Ukubilisha
Ukwafwilisha ku Makomiti ye Bumba Litungulula
Ifilundwa fye Bumba Litungulula ilya Nte sha kwa Yehova, abali pali ino nshita 12 mu mpendwa, batwalilila ukubomba mu busumino mu milimo yabo iyapeelwa. Baliba lyonse aba kutootela ku filundwa fya bucishinka ifye “bumba likalamba” ilileingilishiwako pa kwafwilisha kwabo ukwapimpa. (Ukusokolola 7:9, 15) Mu cilolwa ca kwingilishiwako kwakulisha mu kusaalala kwa calo, cilemoneka icalinga pali ino nshita ukupayanishisha Ibumba Litungulula ukwafwilisha kwalundwako. E ico nacipingulwapo ukulalika aba kwaafwa bafulilako, maka maka ukufuma pa kati ke bumba likalamba, ku kwakana mu kukumana kwa imo imo iya Makomiti ye Bumba Litungulula, uko e kuti, Amakomiti ya Babomfi, ya Kusabankanya, ya Mulimo, ya Kusambilisha, ne ya Kulemba. Muli ifyo, impendwa ya balesangwa ku kukumana kwa imo iya aya makomiti ikengilishiwako ukufika kuli cinelubali nelyo cinekonsekonse. Pe samba lya butungulushi bwa filundwa fya komiti ifye Bumba Litungulula, aba bakaafwa bakabuulo lubali mu kulanshanya kabili bakabomba imilimo yalekanalekana iyapeelwa na komiti. Uku kutantika kupya kukatendeka ukubomba pa May 1, 1992.
Pa myaka iingi nomba, impendwa ya bashalapo aba Nte shasubwa ilacepelako, ilintu impendwa ye bumba likalamba yalingilishiwako ukucila pa kwenekela kwesu ukwakulisha. (Esaya 60:22) Fintu tutootela Yehova pali uku kutanunuka kwa kupapusha! Lintu ishina lipya, Inte sha kwa Yehova, lyapokelelwe mu kutasha mu 1931, impendwa ya cipimo ca pa mulu iya bakabilisha ba Bufumu yali 39,372, abo ubwingi bwabo baitungile ukuba bamunyina basubwa aba kwa Kristu. (Esaya 43:10-12; AbaHebere 2:11) Imyaka 60 pa numa, mu 1991, icipimo ca pa mulu ica mu kusaalala kwa calo ica bakasabankanya cali 4,278,820, abo muli bene 8,850 beka ebaitungile ukuba abashalapo basubwa. Nga fintu caenekelwe mu lubuuto lwa Malembo, “ibumba likalamba” nomba lyacile mpendwa abashalapo ba “mukuni unono” ukucila pali 480 kuli 1. (Luka 12:32; Ukusokolola 7:4-9) Mu kusakamana amabuseko ya Bufumu ayaletanunuka, abashalapo mu kushininkisha balakabila kabili balatasha ukubombela pamo no kwafwilisha kwe bumba likalamba.
Nga fintu cilondolwelwe muli ulu lwafuma Ulupungu lwa kwa Kalinda, kuliko ibumba ililebomba na Israele wa ku mupashi ilelo ilyalinganishiwa ku bena Netinimu na bana baume ba babomfi ba kwa Solomone ababwelele ukufuma kuli bunkole bwa cina Babiloni pamo na bashalapo ba ciYuda; balya abashali bena Israele bacilile na pa mpendwa ya bena Lebi balebwela. (Esra 2:40-58; 8:15-20) “Abapeelwa” ukufuma pa kati ke bumba likalamba ilya lelo bali baume ba Bwina Kristu abakosoka abakwata ukubelesha kukalamba pamo nge ca kufumamo ca kusakamana ubwangalishi mu misambo, mu mulimo wa kwenda, na pa kati ka filonganino 66,000 ifyaimikwa nomba ukupulinkane sonde lyonse.
Mu nshita ya nomba line, Amasukulu ya Butumikishi bwa Bufumu yalicitwa mu kusaalala kwa calo ku kusambilishiwa kwa bakangalila na babomfi batumikila babo aba kubafwilisha. Mu United States mweka, bakangalila 59,420 balisangilweko. Aba “bakalamba” muli ifyo balipangashiwe ku kufikilisha ifishingamo fyabo mu kufumamo cimo kwacilapo.—1 Petro 5:1-3; linganyeniko Abena Efese 4:8, 11.
Pa cishinte cikalamba ica Brooklyn ica Nte sha kwa Yehova, bamo “abapeelwa” balibomba pa myaka iingi. Aba basanshamo bakangalila bakosoka ukufuma mwi bumba likalamba abanonka icuma ca kukampuka no kubelesha. Muli ifyo, Ibumba Litungulula nalisala banono aba muli bakangalila ba musango uyo ku kwafwilisha mu kukumana kwa makomiti ye Bumba Litungulula. Aba tabali mu kukabilwa baume aba calembwa cakokwesha ica mulimo. Ukucila, bali baume bakosoka, ababelesha mu kuba ne milingo iibalinga ku kupeela ukwafwilisha mu ncende shaibela. Ukupeelwa kwabo umulimo wa kubomba na komiti takubapeela imibele yaibela. Nga fintu Yesu asosele ukukuma ku basambi bakwe, “imwe [bonse, NW] muli ba bwananyina.” (Mateo 23:8) Nangu cibe fyo, ifingi fikaseekeshiwa kuli aba baume, kabili mu kukonkapo “bakafwayako ifingi” kuli bene.—Luka 12:48.
Tulesekelela mu kwenda kwa kuya ku ntanshi ukwa kuteyanya kwa kwa Yehova ilelo. Ukucila pa myaka yapitapo ikumi, kwalibako mupepi no kwingilishiwako kwa 100 peresenti mu mpendwa ya abo abaletumikila mwi bala, mu kumfwana no busesemo ukukuma kuli Davidi Wacilapo bukulu, Yesu Kristu: “Ku kwingilishiwa kwa kamfulumende yakwe no mutende takwakabe mpela.” (Esaya 9:7, King James Version) Mu nshila imo ine intu abena Netinimu babombele mupepi na bashimapepo mu kulungisha amalinga ya Yerusalemu, e fyo ilelo ubusesemo ukukuma ku kuteyanya kwa kwa Yehova bulefikilishiwa: “Bambi bambi bakakuula amalinga yobe.” (Esaya 60:10; Nehemia 3:22, 26) Abena Netinimu ba kasuba ka lelo baletashiwa pa kupimpa kuntu balanga mu kukuulilila ukupepa kwa cine, ukwafwilisha “Bashimapepo ba kwa Yehova” mu mulimo uuli onse nelyo ukupyunga bengapeelwa ukubomba mu kuteyanya kwa mu kusaalala kwa calo ukwa kwa Yehova.—Esaya 61:5, 6.