ukutampa ukupekanishisha Icibukisho icikacitwa uno mwaka pali Cisano, April 17. Cilesubilwa ukuti impendwa ikalamba iya basambi ba Baibolo abapya abasangwa ku Cibukisho bakatwalilila ukucita ukulunduluka ukulola ku lubatisho. Ukulosha ku lubatisho, mu 1991 na kabili twamwene ukucila pali 300,000 abalangishe ukuipeela kwabo kuli Yehova Lesa ukupitila mu kwibishiwa kwa mu menshi.
Bakatemwa ba Buntungwa bwa Bukapepa
16. Malipoti nshi aya kucincimusha ayaleisa ukufuma ku Mabungano ya Citungu aya “Bakatemwa ba Buntungwa”?
16 Ulubali lwawamina ukumonwa ulwa mwaka wa mulimo uwa 1991 luli kukonkana kwa Mabungano ya Citungu aya “Bakatemwa ba Buntungwa,” nomba ayapwishishiwa mu Ciputulwa ca Calo ica Kapinda ka ku Kuso lelo ayaletwalilila mu 1992 mu Ciputulwa ca Calo ica Kapinda ka ku Kulyo. Pa muku wa kubalilapo, programu ye bungano yonse yalipeelwe mu fyalo fyafulilako ifya Europe wa ku Kabanga, uko bamunyinefwe balesekelela ku kubomfya ubuntungwa bwabo ubwasangwa ubupya kwi lumbo lya kwa Yehova. Mu October 1991 ubwingi bonse ubwa basangilweko ubwacitwa lipoti pa mabungano 705 aya kubalilapo mu fyalo 54 ni 4,774,937.
17, 18. (a) Buntungwa nshi bakapepa ba kwa Yehova baipakisha no kwenekela? (b) Ni shani fintu ubuntungwa bwa bukapepa bwapusana ukufuma ku buntungwa bwa ku calo?
17 Yesu aebele abasambi bakwe ukuti: “Icine cikamulenga abantungwa.” (Yohane 8:32) Ilelo, icine ca Baibolo calilenga amamilioni ukuba abantungwa ukufuma ku fifundisho fya Kristendomu. Aya mamilioni balisambilila ukuti ukupayanya kwa kwa Yehova ukwe lambo lya cilubula ilya kwa Yesu kukacilenga ukucitikako ku mutundu wa muntu “[ukulubulwa] ku busha bwa kubola no kutwalwa mu buntungwa bwa bukata bwa bana ba kwa Lesa.” (Abena Roma 8:19-22) Mwandi buntungwa bwa kwebekesha ubo bukaba—ukwikala kuli pe na pe muli paradise wa pe sonde mu kati na nkati ka mipaka yalinga iyo Yehova mu kubamo kutemwa apima!—Esaya 25:6-8; linganyeniko Imilimo 17:24-26.
18 Ubuntungwa ubo Inte sha kwa Yehova nomba baipakisha, kabili ubo baleenekela ukuipakisha mu kupaka mu micitile ya fintu iipya iya kwa Lesa, bufuma kuli Lesa wesu, Yehova. (2 Abena Korinti 3:17) Tabwashintilila pa kabungwe akali konse aka bupolitiki nelyo aka bumwaluka. (Yakobo 1:17) Ku kucingililwa ukufuma ku kukanaumfwikisha ukuli konse pali ici cishinka, amabaji ye bungano lya 1991 ayo Inte sha kwa Yehova bafwele mu fyalo fimo ifya ku Europe wa ku Kabanga yakwete amashiwi ya kuti “Bakatemwa ba Buntungwa bwa Bukapepa” ukucila fye ukuti “Bakatemwa ba Buntungwa.”
Ukutemwa Kwabilima Ukwa Kuli Yehova
19. Ni shani fintu isenge lyabamo ipepo na Yehova lingatutungilila?
19 Ukutemwa kwesu ukwa kuli Yehova no kucetekela kwesu muli wene kukatulenga ukwikala mu kupalamisha kuli wene mwi pepo. Cili ni ili senge na Yehova ilyaafwa bamunyinefwe ukushipikisha amacushi ayengi no kupakaswa. (Ilumbo 25:14, 15) Mwi awala lyakwe ilya ca kwesha cakulisha, Yesu asungilile isenge na Wishi ukupitila mwi pepo. (Luka 22:39-46) Ilyo isenge lya musango uyo na Yehova ilyabamo ipepo lyatungilile Stefani ukupula mu kushikitika kwa kufwile cisumino kwakwe. Pa kupunamina mu mulu ilyo aali mupepi no kupoolwa amabwe ukufika ku mfwa, asosele ukuti: “Moneni, ndemono mulu naucenama, no Mwana wa muntu [Yesu] naiminina ku kulyo kwa kwa Lesa.”—Imilimo 7:56.
20-22. Ni shani fintu icakukumanya cilangilila ukuti Lesa alomfwa amapepo?
20 Nga fintu bakapepa ba kwa Yehova ilingi line bakumanya, Yehova alasuka amapepo ayaba mu kumfwana no kufwaya kwakwe. Ku ca kumwenako, mu calo cimo ica Africa umo umulimo wa Nte wabindwa, painiya waibela uwali pa lwendo ukuya ku kapinda ka ku kuso muli basi alikwete umufuko ukalamba uwa fitabo fya Bufumu na maenifulupu ifyo aletwala ku cifulo cimbi. Umubomfi wa muli basi uwalelonga ifipe aipwishe munyina ukuti: “Cinshi cili mu mufuko?” Munyina asosele icintu ca kubalilapo icaishile ku muntontonkanya ukuti: “Makalata.”
21 Ilyo ulwendo lwatwalilile, basi yalipitilile apo lyonse baceeceetela bamotoka, kabili motoka ya bakapokola yakonkele pa numa no kwimika basi, ukutunganya ukuti yasendele ifipe fishili fya mwi funde. Bakambishe abalendo bonse ukufuma muli basi no kuti ifipe fyonse fibebetwe. Ubu bwali bwafya! Munyina aendele ukuya akatalamukila ukufuma kwi bumba lyaleŋwiŋwinta kabili, ukufukama, alipepele kuli Yehova. Lintu ailundile kwi bumba na kabili, icipe ca mulendo uuli onse caleisulwa no kubebetwa mu kusakamanishisha. Lintu umufuko wa kwa munyina wali no kwisulwa, mu mutalalila aipwishe Yehova ku kwaafwa.
22 “Mufuko wa kwa ani uyu, kabili finshi filimo?” e fyaotweke kapokola. Ilyo fye munyina talaisula akanwa kakwe, umubomfi wa muli basi alyaswike no kusoso kuti: “Makalata ukufuma ku ———— post office ukuya ku ———— post office.” “Cawama,” e fyasosele umulashi. Aimishe umufuko no kuupeela ku mubomfi wa muli basi. “Shininkisha ukuti wasunga uyu mufuko mu cifulo cacingililwa pa lwendo,” e fyo amukambishe. Painiya waibela na kabili alifukeme no kupepa kuli Komfwa we pepo.—Ilumbo 65:2; Amapinda 15:29.
23. Cinshi cintu Yehova alangisha, kabili nalyo line mulandu nshi pa nshita shimo asuminishisha ukupakaswa ukufika ku cipimo ca kuko icakumanina?
23 Ici tacilepilibula, nangu cibe fyo, ukuti bakapepa ba kwa Yehova balilubuka umupwilapo ukufuma ku fya kucitika fya bulanda. Mu mibele imo, ponse pabili mu nshita sha Baibolo ne lelo, Yehova alilangisha ifyo kuti apokolola abantu bakwe. Lelo mu kumfwana no kupwisha kwa fikansa fya bumpomfu, pa nshita shimo alamoneka ukusuminisha ukupakaswa ukufika ku cipimo ca kuko icakumanina. (Linganyeniko Mateo 26:39.) Mu kulundapo, Yehova tacingilila abantu bakwe ilyo line fye ukufuma ku masanso, ukukansana kwa bana calo, nelyo umusoka, nangu cingati ukubelesha kwa mano yabomba ayashimpwa pali Baibolo kuti kwaba ukwa mutengo. (Amapinda 22:3; Lukala Milandu 9:11) Kuti twaba abacetekela, nangula ni fyo, ukuti nampo nga twapokololwa ukufuma ku mibele ya kwesha nelyo iyo, ubusumino bwesu bukalambulwa, nangu fye ni mu kubuuka nga cingakabilwa.—Mateo 10:21, 22; 24:13.
24. Fya bupe nshi fyabamo kutemwa ifyo Yehova apayanya, kabili ni shani fintu twingankulako ku kutemwa kwakwe?
24 Fintu fyaba ifya kusungusha ifya bupe fyabamo kutemwa ifya kwa Yehova! Ubupe bwakwe ku mutundu wa muntu ubwa ili sonde na conse icaba pali lyene fyaba kulumbulula kwapulamo ukwa kutemwa kwakwe. (Ilumbo 104:1, 13-16; 115:16) Kabili ubupe bwa kwa Lesa ubwa cililishi ubwa Mwana wakwe, Yesu Kristu, ku kulubula umutundu wa muntu ukufuma ku lubembu ne mfwa bwaba bupe bwabamo kutemwa apakalamba ubwabala abupeelwa. “Muli ici e mwasokolwelwo kutemwa kwa kwa Lesa muli ifwe, mu kuti Lesa natuma Mwane uwafyalwa eka ukuti ese pano isonde, ukuti tube no mweo muli wene. E muli ukutemwa, te mu kuti ifwe twatemenwe Lesa, lelo mu kuti wene atemenwe ifwe, no kutuma Mwane icikonsolwelo ca pa membu shesu.” (1 Yohane 4:9, 10) Mu kwankulako kuli uko kutemwa, shi natushininwe ukuti “nangu ni mfwa, nangu mweo, nangu ni bamalaika nangu ni bamulopwe, nangu fintu ifyabapo nangu fintu ifikesabako, nangu fya maka, nangu kusansama nangu kushika, nangu icibumbwa cimbi, te kuti cibe na maka ya kutupaatululako ku kutemwa kwa kwa Lesa ukwa muli Kristu Yesu Shikulwifwe.”—Abena Roma 8:38, 39.
Ukupituluka Muli ici Cipande
◻ Cinshi cipilibula ukuba uwa busumino?
◻ Ni mu ncende nshi isha mibombele pambi twingalangisha ukutemwa kwa kuli Yehova?
◻ Ni mbali nshi isha lipoti wa mulimo wa mwi bala shacikusekesha ukucilapo?
◻ Ni shani fintu twingalanga ukutasha ku fya bupe fyabamo kutemwa ifya kwa Yehova?
[Akabokoshi pe bula 15]
MULANDU NSHI BAPAINIYA ABAFULISHE FYO?
Ukulingana na lipoti, pa myaka 2,600 abena Japan bali bakapepa bapimpa aba bakateka babo. Mu nkondo sha uyu mwanda wa myaka uwalenga 20 weka, ukucila pa baume ba bulwi abena Japan amamilioni yatatu bapeele ubumi bwabo bulilambo, pantu batontonkenye ukuti takwaliko umucinshi uuli onse uwakulilako ukucila pa kufwila lesa wabo kateka. Lelo ukuipangasha ne fyanso fya bulwi ukwa baBuddha na baShinto kwalifililwe mu Nkondo ya Calo iya II, kabili pa numa ya ico kateka alekele bulesa bwakwe. Cinshi cali no kwisala uyu mupokapoka wa butotelo? Mu nsansa, amasambililo ya Baibolo ayatungulwilwe na bamishonari ba Nte sha kwa Yehova kabili pa numa ne Nte sha cikaya yalyafwile abengi ukusanga Lesa wa cine, Yehova, no kupeela ubumi bwabo kuli wene. Uku kuipeela kupilibula ifyafula kuli isho Inte abena Japan. Nga ca kuti mu nshita sha pa kale baali no kupeela ubumi bwabo bulilambo pa mulandu wa kwa lesa kateka, fintu mu kuba no kupimpa kwakulilako nomba bapeelesha ulupikwe lwabo nga bapainiya mu kupepa Lesa wa mweo kabili Kabumba wa kubumbwa konse—Shikulu Mulopwe Yehova!
[Akabokoshi pe bula 10-13]
LIPOTI WA MWAKA WA MULIMO UWA 1991 UWA NTE SHA KWA YEHOVA MU KUSAALALA KWA CALO
(Moneni muli magazini)
[Icikope pe bula 16]
Bakatemwa ba buntungwa bwa bukapepa—bakapepa ba kwa Yehova pe bungano mu Prague, August 9-11, 1991